លោកពូទីនទៅបំពេញទស្សនកិច្ចនៅចិនក្នុងពេលកំពុងមានភាពតានតឹងជាមួយលោកខាងលិច
ក្នុងក្របខ័ណ្ឌទស្សនកិច្ចនេះ ដែលនឹងប្រព្រឹត្តទៅ ថ្ងៃទី២០និង២១ឧសភា ពី ក្នុងចំណោមឯកសារ ដែលគ្រោងចុះហត្ថលេខា គឺមាន កិច្ចព្រមព្រៀង ស្តីអំពីការលក់ ឧស្ម័នរុស្ស៊ីទៅឲ្យចិន។ សម្រាប់រុស្ស៊ី កិច្ចព្រមព្រៀងនេះ សំខាន់ណាស់ ដ្បិតវាមានន័យថា រុស្ស៊ីបែរមុខទៅរកទីផ្សារអាស៊ីវិញ ជាពិសេស សហភាពអឺរ៉ុបដែលតែងទិញឧស្ម័នពីរុស្ស៊ី ចេះតែ កំញើញ ដាក់ទណ្ឌកម្មរុស្ស៊ី បូកទាំងវិស័យថាមពលផង ដោយមកពីវិបត្តិនៅអ៊ុយក្រែន។ ។
ចុះផ្សាយនៅថ្ងៃ៖
តាមវិមានក្រេមឡាំងប្រកាសឲ្យដឹង សម្រាប់ទស្សនកិច្ចលើកនេះ របស់លោក ប្រធានាធិបតីរុស្ស៊ីពូទីន នៅប្រទេសចិន ភាគីរុស្ស៊ីបានត្រៀមទុកឯកសារចំនួន ៤៦ច្បាប់ ដែល ពីក្នុងនោះ ច្បាស់ជានឹងទទួលការចុះហត្ថលេខា គឺប្រមាណ ៣០ច្បាប់។ ពីក្នុងនោះ សំខាន់ ជាងគេ សម្រាប់រុស្ស៊ី គឺកិច្ចព្រមព្រៀងដែលប្រមើលលក់ឧស្ម័នធម្មជាតិរុស្ស៊ី ទៅឲ្យចិន ក្នុងបរិមាណ ៣៨.០០០លាន ម៣ ក្នុង១ឆ្នាំៗ សម្រាប់អំឡុងពេល៣០ឆ្នាំទៅមុខ។ នេះគឺបន្ថែម ទៅលើ ប្រេងឆៅ ដែលចិនទិញពីរុស្ស៊ី ១ឆ្នាំៗ ក្នុងបរិមាណ ១៥លានតោន រហូតដល់ឆ្នាំ២០៣០ សម្រាប់ តម្រូវការនៃសេដ្ឋកិច្ចខ្លួន ដែលកំពុងអភិវឌ្ឍ ដោយចង្វាក់យ៉ាងលឿន។
ប៉ុន្តែ បញ្ហាដែលចោទ គឺពាក់ព័ន្ធនឹង តម្លៃឧស្ម័ន ដែលភាគីរុស្ស៊ី ជាអ្នកលក់ចង់បានថ្លៃ រីឯ ភាគីចិន ដែលជាអ្នកទិញ ចង់បានថោក ម៉្លោះហើយបានជាចិនតថ្លៃយ៉ាងស្វិតស្វាញ។
មិនមែនចៃដន្យទេ ដែលប្រធានក្រុមប្រឹក្សាភិបាល នៃក្រុមហ៊ុនយក្សរុស្ស៊ីខាងឧស្ម័ន Gazprom លោក Alexei Miller ក្នុងសម្ភាសន៍តាមកាណាល់ទូរទស្សន៍រដ្ឋរុស្ស៊ី បង្ហើបឲ្យដឹងថា គ្រប់ឃ្លា ទាំងអស់នៃកិច្ចព្រមព្រៀងនោះ មានត្រៀមទុករួចរាល់ទៅហើយ លើកលែងតែ ប្រឡោះ ដែលចែងអំពីតម្លៃ គឺមិនទាន់បំពេញទៅដោយតួលេខអ្វីណាទេ។ បើជាលទ្ធផល នៃកិច្ចចរចា ធ្វើដោយលោកប្រធានាធិបតីរុស្ស៊ីពូទីន ជាមួយនឹងសមភាគីចិន លោក ស៊ី ជីងពីង មានការ ចុះសម្រុងគ្នាដាច់ស្រេចជាស្ថាពរ នោះ ឯកសារសមស្របនឹងទទួលការចុះហត្ថលេខា។
ទាំងចិន ទាំងរុស្ស៊ី តែងចាត់ទុក សហប្រតិបត្តិការទ្វេភាគី ថា មានន័យជាយុទ្ធសាស្ត្រ។ ក្នុងសម្ភាសន៍ទៅប្រព័ន្ធផ្សព្វផ្សាយធំៗរបស់ចិន មុននឹងចេញដំណើរ ទៅបំពេញទស្សនកិច្ចនៅ ប្រទេសចិន លោកប្រមុខរដ្ឋរុស្ស៊ីពូទីន ហៅប្រទេសចិន ថាជាមិត្តដ៏កក់ក្តៅបំផុតរបស់រុស្ស៊ី ហើយការពង្រីកទំនាក់ទំនង ជាមួយមហាប្រទេសនេះនៃទ្វីបអាស៊ី គឺជាអាទិភាពនៃនយោបាយ ក្រៅប្រទេសរបស់រុស្ស៊ី។ តាមលោកពូទីន សហប្រតិបត្តិការរុស្ស៊ី-ចិន ឥឡូវ ឡើងដល់ ដំណាក់ថ្មីនៃភាពជាដៃគូយុទ្ធសាស្ត្រគ្រប់ជ្រុងជ្រោយ។
លោកពូទីន ក៏លើកឡើងដែរថា រុស្ស៊ីនិងចិន ដាក់ទិសដូចគ្នា បង្កើនទំហំផ្តោះប្តូរពាណិជ្ជកម្ម ទ្វេភាគី ពី ៩០.០០០ លានដុល្លារបច្ចុប្បន្ននេះ ឲ្យឡើងដល់ ១០០.០០០ លានដុល្លារ ក្នុង ឆ្នាំក្រោយ ហើយទៅទល់ឆ្នាំ២០២០ គឺឲ្យស្ទុះដល់២០០.០០០ លានដុល្លារតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ