ព្រឹត្តិការណ៍ចុងក្រោយរបស់សម្តេចឪត្រូវបានចងក្រង
ក្រុមហ៊ុននិងបុគ្គលឯកជនមួយចំនួន បានចងក្រងឯកសារ ស្តីពីព្រះរាជពិធីបុណ្យព្រះបរមសពសម្តេចឪ ជាសៀវភៅ សំឡេង និងរូបថត ដើម្បីរម្លឹកពីគុណូបការៈ និងស្នាព្រះហស្តរបស់ព្រះមហាវីរក្សត្រ។ ដោយឡែកព្រះបរមរាជវាំងក៏បានផលិតជីវប្រវត្តិផ្លូវការ របស់សម្តេចឪផងដែរ ដើម្បីចែកផ្សាយក្នុងព្រះរាជពិធីបុណ្យថ្វាយព្រះភ្លើង ថ្ងៃទី៤ កុម្ភៈ ខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
សៀវភៅដែលមានចំណងជើងថា «ព្រះបាទសម្តេចព្រះនរោត្តម សីហនុ ឥស្សរជនអមតៈ» ត្រូវបានគេចែកផ្សាយដាក់លក់ហើយនៅល្ងាចថ្ងៃពុធនេះ។ សៀវភៅកម្រាស់១៨៥ទំព័រជាអត្ថបទ និងកម្រងរូបភាពជាច្រើន ដែលបង្ហាញតាំងពីការយាងព្រះបរមសពពីប្រទេសចិន រហូតដល់ថ្ងៃរម្លឹកខួប១០០ថ្ងៃនៃការសោយទីវង្គតនៃអង្គសម្តេចឪ ដែលត្រូវបានចងក្រងនៅក្នុងសៀវភៅនោះ។
លោក អាង គឹមអៀង ប្រធានទីភ្នាក់ងារទេសចរ Great Angkor Tour គឺជាអ្នកផ្តួចផ្តើមគំនិតចងក្រងសៀវភៅអនុស្សាវរីយ៍នេះឡើង។ ដោយមានការសហការការជាមួយក្រុមអ្នកកាសែតអាជីពមួយក្រុម សៀវភៅនេះនឹងបង្ហាញឡើងវិញនូវទស្សនៈ និងសាររំលែកទុក្ខរបស់មេដឹកនាំកំពូលរបស់ជាតិ មេដឹកនាំនៅក្នុងពិភពលោក ចំពោះព្រះបរមសពព្រះរតនកោដ្ឋ។
លោក អាង គឹមអៀង បានពន្យល់ថា ហេតុដែលធ្វើអោយលោកមានគំនិតចងក្រងសៀវភៅអនុស្សាវរីយ៍នេះឡើង គឺដោយសារតែលោកបានឃើញចំណាប់អារម្មណ៍របស់មេដឹកនាំទូទាំងពិភពលោក បានផ្តោតមកលើតួអង្គសម្តេចឪយ៉ាងសំខាន់ ប្រជាពលរដ្ឋកម្ពុជាគ្រប់ស្រទាប់វណ្ណៈបានសំដែងទឹកចិត្តសោកស្តាយព្រះអង្គជាពន់ពេក ហើយថារាជរដ្ឋាភិបាលក៏បានចំណាយថាមពល គិតគូរយកចិត្តទុកដាក់យ៉ាងខ្លាំង ចំពោះការសោយទីវង្គតរបស់សម្តេចឪ។ រូបភាពទាំងនេះហើយដែលលោកគិតថា ត្រូវចងក្រងទុកជាអនុស្សាវរីយ៍ និងចូលរួមចំណែកជាមួយរាជរដ្ឋាភិបាល និងពលរដ្ឋកម្ពុជាក្នុងការរំលឹកពីគុណូបការៈ និងស្នាព្រះហស្តរបស់សម្តេចឪ។
លោក គឹម ហាក់ ឯណោះវិញ ដែលជាអ្នកថតរូបអាជីព លោកនឹងរៀបចំពិធីពិពណ៌រូបថត ព្រមទាំងធ្វើសៀវភៅកម្រងរូបថត ស្តីពីការសោយទីវង្គតរបស់ព្រះមហាវីរក្សត្រដែរ។ លោក គឹម ហាក់ ដែលបានប្រមាញ់រូបតាំងពីថ្ងៃដែលព្រះបរមសពត្រូវបានយាងមកពីប្រទេសចិនដូចគ្នានោះ បានពន្យល់ថា ក្នុងនាមលោកជាអ្នកថតរូបអាជីពម្នាក់ លោកបានអោយតម្លៃខ្លាំងទៅលើព្រឹត្តិការណ៍នេះ។ ព្រឹត្តិការណ៍ដែលលោកហៅថា ថ្នាក់ជាតិ និងជាប្រវត្តិសាស្ត្រ។ ក្នុងចំណោមរូបភាពដែលលោកថតបានរយៈពេល៣ខែមកនេះ លោកនឹងត្រូវជ្រើសរើសយកតែជាង២០រូបប៉ុណ្ណោះ ដើម្បីដាក់តាំងពិពណ៌ ក្នុងប៉ុន្មានខែខាងមុខនេះ។
ក្រុមហ៊ុន Audio for Success ក៏បានចងក្រងព្រះជីវប្រវត្តិរបស់អង្គសម្តេចតាជាសំឡេង រួមបញ្ចូលទាំងកម្រងបទចម្រៀងដែលជាព្រះរាជនិពន្ធ និងព្រះសូរ្យសៀងរបស់ព្រះអង្គផ្ទាល់ផង។
មិនថាតែក្រុមហ៊ុនឯកជនទេ រាជរដ្ឋាភិបាលរឹតតែត្រូវបង្កើតវត្ថុអនុស្សាវរីយ៍ ជាមួយសម្តេចតាទៅទៀត។ ក្រោយពីបានផ្សព្វផ្សាយបទចំរៀងមួយបទរួចហើយ កាលពីថ្ងៃអង្គារ ម្សិលមិញ ក្រដាសប្រាក់១០០០រៀល ប្រភេទថ្មី ដែលមានរូបព្រះឆាយាលក្ខណ៍របស់សម្តេចតា និងបុស្បុកដែលដឹកព្រះមឈូសពីប្រទេសចិន ត្រូវបានលោកនាយករដ្ឋមន្ត្រី ហ៊ុន សែន ប្រកាសដាក់អោយចរាចរសម្រាប់ការប្រើប្រាស់ហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ