COVID-19៖ នាយករដ្ឋមន្ដ្រីជប៉ុនរងការរិះគន់ក្រោយសម្រេចឲ្យបិទសាលារៀននៅទូទាំងប្រទេស
នៅប្រទេសជប៉ុន។ ការសម្រេចឲ្យបិទសាលារៀននៅទូទាំងប្រទេសដើម្បីបង្ការការឆ្លងមេរោគកូរ៉ូណា Covid-19 បានបង្កឲ្យមានរលកប្រតិកម្មរិះគន់យ៉ាងខ្លាំងចំពោះលោកនាយករដ្ឋមន្ដ្រី ស៊ិនហ្សូ អាបេ។ ក្នុងនោះ អាជ្ញាធរថ្នាក់តំបន់រិះគន់លោក អាបេ ដែលធ្វើសេចក្ដីសម្រេចចិត្តដោយពុំបានពិភាក្សាជាមួយខ្លួនជាមុន។ ចំណែកពលរដ្ឋទូទៅវិញ មិនពេញចិត្តចំពោះវិធានការនេះឡើយ។ ពួកគេយល់ថា ការសម្រេចរបស់លោក អាបេ មិនបានដោះស្រាយបញ្ហាទេ តែបែរជាបង្កើតបន្ទុកបន្ថែមដល់ពួកគេទៅវិញ។
ចុះផ្សាយនៅថ្ងៃ៖
ស្តាប់ - ០២:២៣
នៅពេលប្រកាសឲ្យបិទសាលារៀននៅទូទាំងប្រទេស នាយករដ្ឋមន្ដ្រីជប៉ុនពន្យល់ថា វាជាវិធានការសំខាន់ ក្នុងការការពារសន្តិសុខនិងសុខភាពរបស់សិស្សានុសិស្ស ឲ្យចៀសផុតពីការឆ្លងមេរោគកូរ៉ូណា Covid-19។ ប៉ុន្តែមតិជាច្រើននៅប្រទេសជប៉ុន ចាប់តាំងពីប្រជាពលរដ្ឋសាមញ្ញធម្មតា រហូតដល់អាជ្ញាធរក្នុងតំបន់ ពុំយល់ឃើញដូច្នេះទេ ហើយបានចេញមុខរិះគន់លោកអាបេយ៉ាងចាស់ដៃ។
អាជ្ញាធរថ្នាក់តំបន់ ដំបូងតក់ស្លុត រួចក្រោយមករិះគន់លោកអាបេ ដោយសារតែលោកអាបេ ធ្វើសេចក្ដីសម្រេចចិត្តដោយពុំបានពិភាក្សាជាមួយខ្លួនជាមុន។ ម្យ៉ាងវិញទៀត នៅក្នុងរបៀបរបបរដ្ឋបាលរបស់ជប៉ុន អ្នកដែលមានសិទ្ធិអំណាចបញ្ជាឲ្យបិទសាលារៀនបាន គឺក្រុមប្រឹក្សាខេត្តនីមួយៗ មិនមែនរដ្ឋាភិបាលកណ្ដាលទេ។ ក្នុងន័យខ្លីស្រួលស្ដាប់ អាជ្ញាធរថ្នាក់តំបន់ចោទប្រកាន់ដោយប្រយោលថា លោក អាបេ រំលោភអំណាច រំលងក្បាលពួកគេ។
ប្រតិកម្មរិះគន់មិនសប្បាយចិត្តក៏មានដែរពីសំណាក់ប្រជាពលរដ្ឋទូទៅ ដែលជាម្ដាយឪពុកនិងអាណាព្យាបាលរបស់សិស្សសាលា។ ពួកគេយល់ថា ការសម្រេចរបស់លោក អាបេ មិនបានដោះស្រាយបញ្ហាទេ តែបែរជាបង្កើតបន្ទុកបន្ថែមដល់ពួកគេទៅវិញ។ម្ដាយឪពុកមួយចំនួនត្អូញត្អែរប្រាប់សារព័ត៌មានថា ខ្លួនត្រូវបង្ខំចិត្តសុំច្បាប់ឈប់សម្រាកនៅផ្ទះដើម្បីមើលកូន នៅពេលសាលារៀនត្រូវបិទទ្វារតាមបញ្ជារបស់លោក អាបេ ចាប់ពីថ្ងៃទី០២មីនាខាងមុខតទៅ។ ត្រូវមើលកូនជារឿងមួយ ប៉ុន្តែរឿងសំខាន់មួយទៀតគឺសម្ពាធផ្នែកសេដ្ឋកិច្ចនៅពេលត្រូវសុំច្បាប់ឈប់សម្រាកពីការងារ។
ជាការកត់សម្គាល់ បើទោះបីជារងការរិះគន់ច្រើនដូច្នេះក៏ដោយ ក៏លោក ស៊ិនហ្សូ អាបេ នៅតែរក្សាបញ្ជាឲ្យបិទសាលារៀនដដែល។ លោកថា ការសម្រេចរបស់លោកដូច្នេះ ធ្វើឡើងតាមយោបល់របស់អ្នកជំនាញសុខាភិបាល ក្នុងគោលដៅទប់ស្កាត់ការរីករាតត្បាតនៃមេរោគកូរ៉ូណា។ សម្រាប់លោក ស៊ិនហ្សូ អាបេ ការទប់ស្កាត់មេរោគកូរ៉ូណា គឺជាការទទួលខុសត្រូវផ្នែកនយោបាយ ដែលរដ្ឋាភិបាលលោកត្រូវចាត់វិធានការឲ្យតឹងតែងជាទីបំផុត មិនអាចធ្វេសប្រហែសបានឡើយ។
សូមជម្រាបជូនថា ករណីកូរ៉ូណាវីរុសនៅប្រទេសជប៉ុន គិតត្រឹមថ្ងៃសុក្រទី២៨កុម្ភៈនេះ បានកើនឡើងដល់ចំនួន២១០នាក់ហើយ ចំណែកអ្នកស្លាប់មានចំនួន៥នាក់។ រដ្ឋាភិបាលជប៉ុន បានស្នើសុំឲ្យអ្នករៀបចំកម្មវិធីឬព្រឹត្តិការណ៍ធំៗដែលមានមនុស្សប្រមូលផ្ដុំច្រើន ពិចារណាលុបចោល ឬផ្អាកកម្មវិធីរបស់ខ្លួនសិន។ នៅថ្ងៃសុក្រនេះ ប្រតិបត្តិករក្រុមហ៊ុនសួនកម្សាន្ត Disneyland និង DisneySea នៅទីក្រុងតូក្យូ ដែលទាក់ទាញភ្ញៀវទេសចរបានជាង៣០លាននាក់ក្នុងមួយឆ្នាំៗ បានប្រកាសបិទសួនកម្សាន្តរបស់ខ្លួនជាបណ្ដោះអាសន្ន ចាប់ពីថ្ងៃសៅរ៍ស្អែកនេះតទៅ រហូតដល់ថ្ងៃទី១៥ខែមីនា ទើបបើកដំណើរការវិញ។ ចំណែកសួន Universal Studios Japan ដែលមានទីតាំងនៅខេត្តអូសាការបស់ជប៉ុន ក៏ប្រកាសផ្អាកដំណើរការរយៈពេលពីរសប្ដាហ៍ផងដែរ ដើម្បីចូលរួមទប់ស្កាត់ការឆ្លងរាតត្បាតនៃមេរោគកូរ៉ូណានៅក្នុងប្រទេសជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ