រុស្ស៊ីដែលបាត់បង់ទីផ្សារអាវុធខ្លះ កំពុងងាកទៅរកទីផ្សារនៅអាស៊ីប៉ាស៊ីហ្វិក
សេចក្តីនេះ ថ្លែង ដោយអគ្គនាយករង នៃ ក្រុមហ៊ុនរដ្ឋរុស្ស៊ីខាងលក់អាវុធទៅក្រៅ ហៅកាត់ RosOboronExport ថ្លែងក្នុងពិព័រណ៍អាវុធ ក្រោមឈ្មោះថា DSA-2012 ដែលថ្ងៃទី ១៩ មេសានេះ បិទបញ្ចប់ការងារខ្លួន នៅក្រុង Kuala Lumpur រដ្ឋធានីម៉ាឡេស៊ី។
ចុះផ្សាយនៅថ្ងៃ៖
ស្តាប់ - ០២:៥៩
តាមរយៈបទអន្តរាគមន៍ខ្លួន អគ្គនាយករង នៃក្រុមហ៊ុន RosOboronExport លោក Viktor Komardin បានពន្យល់បំភ្លឺថា ដោយមកពី ស្ថានការណ៍នយោបាយក្នុងលោក ប្រែប្រួល ទីផ្សារអាវុធរុស្ស៊ី ស្រាប់តែរងនូវផលប៉ះពាល់យ៉ាងធ្ងន់ គឺថា ៖
-របូតបាត់ទៅហើយ បណ្តាប្រទេសអឺរ៉ុបខាងកើត ដែលក្រោយពីចូលជាសមាជិក បក្សសម្ព័ន្ធ អូតង់ ឆ្លងទៅប្រើអាវុធរបស់បស្ចិមលោកតែម្តង។
-រដ្ឋអំណាចថ្មី នៅប្រទេសលីប៊ី កំពុងសើរើឡើងវិញ កិច្ចសន្យាដែលមានចុះកាលពីមុន ក្នុង តម្លៃ ៤.០០០លានដុល្លារ ឯណោះ។
-អ៊ីរ៉ង់ ដែលជាមធ្យម ទិញអាវុធពីរុស្ស៊ីក្នុងមួយឆ្នាំៗ ខ្ទង់១.០០០លានដុល្លារ ក្រោយពីរុស្ស៊ីដោយ បំពេញ តាមសេចក្តីសម្រេចរបស់ក្រុមប្រឹក្សាសន្តិសុខ អ.ស.ប.ឆ្នាំ២០១០ ប្រកែកមិនលក់ទៅឲ្យ ប្រទេសនេះ នូវប្រព័ន្ធការពារដែនអាកាសធុន S-300 ក្នុងតម្លៃ៨០០លានដុល្លារ ក៏អន់ចិត្ត ឈប់ទិញ អាវុធពីម៉ូស្គូ។
-មហាប្រទេសចិន តាំងពីឆ្នាំ២០០៥មក ឥតចុះកុងត្រាអ្វីជាធំដុំទៀតឡើយ ដើម្បីទិញអាវុធរុស្ស៊ី។
ប៉ុន្តែ បន្តស្ថិតនៅជា ម៉ូយដ៏ហំហួន ចុះកិច្ចសន្យាទិញអាវុធរុស្ស៊ី សម្រាប់អំឡុងពេលយ៉ាងយូរ គឺ ប្រទេសឥណ្ឌា និងវៀតណាម។
តំណាងក្រុមហ៊ុន RosOboronExport លើកឡើងតមកទៀត ៖
-ការតាំងបង្ហាញសព្វាវុធខ្លួន ក្នុងពិព័រណ៍ DSA-2012 នៅរដ្ឋធានីម៉ាឡេស៊ី គឺសឲ្យឃើញថា រុស្ស៊ី ប្រាថ្នាទាក់យក ម៉ូយថ្មីៗនៅតំបន់ អាស៊ីប៉ាស៊ីហ្វិក តែម្តង។ នៅលើផ្លូវនេះ មានសម្រេចបាន លទ្ធផលខ្លះជាវិជ្ជមាន។ ក្នុងខែមេសានេះ រុស្ស៊ីនឹងចុះកិច្ចសន្យា ដើម្បីលក់ទៅឲ្យឥណ្ឌូនេស៊ី នូវ រថពាសដែកសម្រាប់ទ័ពថ្មើរជើង ចំនួន៣៧គ្រឿង ក្នុងតម្លៃជាង ១០០លានដុល្លារ បន្ថែមទៅ លើ ១៧គ្រឿងដែលឥណ្ឌូនេស៊ី បានទិញពីរុស្ស៊ីទៅហើយ។ មុនពេលនេះ ឥណ្ឌូនេស៊ី បានទិញ ឧទ្ធម្ភាគចក្ររុស្ស៊ី ធុន Mi-17 , Mi-35 ព្រមទាំងសព្វាវុធសម្រាប់បំពាក់នៅនឹង យន្តហោះចម្បាំង សរុបទៅ ក្នុងទឹកប្រាក់ ៣០០លានដុល្លារ។
-រុស្ស៊ី កំពុងស្នើឲ្យហ្វីលីពីន ទិញ ទៅតាមតម្រូវការរបស់ប្រទេសនេះ គឺយន្តហោះ៦គ្រឿងធុន Yak-130 សម្រាប់ ប្រយុទ្ធផង ហោះហ្វឹកហាត់ផង ទោះបីប្រទេសនេះ តែងនិយមទិញ អាវុធអាមេរិកាំងក្តី។
រុស្ស៊ី ដែលធ្លាប់លក់យន្តហោះប្រដេញធុន Sukhoi-30 ចំនួនរាប់សិបគ្រឿង ទៅឲ្យម៉ាឡេស៊ី ទៅហើយ ក្នុងឆ្នាំនេះ ក៏ចូលរួមដែរ ប្រជែងជាមួយ យន្តហោះចម្បាំងរបស់បារាំង ស៊ុយអែដ អាមេរិកាំង ដើម្បីឲ្យម៉ាឡេស៊ីទិញយន្តហោះប្រដេញរបស់ខ្លួន ចំនួន ១៨គ្រឿងទៀត។
តាមសំដីតំណាងរុស្ស៊ី តំបនអាស៊ីប៉ាស៊ីហ្វិក មានចំណែកដល់ទៅ៤៣% នៃទីផ្សាររុស្ស៊ី ខាងលក់អាវុធទៅក្រៅ ទីផ្សារនេះក្នុងឆ្នាំ២០១១កន្លងទៅ បានវាត់ជាលើកទី១ ដល់ទឹកប្រាក់
១២.០០០លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ