លោកសម រង្ស៊ីនៅតែរំពឹងថាបានចូលរួមបោះឆ្នោត
ប្រធានគណបក្សសង្គ្រោះជាតិ លោកសម រង្ស៊ីនៅតែរំពឹងថាលោកនឹងបានត្រឡប់ចូលក្នុងប្រទេសកម្ពុជាវិញ ដើម្បីចូលរួមបើឆ្នោតតំណាងរាស្ត្រនៅឆ្នាំក្រោយនេះ។ លោកសម រង្ស៊ីដែលជាប្រធានគណបក្សសម រង្ស៊ីដែរនោះ បានថ្លែងយ៉ាងនេះនៅក្នុងពិធីជួបជុំមួយនៅទីស្នាក់ការគណបក្សសិទ្ធិមនុស្សតាមរយៈVideo Conference ដែលលោកតែងតែធ្វើជាញឹកញាប់។
ចុះផ្សាយនៅថ្ងៃ៖
ស្តាប់ - ០១:៥៤
ក្រោយពីក្រសួងមហាផ្ទៃប្រកាសទទួលស្គាល់គណបក្សសង្គ្រោះជាតិដែលលោកសម រង្ស៊ីធ្វើប្រធាននោះ ការរៀបចំជួបជុំមួយត្រូវបានរៀបចំឡើងនៅក្នុងគណបក្សសិទ្ធិមនុស្សនៅព្រឹកថ្ងៃអង្គារនេះ ដើម្បីអនុញ្ញាតអោយលោកសម រង្ស៊ីបាននិយាយមកកាន់អ្នកគាំទ្រ។ ដូចរាល់លើកអ៊ីចឹង លោកសម រង្ស៊ីបាននិយាយមកកាន់អ្នកគាំទ្រតាមរយៈ Video Conference។ នៅក្នុងឱកាសនោះហើយដែលលោកសម រង្ស៊ីបានអះអាងឡើងវិញថា លោកនឹងអាចត្រឡប់ចូលប្រទេសកម្ពុជាវិញក្នុងពេលឆាប់ៗខាងមុខ។
មូលដ្ឋាននៃក្តីសង្ឃឹមរបស់លោកសម រង្ស៊ីក្នុងការត្រឡប់ចូលក្នុងប្រទេសវិញនោះ គឺអន្តរាគមន៍របស់សហគមបរទេស ដែលមិនមែនជាចំណូលចិត្តរបស់រដ្ឋាភិបាលកម្ពុជា។
រដ្ឋាភិបាលកម្ពុជានៅតែអះអាងដដែលថា លោកសម រង្ស៊ីត្រូវអនុវត្តទោសដែលបានចូលជាស្ថាពរហើយសិន មុនអាចប្រកបសកម្មភាពនយោបាយឡើងវិញបាន។ ប៉ុន្តែនៅក្នុងសេចក្តីថ្លែងការណ៍របស់លោកនៅព្រឹកថ្ងៃអង្គារនេះ ប្រធានគណបក្សសម រង្ស៊ី និងគណបក្សសង្គ្រោះជាតិនោះបានថ្លែងថា លោកនឹងបានមកដឹកនាំការឃោសនារកសំឡេងឆ្នោតសម្រាប់ការបោះឆ្នោតនីតិកាលទី៥ ក្នុងខែកក្កដាឆ្នាំ២០១៣ក្រោយនេះទៀតផង។
នៅក្នុងសន្និសីទនាព្រឹកថ្ងៃអង្គារនេះដូចគ្នា លោកកែវ រ៉េមី រដ្ឋលេខាធិការ និងជាអនុប្រធានអង្គភាពព័ត៌មាននិងប្រតិកម្មរហ័សនៃទីស្តីការគណៈរដ្ឋមន្ត្រីបានអត្ថាធិប្បាយថា លោកសម រង្ស៊ីមិនមែនជាតំណាងគណបក្សប្រឆាំងតែមួយនៅក្នុងប្រទេសកម្ពុជានោះទេ។ លោកកែវ រ៉េមីក៏បានរិះគន់ការអំពាវនាវរបស់លោកសម រង្ស៊ីដែលស្វែងរកការគាំទ្រពីប្រជាជនខ្មែរនៅសហរដ្ឋអាមេរិកដើម្បីជំរុញអោយលោកប្រធានាធិបតីបារ៉ាក់ អូបាម៉ាប្រើប្រាស់ឥទ្ធិពលរបស់លោកមកលើកម្ពុជា។ លោកសម រង្ស៊ីចង់អោយលោកប្រធានាធិបតីអាមេរិកប្រើប្រាស់ឥទ្ធិពលនេះក្នុងការធានាអោយការបោះឆ្នោតនៅកម្ពុជានៅឆ្នាំក្រោយនេះ ប្រព្រឹតិ្តទៅដោយសេរី និងយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ