ស្នាដៃភាពយន្តរបស់លោករិទ្ធីប៉ាន់ចូលប្រកួតក្នុងមហោស្រពភាពយន្តក្រុងកាន
ចុះផ្សាយនៅថ្ងៃ៖
ស្តាប់ - ០៥:៥០
មហោស្រពភាពយន្តអន្តរជាតិក្រុងកាន (Cannes នៅប៉ែកខាងត្បូងប្រទេសបារាំង) បានឈានចូលដល់ថ្ងៃទី៥ ថ្ងៃដែលកម្ពុជាមានកិត្តិយស មានឈ្មោះក្នុងពិភពភាពយន្តអន្តរជាតិ ព្រោះអាចចាត់ទុកថាជាលើកទីមួយ ដែលភាពយន្តខ្មែរបានចូលរួមប្រកួតប្រជែងក្នុងមហោស្រពភាពយន្តក្រុងកាន ដើម្បីដណ្តើមពានរង្វាន់ “Un certain Regard” ដែលជារង្វាន់លំដាប់ទីពីរ បន្ទាប់ពីតាលបត្រមាស (Palme d’Or) ក្នុងក្របខ័ណ្ឌមហោស្រពអន្តរជាតិ លើកទី ៦៦។
“កង្វះរូបភាព” (ជាភាសាបារាំង Image manquante) គឺជាចំណងជើងភាពយន្ត ដែលជាស្នាដៃរបស់សមិទ្ធិករខ្មែរ លោក រិទ្ធី ប៉ាន់។
ជាភាពយន្តឯកសារថ្មី ឬអាចថាជាភាពយន្តថ្មី ស្នាដៃថ្មីស្រឡាង ក្នុងទម្រង់ថ្មី ប៉ុន្តែ លោករិទ្ធី ប៉ាន់ ដក់អារម្មណ៍ជាប់នឹងប្រធានបទដដែល គឺទាក់ទងនឹងប្រវត្តិរឿងអតីតក្នុងសម័យខ្មែរក្រហម។ របបប្រល័យពូជសាសន៍ ដែលបានធ្វើឱ្យបណ្តាជនខ្មែររាប់លាននាក់រងគ្រោះបាត់បង់ជីវិត ក្នុងរវាងពីឆ្នាំ១៩៧៥ដល់១៩៧៩ ដែលក្នុងចំណោមអ្នករងគ្រោះទាំងអស់នោះ ក៏រួមមានទាំងម្តាយឪពុក និងបងប្អូនបង្កើតរបស់លោករិទ្ធី ប៉ាន់។ ចំណែក រូបលោកផ្ទាល់ក៏ជាជនរួចពីស្លាប់ពីជំរំលត់ដំកងកុមារ។
ក្រុមខ្មែរក្រហមបានផលិតភាពយន្ត ឃោសនា អំពីការដឹកនាំបក្សមហាលោតផ្លោះ មហាអស្ចារ្យ តែរំលាយចោលភាពយន្តរបស់សមិទ្ធិករផ្សេងទៀត ដែលរៀបរាប់ពីជីវិតកម្ពុជា មុនសម័យសង្គ្រាមឆ្នាំ១៩៧៥ (រូបភាពសិល្បៈ ឬកុនរបស់ផលិតករខ្មែរ) ព្រមទាំងរំលាយចោលរាល់រូបភាព និងឯកសារទាំងឡាយណាដែលអាចធ្វើជាភស្តុតាងសកម្មភាពឧក្រិដ្ឋនិងប្រល័យពូជសាសន៍ក្នុងសម័យខ្មែរក្រហម។
ដំណើរតាមស្វែងរករូបភាពដែលខ្វះនេះ វាល្អជាងការដែលរករូបភាពនេះឃើញ
បទសម្ភាសន៍ជាមួយលោករិទ្ធី ប៉ាន់
នេះហើយជាកង្វះរូបភាព ដែល លោក រិទ្ធី ប៉ាន់ ស្វែងរកតាំងពីយូរយារ មុននឹងយល់ថា នេះជាមូលហេតុដើមដែលនាំឱ្យលោកក្លាយខ្លួនជាផលិតករ សមិទ្ធិករភាពយន្ត! ផលិតករដែលបានកសាងរូបភាព ក្នុងពេលបច្ចុប្បន្ន ដើម្បីយល់ “អតីតកាល” ។ លោកបានភ្ជាប់រូបភាពជាច្រើន ដែលមានអត្ថន័យនិងតម្លៃខុសគ្នា មកងផ្សំបញ្ចូលគ្នាតែមួយ ដើម្បីធ្វើយ៉ាងណាបង្កើតជាភាពយន្តមួយមានខ្លឹមសារ ហើយមិនមែនមានត្រឹមតែជារូបភាព។
នៅក្នុងបទសម្ភាសន៍ជាមួយ អៀង សុខម៉ិញ ដែលចុះទៅយកការណ៍ ដល់កន្លែងប្រារព្ធមហោស្រពភាពយន្តអន្តរជាតិក្រុងកាន លោក រិទ្ធី ប៉ាន់ បានលើកឡើងថា លោកនៅតែចង់ឲ្យកង្វះរូបភាព នៅតែកើតមានជាបន្ត ពីព្រោះថា “ដំណើរតាមស្វែងរករូបភាពដែលខ្វះនេះ វាល្អជាងការដែលរករូបភាពនេះឃើញ”។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ