លើកស្ទួយគុណតម្លៃមនុស្សដើម្បីលើកកម្ពស់សីលធម៌សង្គម!
ចុះផ្សាយនៅថ្ងៃ៖
ស្តាប់ - ០៤:៤៧
ចុងក្រោយនេះ មានសញ្ញាល្អមួយបានលេចឡើងនៅក្នុងសង្គមកម្ពុជា។ នោះគឺការលើកស្ទួយអ្នកចេះដឹង អ្នកពូកែ និងអ្នកដែលបានសាងអំពើល្អដើម្បីសង្គម។ ករណីសិស្សប្រឡងជាប់និទ្ទេស A ករណីកីឡាការិនី ស៊ន សៀវម៉ី ដែលទទួលបានមេដាយមាសនៅកីឡាអាស៊ី និងចុងក្រោយនេះគឺករណីអ្នកគ្រូ នាង ផល្លា បេក្ខជនគ្រូឆ្នើមពិភពលោកជាដើម។ ព្រឹត្តិការណ៍ទាំងនេះគឺជាការទឹកចិត្តដល់អ្នកពូកែផង និងក៏ជាកត្តាជំរុញឲ្យមនុស្សខ្មែរខិតខំដើម្បីក្លាយខ្លួនជាមនុស្សល្អកាន់តែច្រើនដើម្បីលើកស្ទួយសីលធម៌សង្គម។
អ្នកចេះដឹងឬមនុស្សដែលពូកែលេចធ្លោជាងគេត្រូវបានគេចាត់ទុកថាជាធនធានមនុស្សដ៏មានតម្លៃសម្រាប់ប្រទេសជាតិ។ នៅលើលោកនេះ មនុស្សពូកែនិងមនុស្សល្អតែងត្រូវបានគេលើកស្ទួយយ៉ាងពិសេស។ ការលើកស្ទួយអ្នកចេះដឹង អ្នកមានគុណធម៌នេះហើយដែលជាគន្លឹះជំរុញឲ្យមនុស្សខិតខំដើម្បីក្លាយជាអ្នកពូកែ និងជាមនុស្សល្អដើម្បីទទួលបានកិត្តិយសនិងការស្ញប់ស្ញែងពីសង្គម។
ប៉ុន្តែ ជាអកុស ភ្លើងសង្គ្រាមជាច្រើនទសវត្សរ៍មិនត្រឹមតែធ្វើឲ្យរាំងស្ទះដល់ការបណ្តុះបណ្តាលធនធានមនុស្សប៉ុណ្ណោះទេ តែពេលខ្លះអ្នកចេះដឹងបែរជាត្រូវបានគេចាត់ទុកជាសត្រូវទៀតផង។ ជាក់ស្តែង ការកាប់សម្លាប់បញ្ញវន្តដែលជាធនធានមានតម្លៃសម្រាប់ប្រទេសជាតិក្នុងរបបខ្មែរក្រហមគឺជាឧទាហរណ៍ស្រាប់។ ក្រោយពីរបបខ្មែរក្រហម ការបណ្តុះបណ្តាលធនធានមនុស្សបានចាប់ផ្តើមឡើងវិញពីចំណុចសូន្យ។ ហេតុដូច្នេះហើយបានជាប្រទេសនេះខ្វះខាតធនធានមនុស្សយ៉ាងច្រើន។
ក្រៅពីកង្វះធនធានមនុស្សក៏នៅមានបញ្ហាប្រើប្រាស់ធនធានមនុស្សមិនត្រូវថែមទៀត។ ជាក់ស្តែង ការប្រើប្រាស់មនុស្សនៅតែផ្អែកសំខាន់ទៅលើសកម្មភាពនយោបាយនិងបក្សពួកនិយមជាធំ។ មនុស្សពូកែៗជាច្រើនដែលមិនចំណុះអ្នកនយោបាយមិនត្រូវបានគេលើកស្ទួយទេ។ ទម្លាប់នេះបានជំរុញឲ្យមនុស្សពូកែជាច្រើនបាក់ទឹកចិត្តនិងបានធ្វើឲ្យមនុស្សជាច្រើនងាកទៅពឹងលើនយោបាយដើម្បីទទួលបានមុខតំណែងបុណ្យស័ក្តិជាជាងពឹងលើចំណេះវិជ្ជា ឬអំពើល្អដែលខ្លួនបានសាង។
ប៉ុន្តែ ដល់ពេលហើយដែលខ្មែរត្រូវចាប់ផ្តើមរៀបចំប្រទេសជាតិរបស់ខ្លួនឡើងវិញដោយពឹងផ្អែកជាសំខាន់ទៅលើធនធានមនុស្សដែលពូកែពិតប្រាកដ។ ដើម្បីពង្រឹងគុណភាពធនធានមនុស្ស គេត្រូវលើកស្ទួយអ្នកចេះដឹង។ ដើម្បីលើកស្ទួយសីលធម៌សង្គមគេត្រូវលើកស្ទួយអំពើល្អជាចាំបាច់។ ការលើកស្ទួយសិស្សពូកែដែលប្រឡងបាននិទ្ទេសA ការផ្តល់កិត្តិយសដល់កីឡាការិនីឆ្នើម ស៊ន សៀវម៉ី និងការលើកទឹកចិត្តដល់អ្នកគ្រូ នាង ផល្លា គឺជាសញ្ញាល្អមួយគួរឲ្យលើកទឹកចិត្ត។
គេនៅចាំបានថា កាលពីក្នុងសម័យសង្គមរាស្ត្រនិយម គ្រូបង្រៀនមានតម្លៃខ្លាំងណាស់នៅក្នុងសង្គម។ ប្រាក់ខែគ្រូបង្រៀនអាចចិញ្ចឹមមនុស្សមួយគ្រួសារដោយមិនលំបាក។ កាលណោះ អ្នកណាៗក៏ប្រាថ្នានិងស្រមៃចង់ធ្វើជាគ្រូបង្រៀនដែរ។ ខណៈដែលគ្រូមានតម្លៃបែបនេះ ប្រាកដណាស់ថាមនុស្សដែលពូកែៗនាំគ្នាបាញ់ឆ្ពោះទៅរកអាជីពជាគ្រូបង្រៀន។ នៅពេលដែលមជ្ឈដ្ឋានគ្រូបង្រៀនប្រមូលផ្តុំដោយធនធានមនុស្សពូកែ ពួកគេអាចបណ្តុះធនធានមនុស្សជំនាន់ក្រោយរឹតតែពូកែថែមទៀត។
នៅក្នុងវិស័យកីឡានិងវិស័យផ្សេងទៀតក៏ដូចគ្នាដែរ ការលើកស្ទួយអ្នកពូកែពិតប្រាកដគឺជាមធ្យោបាយដ៏មានប្រសិទ្ធភាពក្នុងការជំរុញឲ្យមនុស្សខិតខំបញ្ចេញសមត្ថភាពដើម្បីក្លាយខ្លួនជាអ្នកពូកែ។ ប៉ុន្តែ ការលើកស្ទួយមនុស្សពូកែម្នាក់ពីរនាក់នៅមិនទាន់គ្រប់គ្រាន់ទេ។ ដើម្បីឲ្យកម្ពុជាសម្បូរមនុស្សពូកែប្រកបដោយគុណធម៌ និងសីលធម៌ មានកិច្ចការជាច្រើនទៀតដែលត្រូវធ្វើទន្ទឹមគ្នា។ នៅក្នុងវិស័យអប់រំ ការលើកទឹកចិត្តអ្នកពូកែត្រូវចាប់ផ្តើមតាំងពីថ្នាក់បឋមរហូតដល់ថ្នាក់បញ្ចប់ការសិក្សាជាន់ខ្ពស់។ អ្នកដែលទទួលការលើកស្ទួយមុនគេគឺអ្នកបណ្តុះបណ្តាលធនធានមនុស្សនេះឯង។
នៅក្នុងវិស័យកីឡា ការបង្វឹកក៏ត្រូវតែចាប់ផ្តើមពីកុមារតូចៗដែរ ហើយត្រូវបង្វឹកទៅតាមបច្ចេកទេសពិតប្រាកដដោយមិនឲ្យកីឡាករគិតគូរច្រើនពេកអំពីបញ្ហាជីវភាពទេ។ ក្រៅពីនោះ ការលើកទឹកចិត្តអ្នកចេះដឹងនិងអ្នកពូកែក្នុងពិភពការងារនិងក្នុងនយោបាយក៏សំខាន់ដែរពីព្រោះអ្នកទាំងនោះហើយដែលអាចធ្វើជាគំរូយ៉ាងល្អសម្រាប់មនុស្សក្នុងសង្គមជាពិសេសគំរូដល់អ្នករៀនសូត្រ។ ការផ្តល់តម្លៃមនុស្សទៅលើសមត្ថភាព ទៅលើកិច្ចខិតខំប្រឹងប្រែងបម្រើសង្គមនិងទៅលើសីលធម៌គឺជាចលករជំរុញឲ្យមានមនុស្សល្អកាន់តែច្រើនក្នុងសង្គមដែលកំពុងតម្លៃសីលធម៌កំពុងស្រុតចុះដូចបច្ចុប្បន្ន។
ដូច្នេះ ប្រសិនបើសង្គមខ្មែរបន្តលើកស្ទួយអ្នកពូកែ និងអ្នកសាងអំពើល្អ ឲ្យបានច្រើនថែមទៀត ក្នុងគ្រប់វិស័យនិងស្មើភាពគ្នា ប្រទេសកម្ពុជាច្បាស់ជាសម្បូរអ្នកចេះដឹង សម្បូរមនុស្សពូកែ រីឯសីលធម៌សង្គមខ្មែរក៏ត្រូវបានលើកកម្ពស់ដើម្បីក្លាយជាប្រទេសស៊ីវិល័យមួយជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ