មេដឹកនាំសហជីពកម្មករជួបជុំ និយាយពីប្រាក់ឈ្នួលកម្មកររោងចក្រ
មេដឹកនាំសហជីពកម្មករ ដែលមានទាំងសហជីពគាំទ្ររដ្ឋាភិបាល សហជីពប្រឆាំង និងសហជីពឯករាជ្យ បានជួបប្រជុំរយៈពេលពេញមួយថ្ងៃ នៅថ្ងៃអង្គារ ទី៤កុម្ភៈនេះ ដើម្បីពិភាក្សាអំពីប្រាក់ឈ្នួលអប្បបរមា សម្រាប់កម្មកររោងចក្រ។ កិច្ចប្រជុំពេញមួយថ្ងៃ ក្រោមការសម្របសម្រួលរៀបចំដោយអង្គការអន្តរជាតិខាងការងារ ILO បានធ្វើឡើង តែមួយថ្ងៃប៉ុណ្ណោះ មុនពេលដែលគណៈកម្មការសិក្សាស្រាវជ្រាវប្រាក់ឈ្នួលអប្បបរមា សម្រាប់កម្មករកាត់ដេរ ដឹកនាំដោយលោកឧបនាយករដ្ឋមន្ត្រី គាត ឈន់ នឹងជួបប្រជុំលើកដំបូង នៅថ្ងៃទី៥កុម្ភៈ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
បន្ទាប់ពីបាតុកម្មបង្ហូរឈាម ទាមទារឡើងប្រាក់ខែកម្មកររោងចក្រ កាលពីថ្ងៃទី៣មករារួចមក គឺនៅថ្ងៃទី៤កុម្ភៈនេះ មេដឹកនាំសហជីពកម្មករទូទាំងប្រទេស រួមមាន លោក សោម អូន លោក ជួន មុំថុល លោក រ៉ុង ឈុន និងលោកអាត់ធន់ ជាដើម បានជជែកពិភាក្សា អំពីប្រាក់ឈ្នួលអប្បបរមា សម្រាប់កម្មកររោងចក្រ។ អង្គការអន្តរជាតិខាងការងារ ILO ជាអ្នករៀបចំកិច្ចប្រជុំរយៈពេលពេញមួយថ្ងៃនេះ ដោយមានអ្នកជំនាញបរទេស ធ្វើបទបង្ហាញ។ មេដឹកនាំសហជីព ក៏ត្រូវបានអនុញ្ញាតឲ្យឡើងបញ្ចេញមតិយោបល់ដោយសេរី។
ប្រាក់ឈ្នួលអប្បបរមា សម្រាប់កម្មករកាត់ដេរ ត្រូវបានលោក រ៉ុង ឈុន មេដឹកនាំសហជីពកម្មករ ទទូចទាមទារឲ្យមានការតម្លើង ទាបបំផុតដល់ ១៦០ ដុល្លារ។ ប៉ុន្តែរដ្ឋាភិបាល បានសម្រេចជាផ្លូវការ តម្លើងប្រាក់ខែដល់កម្មកររោងចក្រកាត់ដេរ ចំនួន ១០០ ដុល្លារ។ ការតម្លើងប្រាក់ខែកម្មករនេះ ត្រូវអនុវត្ត ចាប់ពីថ្ងៃទី១ ខែកុម្ភៈ ឆ្នាំ២០១៤ តទៅ។
ជាការកត់សម្គាល់ កិច្ចប្រជុំរវាងមេដឹកនាំសហជីពកម្មករទ្រង់ទ្រាយធំ នៅថ្ងៃអង្គារ ទី៤កុម្ភៈនេះ បានធ្វើឡើង តែមួយថ្ងៃប៉ុណ្ណោះ មុនពេលដែលគណៈកម្មការសិក្សាស្រាវជ្រាវប្រាក់ឈ្នួលអប្បបរមា សម្រាប់កម្មករនិយោជិត ផ្នែកវាយនភ័ណ្ឌ កាត់ដេរសំលៀកបំពាក់ និងផលិតស្បែកជើង ដែលមានសមាជិក ១១ រូប ដឹកនាំដោយលោកគាតឈន់ នឹងបើកកិច្ចប្រជុំលើកដំបូង នាថ្ងៃទី៥កុម្ភៈនេះ។ សមាសភាពគណៈកម្មការ ទាំង ១១ រូប មានឧបនាយករដ្ឋមន្ត្រី រដ្ឋមន្ត្រី រដ្ឋលេខាធិការ និងប្រធានសភាពាណិជ្ជកម្ម ជាប្រធាន អនុប្រធាន និងជាសមាជិក។ តែគណៈកម្មការនោះ មិនមានមេដឹកនាំសហជីពកម្មករ ចូលរួមទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ