តុលាការសម្រេចឲ្យសកម្មជនគណបក្សសង្គ្រោះជាតិទាំង ៥នាក់ និងអតីតព្រះសង្ឃ ៣អង្គ នៅក្រៅឃុំ
តុលាការរាជធានីភ្នំពេញ នៅព្រឹកថ្ងៃចន្ទ ទី១៣មេសានេះ បានបើកសវនាការ សម្រេចឲ្យសកម្មជនគណបក្សសង្គ្រោះជាតិទាំង ៥នាក់ រួមទាំងលោកមាជសុវណ្ណារ៉ា និងអតីតព្រះសង្ឃ ៣អង្គ បាននៅក្រៅឃុំ។ ការដោះលែង នឹងធ្វើឡើង នៅរសៀលថ្ងៃនេះតែម្តង។ សកម្មជនគណបក្សសង្គ្រោះជាតិ ជាប់ចោទពីបទពាក់ព័ន្ធនឹងការធ្វើបាតុកម្ម នៅទីលានប្រជាធិបតេយ្យ ថ្ងៃទី១៥ ខែកក្កដា ឆ្នាំ២០១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
សកម្មជនគណបក្សសង្គ្រោះជាតិ ចំនួន ៥រូប ដែលជាប់ពន្ធនាគារព្រៃស ដោយរួមមាន លោកមាជ សុវណ្ណារ៉ា ជាដើម នៅព្រឹកថ្ងៃចន្ទទី១៣មេសានេះ ត្រូវបានតុលាការក្រុងភ្នំពេញ សម្រេចឲ្យនៅក្រៅឃុំបណ្តោះអាសន្ន ដោយត្រូវបង់ប្រាក់តម្កក់ទុក ១០ លានរៀល។ នេះបើតាមលោក អំ សំអាត អ្នកតាមដានសវនាការ និងជាមន្ត្រីអង្គការសិទ្ធិមនុស្សអង្គការលីកាដូ ដែលបានប្រាប់វិទ្យុបារាំង នៅព្រឹកថ្ងៃចន្ទនេះ។
លោក អំ សំអាត បានបញ្ជាក់ថា អតីតព្រះសង្ឃ ៣អង្គ ដែលរួមមានទាំងអតីតព្រះសង្ឃ សឺង ហាយ ផង ក៏ត្រូវបានតុលាការសម្រេចឲ្យនៅក្រៅឃុំ មុនថ្ងៃចូលឆ្នាំថ្មី ដែលនឹងឈានមកដល់នៅថ្ងៃអង្គារទី ១៤មេសា។ តាមលោក អំ សំអាត ទាំងសកម្មជនគណបក្សសង្គ្រោះជាតិទាំង ៥រូប រួមនឹងអតីតព្រះសង្ឃ ៣អង្គ នឹងត្រូវដោះលែង នៅរសៀលថ្ងៃចន្ទនេះ តែម្តង។
មន្ត្រីអង្គការសិទ្ធិមនុស្ស បានបញ្ជាក់ថា នេះគឺជាវប្បធម៌សន្ទនាដ៏ល្អមួយ រវាងគណបក្សទាំងពីរ ព្រោះការដោះលែងសកម្មជនដីធ្លី សកម្មជនគណបក្សសង្គ្រោះជាតិ និងអតីតព្រះសង្ឃជាបន្តបន្ទាប់ បានធ្វើឡើង បន្ទាប់ពីមេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ បានចរចាត្រូវរ៉ូវគ្នា ក្នុងការបង្កើតគ.ជ.ប ថ្មី កាលពីថ្ងៃទី៩មេសាកន្លងទៅ។
សូមរម្លឹកជូនថា សកម្មជនគណបក្សសង្គ្រោះជាតិ ចំនួន ៥រូប ដែលរួមមាន លោក មាជ សុវណ្ណារ៉ា ប្រធានផ្នែកប្រព័ន្ធផ្សព្វផ្សាយរបស់គណបក្សសង្គ្រោះជាតិ និងសកម្មជនបក្សនៅតាមមូលដ្ឋានចំនួន ៤នាក់ផ្សេងទៀត ត្រូវបានតុលាការកម្ពុជា ចាប់ដាក់ពន្ធនាគារបណ្តោះអាសន្ន ក្នុងសំណុំរឿងពាក់ព័ន្ធនឹងការរំដោះទីលានប្រជាធិបតេយ្យ កាលពីខែកក្កដា ឆ្នាំ២០១៤ ។ ដោយឡែក អតីតព្រះសង្ឃ ៣អង្គផ្សេងទៀត ត្រូវបានចាប់ខ្លួនពាក់ព័ន្ធនឹងបាតុកម្ម ហើយតុលាការចោទប្រកាន់ ពីបទចូលរួមជាមួយសមាគមជនទុច្ចរិត និងព្រះសង្ឃ សឺង ហាយ ត្រូវបានចោទមួយករណីទៀត គឺបានគ្រោងស្បងចីពរ និងប្រើប្រាស់ឆាយា ដោយមិនមានទឹកត្រា។
គួរជម្រាបជូនថា ចាប់តាំងពីមានការចរចាបង្កើតចេញនូវគ.ជ.បថ្មី កាលពីថ្ងៃទី ៩មេសារួចមក តុលាការបានសម្រេចដោះលែងជាបន្តបន្ទាប់នូវសកម្មជនដីធ្លី និងសកម្មជនរបស់គណបក្សប្រឆាំង សរុបចំនួន ១៩ នាក់ ឲ្យនៅក្រៅឃុំ។ ក្នុងនោះ ស្ត្រីសកម្មជនដីធ្លី ១០ នាក់ ត្រូវបានដោះលែង កាលពីរសៀលថ្ងៃសៅរ៍ ទី១១មេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ