ថ្ងៃនេះហ្សង់-ហ្វ្រង់ស័រ តាន់ សូមបន្តពិនិត្យមើលទៅលើស្ថានភាពភូមិសាស្រ្តនយោបាយរបស់ប្រទេសចិនតទៅទៀត ដោយសូមពិនិត្យមើលទៅលើទំនាក់ទំនងរវាងចិននិងកូរ៉េទាំងពីរ។
នៅក្នុងស្មារតីថ្នាក់ដឹកនាំចិនសព្វថ្ងៃ ឧបទ្វីបកូរ៉េត្រូវតែឋិតនៅក្រោមឥទ្ធិពលភូមិសាស្ត្រនយោបាយរបស់ប្រទេសចិន។ ចូរកុំភ្លេចថា តាំងពីបុរាណកាល តរហូតដល់ឆ្នាំ១៨៩៥ កូរ៉េតែងឋិតនៅក្រោមការត្រួតត្រារបស់ចក្រភពចិន មុននឹងធ្លាក់បន្តិចម្តងៗទៅក្នុងកណ្តាប់ដៃជប៉ុនដែលលេបយកឧបទ្វីបទាំងមូលមកកាន់កាប់ នៅឆ្នាំ១៩១០។ កូរ៉េបន្តឃ្លាតចេញពីឥទ្ធិពលចិន នៅឆ្នាំ១៩៤៥។ កាលនោះ ក្រោយពីជប៉ុនចាញ់សង្គ្រាមលោកលើកទីពីរហើយ សហរដ្ឋអាមេរិកនិងសហភាពសូវៀតពុះចែកកូរ៉េជាពីរ។ កូរ៉េខាងជើង ក្លាយជាកុម្មុយនិស្តស្តាលីននិយម(Stalinisme)ផ្គត់ផ្គង់ដោយសូវៀត។ កូរ៉េខាងត្បូងវិញ បែរទៅរកលោកខាងលិច ការពារនិងទ្រទ្រង់ដោយសហរដ្ឋអាមេរិក។
នៅឆ្នាំ១៩៤៩ សាធារណរដ្ឋប្រជាមានិតចិនដែលកាលណោះជាប្រទេសកុម្មុយនិស្តថ្មីថ្មោងផ្តើមមានទំនាក់ទំនងជិតស្និទ្ធជាមួយកូរ៉េខាងជើងវិញ តែជាទំនាក់ទំនងដែលឋិតនៅក្រោមការឃ្លាំមើលរបស់រៀមច្បងសូវៀត។ ចំណងមេត្រីភាពរវាងចិននិងកូរ៉េខាងជើងបានធ្វើឲ្យប្រទេសជិតខាងទាំងពីរនេះសឹងក្លាយជាបងប្អូនឈាមជ័រតែមួយ ជាពិសេសនៅសម័យសង្គ្រាមកូរ៉េឆ្នាំ១៩៥០-១៩៥៣។ កាលនោះ កងទ័ពចិននិងកងទ័ពកូរ៉េខាងជើងកៀកស្មាគ្នាប្រយុទ្ធទប់ទល់នឹងកងកម្លាំងអន្តរជាតិ ដឹកមុខដោយអាមេរិកដែលមកជួយកូរ៉េខាងត្បូង។
សព្វថ្ងៃនេះ ជាពិសេសតាំងពីសហភាពសូវៀតបានរលត់រលាយនិងសង្គ្រាមត្រជាក់បានចប់បាត់ទៅ ចិនមានឥទ្ធិពលខ្លាំងទៅលើកូរ៉េខាងជើង។ មូលហេតុទីមួយគឺមកពីកូរ៉េខាងជើងដែលលែងទទួលបានជំនួយពីម៉ូស្គូតាំងពីឆ្នាំ១៩៩១មក ធ្លាក់ខ្លួនក្រហើយពឹងពាក់សឹងទាំងស្រុងទៅលើចិន នៅលើវិស័យសេដ្ឋកិច្ច។ មូលហេតុទីពីរគឺមកពី នៅក្នុងវិបត្តិនុយក្លេអ៊ែរ លើកទីមួយនៅឆ្នាំ១៩៩៤ និងលើកទីពីរតាំងពីឆ្នាំ២០០២មក កូរ៉េខាងជើង ដែលត្រូវសហគមន៍អន្តរជាតិជាពិសេសអាមេរិកស្តីបន្ទោស អាចពឹងផ្អែកទៅលើតែប្រទេសចិនមួយគត់ ដើម្បីចេញរួចពីភាពឯកា នៅលើឆាកអន្តរជាតិ។
តាំងពីទសវត្សរ៍ទី៩០មកទល់សព្វថ្ងៃ ថ្នាក់ដឹកនាំចិនយកចិត្តទុកដាក់ខ្លាំងទៅលើឧបទ្វីបកូរ៉េ ពីព្រោះការថមថយឥទ្ធិពលរបស់រុស្ស៊ីនៅក្នុងឧបទ្វីបនេះ ដាក់ប្រទេសចិនឲ្យប្រឈមមុខគ្នាផ្ទាល់តែម្តងជាមួយសហរដ្ឋអាមេរិក។ អ្វីដែលចិននិងអាមេរិកបាននិងកំពុងបន្តឃ្លាំមើល គឺទំនាក់ទំនងល្អជាងកាលសម័យសង្គ្រាមត្រជាក់ រវាងកូរ៉េខាងជើងនិងកូរ៉េខាងត្បូង។ នៅឆ្នាំ១៩៩១ កូរ៉េទាំងពីរបានចុះហត្ថលេខាទទួលកិច្ចព្រមព្រៀងជាមូលដ្ឋានមួយស្តីពីការមិនឈ្លានពានគ្នាទៅវិញទៅមក ស្តីពីការបង្កើតឡើងនូវ«ទូរស័ព្ទក្រហម»មួយ ដើម្បីឲ្យថ្នាក់ដឹកនាំប្រទេសទាំងពីរអាចទូរស័ព្ទទាក់ទងគ្នាបាន ពេលមានភាពអាសន្នកើតឡើង។
ការសម្រួលទំនាក់ទំនងរវាងកូរ៉េទាំងពីរបានបោះមួយជំហានធំទៅមុខនៅឆ្នាំ២០០០ នាឱកាសជំនួបកំពូលជាប្រវត្តិសាស្រ្តរវាងប្រធានាធិបតីកូរ៉េខាងត្បូង Kim Dae Jung និងអគ្គមគ្គទេសក៍កូរ៉េខាងជើងKim Jung-Il។ ក៏ប៉ុន្តែ ក្រោយមក កូរ៉េទាំងពីរមើលមុខគ្នាមិនចំជាថ្មី ដោយហេតុតែកម្មវិធីនុយក្លេអ៊ែររបស់កូរ៉េខាងជើង។
ហេតុអ្វីបានជាចិននិងអាមេរិកយកចិត្តទុកដាក់ខ្លាំងម៉្លេះទៅលើកិច្ចសន្ទនារវាងកូរ៉េទាំងពីរ? ការពិត ទាំងចិនទាំងអាមេរិកបារម្ភក្រែងនៅទីបំផុត កូរ៉េទាំងពីរបង្រួបង្រួមគ្នាឲ្យទៅជាប្រទេសតែមួយវិញ។ ក្តីបារម្ភតែមួយដូចគ្នា ប៉ុន្តែមូលហេតុពីរខុសគ្នា។ ចំពោះអាមេរិក បើសិនជាកូរ៉េទាំងពីរក្លាយជាប្រទេសតែមួយវិញ នោះបញ្ហានៃវត្តមានទាហានអាមេរិក៧០០០០នាក់ នៅកូរ៉េខាងត្បូងនិងនៅជប៉ុននឹងចោទឡើង។ ចំពោះចិនវិញ ការដែលកូរ៉េទាំងពីរអាចក្លាយជាប្រទេសតែមួយវិញ នៅជាប់ជិតបង្កើយនឹងប្រទេសខ្លួន គឺជាគ្រោះថ្នាក់មួយជាយថាហេតុ។ ពីព្រោះ ប្រទេសកូរ៉េតែមួយដែលមានប្រជាជនរហូតដល់ទៅជាង៧០លាននាក់ និងដែលដឹកនាំដោយរបបនយោបាយសេដ្ឋកិច្ចសេរីនិយមមួយ នឹងអាចក្លាយជាមហាអំណាចតំបន់មួយយ៉ាងលឿនរហ័ស ក្លាយជាគូប្រជែងមួយរបស់ចិន នៅថ្ងៃណាមួយជាមិនខានឡើយ។
យុទ្ធសាស្រ្តរបស់ថ្នាក់ដឹកនាំចិន គឺទាញកូរ៉េខាងត្បូងឲ្យឃ្លាតចេញបន្តិចម្តងៗពីសហរដ្ឋអាមេរិក។ នៅក្នុងន័យនេះ តាំងពីឆ្នាំ២០០២រហូតមកដល់ការឡើងធ្វើជាប្រធានាធិបតីរបស់លោកអូបាម៉ា ចិនមិនចាំបាច់ធ្វើអ្វីឡើយ ពីព្រោះការទូតប្រកបដោយហិង្សារបស់អាមេរិកនៅលើឆាកអន្តរជាតិបានធ្វើឲ្យសាធារណមតិកូរ៉េខាងត្បូងស្អប់អាមេរិកខ្លាំងឡើងៗ។ ជាញឹកញយ ពួកយុវជនកូរ៉េ ចុះធ្វើបាតុកម្មតាមដងផ្លូវ ទាមទារឲ្យទ័ពអាមេរិកចាកចេញពីទឹកដីគេ។
ជាទូទៅ ពួកគេយល់ឃើញថាមានតែចិនទេដែលអាចកែតម្រង់កូរ៉េខាងជើង និងអាចជួយរក្សាស្ថិរភាពនៃឧបទ្វីបកូរ៉េបាន។
ម្យ៉ាងវិញទៀត កត្តាសេដ្ឋកិច្ចក៏កំពុងទាញចិននិងកូរ៉េខាងត្បូងឲ្យខិតចូលជិតគ្នាដែរ។ ប៉ុន្មានឆ្នាំចុងក្រោយនេះ ក្រុមហ៊ុនធំៗរបស់កូរ៉េខាងត្បូងបានទៅដាក់ទុនរកស៊ី នៅប្រទេសចិន ដូចជានៅណង់កាំង(Nankin)ជាដើម។
ដោយឡែក កត្តាវប្បធម៌ក៏ជួយទាញចិននិងកូរ៉េខាងត្បូងឲ្យខិតចូលជិតគ្នាដែរ។ ជនជាតិកូរ៉េខាងត្បូងច្រើនឡើងៗ បែរទៅរកគោលការណ៍ខុងជឺនិយម(Confucianisme) ដែលជាឫសគល់រួមនៃវប្បធម៌ចិននិងវប្បធម៌កូរ៉េ ហើយតាំងពីឆ្នាំ២០០៣មក និស្សិតភាគច្រើននៃសកលវិទ្យាល័យជាតិនៅទីក្រុងសេអ៊ូល ចូលចិត្តរៀនភាសាចិនជាងភាសាអង់គ្លេស។ ថ្មីៗកន្លងទៅនេះ ការស្ទាបស្ទង់មតិមួយថែមទាំងបានបង្ហាញថា ពលរដ្ឋកូរ៉េខាងត្បូងមួយចំនួនធំ ចង់ឃើញប្រទេសខ្លួនមានទំនាក់ទំនងស្និទ្ធជាមួយចិន ជាជាងជាមួយជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ