លោកសម រង្ស៊ីត្រៀមជួយរដ្ឋាភិបាលក្នុងជម្លោះព្រំដែនជាមួយថៃ
ក្រៅពីលិខិតរបស់គណបក្ស លោកសម រង្ស៊ីផ្ទាល់បានផ្ញើលិខិតមួយទៀតទៅលោក នាយករដ្ឋមន្ត្រីហ៊ុន សែន ដើម្បីបង្ហាញការគាំទ្ររបស់លោក ចំពោះវិធានការរបស់ប្រមុខរដ្ឋាភិបាល ដែលបាននាំសំណុំរឿងឈ្លានពានរបស់កងទ័ពថៃទៅអង្គការសហប្រជាជាតិ។ លោកសម រង្ស៊ី មេដឹកនាំគណបក្សជំទាស់ បានទទួលស្គាល់ថា កម្ពុជានឹងឈ្នះតាមផ្លូវច្បាប់និងតុលាការអន្តរជាតិ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុច ពីភ្នំពេញ
លោកសម រង្ស៊ីប្រធានគណបក្សសម រង្ស៊ីបានបញ្ជាក់ប្រាប់លោកនាយករដ្ឋមន្ត្រីហ៊ុន សែនថា លោកត្រៀមខ្លួនជានិច្ចជួយរដ្ឋាភិបាលកម្ពុជា ដោយមិនគិតពីនិន្នាការនយោបាយ ដើម្បីទប់ទល់ប្រឆាំងនឹងការឈ្លានពានរបស់ប្រទេសថៃ។ ជំហររបស់មេគណបក្សជំទាស់នៅកម្ពុជា ត្រូវបានបង្ហាញនៅក្នុងលិខិត៣ទំព័ររបស់លោកចុះថ្ងៃទី១១កុម្ភៈ ផ្ញើទៅលោកនាយករដ្ឋមន្ត្រីហ៊ុន សែន។
លោកសម រង្ស៊ីបានផ្តើមលិខិតរបស់លោកដោយសរសេរថា លោកគឺជាកូនខ្មែរមួយរូប ចាំបាច់លោកត្រូវខិតខំពង្រឹងការរួបរួមជាតិ ឯកភាពជាតិរួមជាមួយរដ្ឋាភិបាល ដើម្បីការពារបូរណភាពទឹកដីកម្ពុជា។ ពីទីក្រុងប៉ារីសប្រទេសបារាំង ប្រធានគណបក្សសម រង្ស៊ី ដែលកំពុងជាប់បណ្តឹងរបស់រដ្ឋាភិបាលកម្ពុជាក្នុងសំណុំរឿងព្រំដែនកម្ពុជាវៀតណាមនោះ បានថ្លែងសាទរលោកហ៊ុន សែនថា លោកហ៊ុន សែនបានប្រឹងប្រែងខ្លាំង ហើយបានចាត់វិធានការត្រឹមត្រូវនិងរហ័ស ទាំងផ្នែកយោធា និងការទូត ដើម្បីទប់ទល់ការឈ្លានពានរបស់ប្រទេសថៃ។
នៅក្នុងលិខិតនោះ លោកសម រង្ស៊ីក៏បានបរិយាយ និងធ្វើការបកស្រាយផ្នែកផ្លូវច្បាប់ និងឯកសារគតិយុត្តជាច្រើនដែលធ្វើអោយលោកសម រង្ស៊ីសន្និដ្ឋានថា កម្ពុជាត្រូវតែមានប្រៀបលើប្រទេសថៃ។
នៅក្នុងលិខិតដដែលនោះ លោកសម រង្ស៊ីមិនបានផ្តល់សារៈសំខាន់ទៅលើអាស៊ានក្នុងការដោះស្រាយជម្លោះកម្ពុជាថៃនោះទេ។ លោកសម រង្ស៊ីអះអាងថា សមាជិកសមាគមអាស៊ានមួយចំនួនមានជំហរមិនច្បាស់លាស់ ហើយថា ពួកគេមិនគាំទ្រកម្ពុជាពេញទំហឹងនោះឡើយ។
មេគណបក្សប្រឆាំងបានជំរុញអោយលោកនាយករដ្ឋមន្ត្រីហ៊ុន សែនប្តឹងមេដឹកនាំនយោបាយ និងមេដឹកនាំយោធាថៃទៅតុលាការព្រហ្មទណ្ឌអន្តរជាតិក្រុងឡាអេទៀតផង គឺប្តឹងពីបទឧក្រិដ្ឋកម្មឈ្លានពាន ឧក្រិដ្ឋកម្មសង្គ្រាម និងប្តឹងទាមទារអោយរដ្ឋាភិបាលថៃផ្តល់សំណងសម្រាប់ការខូចខាតប្រាសាទព្រះវិហារ និងជីវិតរបស់ប្រជាពលរដ្ឋខ្មែរផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ