លោកនាយករដ្ឋមន្ត្រីហ៊ុន សែនប្រតិកម្មនឹងសារនយោបាយរបស់លោកសម រង្ស៊ី
នុងពិធីសម្ពោធសមិទ្ធផលនានា និងកាត់ឫសសីមា ឆ្លងព្រះវិហារ នៅវត្តអម្ពិលវ័ន្ត ក្នុងស្រុកថ្ពង ខេត្តកំពង់ស្ពឺ កាលពីព្រឹកថ្ងៃទី១៩ ខែមេសានេះ លោកនាយករដ្ឋមន្ត្រី ហ៊ុន សែន បានបញ្ចេញប្រតិកម្ម ដោយមិនចេញឈ្មោះ តែសំដៅទៅលើមេបក្សប្រឆាំង លោក សម រង្ស៊ី ពាក់ព័ន្ធនឹងអ្វី ដែលលោកនាយករដ្ឋមន្ត្រី ហៅថាជានយោបាយទឹកឡើង ត្រីស៊ីស្រមោច ទឹកខោច ស្រមោចស៊ីត្រី របស់លោកសមរង្ស៊ី។ លោក សមរង្ស៊ី ក្នុងពិធីជួបជុំ នៅវាលពិឃាតជើងឯក កាលពីថ្ងៃទី១៧មេសា បានប្រកាសថា នៅពេលរដ្ឋាភិបាលថ្មីរបស់លោក ឡើងដឹកនាំប្រទេស តាមរយៈការបោះឆ្នោតនៅខែកក្កដា នោះមន្ត្រីជាន់ខ្ពស់រដ្ឋាភិបាលកម្ពុជា រួមមាន៖ រដ្ឋមន្ត្រី ឧបនាយករដ្ឋមន្ត្រី និងនាយករដ្ឋមន្ត្រី ដែលលោកសមរង្ស៊ី ថាជាអតីតមេដឹកនាំខ្មែរក្រហម និងជាជនឧក្រិដ្ឋ នឹងត្រូវនាំមកកាត់ទោស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ទោះជាថ្លែងដោយមិនចេញឈ្មោះ តែលោកនាយករដ្ឋមន្ត្រី ហ៊ុន សែន ពិតជាសំដៅទៅកាន់ លោកសមរង្ស៊ី ដែលបានថ្លែងការណ៍ តាមវិដេអូអ៊ីនថឺណេត ចូលទៅពិធីជួបជុំ នៅវាលពិឃាតជើងឯក ក្នុងពិធីរម្លឹកវិញ្ញាណក្ខន្ធដល់អ្នកស្លាប់ ក្នុងរបបខ្មែរក្រហម កាលពីថ្ងៃ១៧មេសា។
ក្នុងពិធីជួបជុំនោះ លោក សម រង្ស៊ី ប្រធានគណបក្សសង្គ្រោះជាតិ ដែលជាគណបក្សប្រឆាំងរួបរួមរវាងគណបក្សសមរង្ស៊ី និងគណបក្សសិទ្ធិមនុស្ស បានប្រកាសពីជោគជ័យរបស់គណបក្សប្រឆាំង ក្នុងការបោះឆ្នោតជាតិ នៅខែកក្កដាខាងមុខ ហើយថា រដ្ឋាភិបាលដែលដឹកនាំដោយរូបលោក នឹងបើកឲ្យតុលាការបន្តសំណុំរឿងកាត់ទោសលើអតីតមេខ្មែរក្រហម ដែលលោក សម រង្ស៊ី អះអាងថា សព្វថ្ងៃ កំពុងស្ថិតក្នុងជួររដ្ឋាភិបាល។
លោក សម រង្ស៊ី ក៏បានថ្លែងថា នៅឆ្នាំក្រោយ នៅពេលមានរដ្ឋាភិបាលថ្មី ដឹកនាំដោយគណបក្សសង្គ្រោះជាតិ នោះមន្ត្រីជាន់ខ្ពស់រដ្ឋាភិបាលមួយចំនួន ដែលលោកសមរង្ស៊ី ហៅថា ជនឧក្រឹដ្ឋ មានតំណែងជារដ្ឋមន្ត្រី ឧបនាយករដ្ឋមន្ត្រី និងនាយករដ្ឋមន្ត្រី ក៏នឹងមិនរួចផុតពីការចាប់ខ្លួន យកកាត់ទោសឡើយ។
ក៏ប៉ុន្តែនៅថ្ងៃសុក្រនេះ ក្នុងពិធីកាត់ឫសសីមា ដាក់ឲ្យប្រើប្រាស់ព្រះវិហារ ក្នុងវត្តអម្ពិលវ័ន្ត ក្នុងស្រុកថ្ពង ខេត្តកំពង់ស្ពឺ លោកនាយករដ្ឋមន្ត្រី ហ៊ុន សែន បានចាត់ទុកការលើកឡើងរបស់លោកសមរង្ស៊ី ថាជានយោបាយ ទឹកឡើង ត្រីស៊ីស្រមោច ទឹកខោច ស្រមោចស៊ីត្រី ដែលដូចគ្នានឹងនយោបាយក្នុងសម័យនល់នល់ និងសម័យខ្មែរក្រហម។
តាមលោកនាយករដ្ឋមន្ត្រី នយោបាយរបស់លោកសមរង្ស៊ី ដែលបានប្រកាសយកមេដឹកនាំជំនាន់មុន យកទៅកាត់ទោសនោះ ក៏នឹងបង្កឲ្យមានសង្គ្រាមផ្ទៃក្នុង កើតឡើងជាថ្មីទៀត ព្រោះថា លោកនឹងមិនសុខចិត្តឲ្យគេចាប់ខ្លួន យកទៅកាត់ទោស ស្រួលៗនោះទេ។
មួយវិញទៀត លោកនាយករដ្ឋមន្ត្រី ហ៊ានសន្និដ្ឋានថា នយោបាយរបស់គណបក្សប្រឆាំង ក៏នឹងកើតមានសង្គ្រាមជាមួយនឹងប្រទេសជិតខាង ដែលមេបក្សប្រឆាំង អះអាងថា ប្រទេសជិតខាង បានរំលោភ ឈ្លានពានទឹកដីកម្ពុជា។
ជាមួយគ្នានោះ លោកនាយករដ្ឋមន្ត្រី ហ៊ុន សែន ក៏មិនជឿថា ការរួបរួមរបស់គណបក្សប្រឆាំង គណបក្សសមរង្ស៊ី និងគណបក្សសិទ្ធិមនុស្សរបស់លោក កឹម សុខា អាចនឹងស្ថិតស្ថិរ ហើយកើនសំឡេងឆ្នោតរបស់ខ្លួនបាននោះទេ ព្រោះគណបក្សប្រឆាំងទាំងពីរ ក្នុងការបោះឆ្នោតកន្លងមក បានទិតៀនគ្នាយ៉ាងខ្លាំងក្លា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ