លោកហ៊ុនសែន អំពាវនាវឲ្យថៃបង្រួញជម្លោះនិងថែរក្សាសន្តិភាពជាមួយកម្ពុជា
ខណៈដែលកម្ពុជា និងថៃ កំពុងតតាំងក្តី លើសំណុំរឿង ស្នើសុំបកស្រាយសាលក្រម ឆ្នាំ១៩៦២ ស្តីពីប្រាសាទព្រះវិហារនៅតុលាការឡាអេ នាថ្ងៃព្រហស្បតិ៍នេះ ប្រមុខរដ្ឋាភិបាលលោក ហ៊ុន សែន បានថ្លែងអំពាវនាវផ្ទាល់មាត់ ឲ្យថៃបំព្រួញទំនាស់ ហើយបន្តថែរក្សាសន្តិភាពជាមួយកម្ពុជា។ លោកនាយករដ្ឋមន្ត្រី ក៏បានកត់សម្គាល់ជាពិសេសចំពោះទំនាក់ទំនងល្អ នៅពេលបុណ្យចូលឆ្នាំថ្មីកន្លងមកនេះ ដែលប្រជាជន និងអាជ្ញាធរសមត្ថកិច្ច នៅតាមព្រំដែនប្រទេសទាំងពីរ បានជួបជុំ សប្បាយរួមគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ក្នុងពិធីសម្ពោធអគារសាលាខេត្តកំពត នាព្រឹកថ្ងៃទី១៨ ខែមេសា ឆ្នាំ២០១៣ លោក ហ៊ុន សែន បានលើកឡើងថា កម្ពុជា និងថៃ កំពុងតែស្ថិតនៅក្នុងតុលាការ នៅទីក្រុងឡាអេ តែប្រជាជនកម្ពុជា និងប្រជាជនថៃ រួមទាំងអាជ្ញាធរសមត្ថកិច្ច បែរជារាំលេងជាមួយគ្នា នៅឯព្រំដែន ក្នុងពេលបុណ្យចូលឆ្នាំ រយៈពេល ៣ ថ្ងៃ ដែលបានបិទបញ្ចប់ កាលពីថ្ងៃទី១៦មេសា។
លោកនាយករដ្ឋមន្ត្រី បានបន្តថា ទំនាក់ទំនងជិតខាងល្អរវាងខេត្ត និងខេត្ត កងទ័ព នគរបាល សមត្ថកិច្ចនៅតាមព្រំដែនកម្ពុជា និងថៃ មានការសប្បាយរីករាយជាមួយគ្ន ជារឿងល្អណាស់។ បើទោះបីជាប្រទេសទាំងពីរ មានរឿងជាមួយគ្នា តែលោកនាយករដ្ឋមន្ត្រី លើកឡើងថា កម្ពុជា និងថៃត្រូវដោះស្រាយដោយសន្តិវិធី ហើយក៏ប្រើផ្លូវច្បាប់នៅតុលាការ។
កម្ពុជានិងថៃ ក៏មិនត្រូវទុកឲ្យចំណុចតូចនៃជម្លោះមួយក្លាយទៅជាជម្លោះទូទាំងព្រំដែន ហើយម្យ៉ាងទៀតកុំឲ្យបញ្ហានៃជម្លោះដ៏តូចមួយនេះ ក្លាយទៅជាជម្លោះគ្រប់វិស័យទាំងវិស័យសេដ្ឋកិច្ចពាណិជ្ជកម្ម ទេសចរណ៍ វប្បធម៌ ឬវិស័យដទៃផ្សេងៗទៀតដែលវានាំដល់ការបំផ្លាញទំនាក់ទំនងរវាងប្រទេសទាំងពីរ។
លោកនាយករដ្ឋមន្ត្រី ក៏បានសម្តែងការពេញចិត្តនឹងទំនាក់ទំនងរវាងប្រជាជន និងអាជ្ញាធរសមត្ថកិច្ចកម្ពុជា និងថៃ ដែលបានឆ្លងដែន ប្រារព្ធពិធីចូលឆ្នាំថ្មីជាមួយគ្នាកន្លងមកថ្មីៗនេះ។
ជាមួយនឹងការលើកឡើងដូច្នេះ លោកនាយករដ្ឋមន្ត្រីបានគូសបញ្ជាក់ ថាសន្តិភាព ជាកត្តាសំខាន់ណាស់ដែលត្រូវខិតខំថែរក្សាឲ្យបានទាំងនៅផ្ទៃក្នុងប្រទេសនិងទាំងជាមួយប្រទេសជិតខាងជាពិសេសជាមួយប្រទេសថៃ។ ថៃ និងកម្ពុជា ដែលកំពុងតែតទល់គ្នា នៅឯតុលាការទីក្រុងឡាអេ ជុំវិញបញ្ហាព្រំដែនប្រាសាទព្រះវិហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ