បណ្តាញព័ត៌មានសង្គម ជាភ្នាក់ងារមានប្រសិទ្ធភាពរបស់អ្នកនយោបាយទំនើប
ចុះផ្សាយនៅថ្ងៃ៖
ស្តាប់ - ០៦:០៣
បណ្តាញព័ត៌មានសង្គមបែបទំនើបកំពុងតែមានឥទ្ធិពលលើប្រជាពលរដ្ឋខ្មែរ កាន់តែច្រើនឡើង ពិសេសក្នុងចំណោមយុវជនជំនាន់ថ្មី។ Facebook, Twitter, Google plus, ពាក្យទាំងបីនេះជាពាក្យពេញនិយមរបស់មនុស្សជំនាន់ថ្មីនៅកម្ពុជាដែលកំពុង ចែករំលែកព័ត៌មាន អោយគ្នាទៅវិញទៅមកយ៉ាងលឿនបំផុត។ នៅកម្ពុជា នៅមានអ្នកនយោបាយតិចតួចនៅឡើយដែលបានប្រឡូក និងអាចទាញយកប្រយោជន៍ពីវិស័យបច្ចេកវិទ្យានេះ។ ពីពេលនេះទៅប្រសិនបើអ្នកនយោបាយជំនាន់ចាស់ ចង់ចាប់យកមនុស្សជំនាន់ថ្មីអ្នកនយោបាយទាំងនោះ ត្រូវលោតចូលក្នុងពិភពបណ្តាញសង្គមនេះដែលអាចជាភ្នាក់ងារដ៏មានប្រសិទ្ធភាពរបស់ខ្លួន។
មានបាតុភូត២ ដែលបានកើតឡើងជាព្រឹត្តិការណ៍ដ៏អោយចាប់អារម្មណ៍នៅក្នុងការបោះឆ្នោត នីតិកាលទី៥នេះ។ បាតុភូតទីមួយ គឺការធ្លាក់ចុះប្រជាប្រិយភាពរបស់គណបក្សប្រជាជនកម្ពុជា និងការកើនឡើងការគាំទ្ររបស់គណបក្សសង្គ្រោះជាតិ ដែលជាគណបក្សជំទាស់។ ចំណែកឯបាតុភូតទី២ ដែលគេមិនត្រូវមើលរំលងនោះ គឺសន្ទុះនៃការប្រើប្រាស់បណ្តាញសង្គមយ៉ាងខ្លាំង ពិសេសហ្វ៊េសប៊ុក។ តើអ្នកណាហ៊ានអះអាងថា បាតុភូតទីមួយ និងបាតុភូតទី២ មិនជាប់ពាក់ព័ន្ធគ្នា? តិច ឬច្រើន ការប្រើប្រាស់បណ្តាញសង្គមនេះពិតជាបានធ្វើអោយមានការប្រែប្រួលដល់ លទ្ធផលបោះឆ្នោត។
ជាការពិត វត្តមាននៃបណ្តាញសង្គមទាំងអម្បាលម៉ាន ដែលរួមមាន Facebook, Twitter, Google plusជាដើម ទើបតែផុលផុសយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះនៅ កម្ពុជា ហើយវាបានធ្លាក់មកចំពេលដែលកម្ពុជារៀបចំការបោះឆ្នោតនីតិកាលទី៥នេះ តែម្តង។ កាលពីនីតិកាលទី៤ ពោលគឺ៥ឆ្នាំមុន បណ្តាញសង្គមហ្វ៊េសប៊ុក មិនមែនជាមធ្យោបាយឃោសនារកសំឡេងឆ្នោតឡើយ។
តាមពិតទៅ បណ្តាញព័ត៌មានសង្គមគឺជាមធ្យោបាយឃោសនាយ៉ាងមានប្រសិទ្ធភាព ហើយវាទំនងក្លាយជាចលនាអរូបិយដ៏ធំធេង និងមានឥទ្ធិពលមហាសាលទៀតផង។ ចាប់តាំងពីការរយៈពេលនៃការឃោសនាបោះឆ្នោត រហូតដល់ក្រោយថ្ងៃបោះឆ្នោត គេសង្កេតឃើញថា គណបក្សសង្គ្រោះជាតិបានគ្របដណ្តប់លើសមរភូមិព័ត៌មានយ៉ាងណែន តាមរយៈទីលានបណ្តាញសង្គមហ្វ៊េសប៊ុក ទល់នឹងបណ្តាញព័ត៌មានទូរទស្សន៍ និងវិទ្យុជាច្រើនដែលមានសម្មានចិត្តទៅលើគណបក្សប្រជាជនកម្ពុជា។
ក្រៅពីក្រុមការងារបច្ចេកវិទ្យាដ៏សកម្មហើយនោះ មេដឹកនាំរបស់គណបក្សសង្គ្រោះជាតិទាំងពីរ គឺលោក សម រង្ស៊ី និងលោកកឹម សុខា អ្នកនយោបាយទាំងពីរសុទ្ធតែមានទំព័រហ្វ៊េសប៊ុកផ្ទាល់ខ្លួនដែលអាច អនុញ្ញាតអោយពួកគេប្រាស្រ័យទាក់ទងជាមួយអ្នកគាំទ្រ និងសាធារណៈជនបានយ៉ាងងាយ និងមានប្រសិទ្ធភាពទៀតផង។ ងាកមកមើលគណបក្សប្រជាជនកម្ពុជាវិញ មានតែសមាជិកជាន់ខ្ពស់មួយចំនួនតូចបំផុតដែលមានទំព័រហ្វ៊េសប៊ុក ផ្ទាល់ខ្លួន ហើយក៏មិនសូវប្រើប្រាស់ជាយុទ្ធនាការនៃការឃោសនារកសំឡេងឆ្នោតឡើយ។
គណបក្សប្រជាជនកម្ពុជាដែលជាគណបក្សកាន់អំណាចក្នុងដំណាក់កាលអន្តរកាលនេះ ក្នុងទិសដៅអនុវត្តលទ្ធិប្រជាធិបតេយ្យ មិនបានសម្រេចបិទបណ្តាញសង្គមដ៏មានឥទ្ធិពលនេះឡើយ ថ្វីដ្បិតមានការបញ្ចេញមតិហួសហេតុមួយចំនួនដែលប៉ះពាល់ដល់អង្គ ព្រះមហាក្សត្រទៀតក៏ដោយ។ ទោះយ៉ាងណាក៏ដោយ គណបក្សប្រជាជនកម្ពុជាទំនងពិតជាបានយល់ដឹងអំពីសារៈប្រយោជន៍នៃបណ្តាញ សង្គមនេះ។ នៅក្នុងកិច្ចប្រជុំដំបូងនៃគណៈរដ្ឋមន្ត្រីអណត្តិទី៥ លោកនាយករដ្ឋមន្ត្រីក៏ផ្តើមនិយាយអំពីបណ្តាញសង្គមហ្វ៊េសប៊ុកដែរ។
តាមពិតទៅ ប្រសិនបើគេប្រៀបធៀប គោលនយោបាយថ្មីរបស់លោកនាយករដ្ឋមន្ត្រីហ៊ុន សែនដែលទាក់ទងនឹងការរៀបចំវេទិកាសាធារណៈ ទៅនឹងការប្រើប្រាស់បណ្តាញសង្គមនោះ វាពិតជាមិនខុសគ្នាប៉ុន្មានឡើយ។
ក្នុងន័យនេះ ប្រសិនបើគោលដៅរបស់ប្រមុខរដ្ឋាភិបាល ចង់អោយមន្ត្រីរបស់ខ្លួនពីថ្នាក់លើដល់ថ្នាក់ក្រោមជួបពិភាក្សាជាមួយ ប្រជាពលរដ្ឋដើម្បីប្រមូលមតិ ឬសេចក្តីត្រូវការរបស់ពលរដ្ឋនោះ ការដែលមន្ត្រីទាំងនោះ ប្រឡូកក្នុងបណ្តាញសង្គមលើទីលានបច្ចេកវិទ្យានេះ វាគឺជាមធ្យោបាយនៃវេទិកាសាធារណៈមួយទៀត ក្នុងការងារដូចគ្នា។ មន្ត្រីទាំងអស់គួរតែបានយល់ហើយថា ប្រសិនបើពួកគេមានទំព័របណ្តាញសង្គមផ្ទាល់ខ្លួននោះ តាមរយៈទំព័របណ្តាញសង្គមនេះ ពួកគេពិតជាបានទទួលព័ត៌មានជាច្រើនដែលមនុស្សរាប់លាននាក់បានចែករំលែក អោយគ្នា។
តាមរយៈបណ្តាញសង្គមនេះហើយដែលពួកគេអាចធ្វើទំនាក់ទំនងដោយផ្ទាល់ជាមួយ មហាជន ឬក៏ទទួលព័ត៌មានពីមហាជនមកវិញ។ ព័ត៌មានពិត ឬមិនពិត វាគឺជារឿងមួយ ប៉ុន្តែយ៉ាងហោចណាស់ វាគឺជាដំណឹងមួយសម្រាប់មន្ត្រីរដ្ឋាភិបាល។ ដោយមិននិយាយអំពីអនក្ខរភាពលើប្រព័ន្ធបច្ចេកវិទ្យា អ្នកនយោបាយឬមន្ត្រីមួយចំនួនអាចមើលស្រាល លើបណ្តាញព័ត៌មានសង្គម ដោយចាត់ទុកថា វាជារបស់កំសាន្តសម្រាប់ក្មេង។ តាមពិត វាជាមធ្យោបាយដ៏មានប្រយោជន៍យ៉ាងខ្លាំង ប្រសិនបើគេប្រើប្រាស់ក្នុងផ្លូវល្អនោះ។
ប្រសិនបើអ្នកនយោបាយនៅកម្ពុជាចាប់ផ្តើមប្រើប្រាស់បណ្តាញព័ត៌មានសង្គម នោះ វាក៏មិនមែនជារឿងដ៏គួរអោយខ្មាស់អៀនឡើយ។ ប៉ុន្តែ វានឹងបង្ហាញអំពីភាពឆ្លាតវ័យ និងការអភិវឌ្ឍន៍ខ្លួនទៅនឹងស្ថានភាពជាក់ស្តែង ដើម្បីប្រយោជន៍នៃការងារបម្រើប្រទេសជាតិទៅវិញទេ។ គេអាចដកស្រង់ពិសោធន៍របស់អ្នកនយោបាយក្នុងពិភពលោកបាន។ លោកប្រធានាធិបតីសហរដ្ឋអាមេរិកក៏ប្រើប្រាស់បណ្តាញព័ត៌មានសង្គម មេដឹកនាំប្រទេសអ៊ីរ៉ង់ក៏មានទំព័រTwitterផ្ទាល់ខ្លួន អតីតនាយករដ្ឋមន្ត្រីថៃ លោកថាក់ស៊ីន ស៊ីណាវ៉ាត់ក៏ប្រើប្រាស់ទំព័រTwitterផ្ទាល់ខ្លួនដើម្បី ទាក់ទងជាមួយអ្នកគាំទ្រ និងមហាជនទូទៅដែរ។
ជាការពិត អ្នកនយោបាយនៅកម្ពុជាតែងប្រើប្រាស់ក្រុមការងាររបស់ខ្លួន ក្នុងការប្រមូលព័ត៌មាន។ ប៉ុន្តែ វាគ្រាន់តែជ្រុងមួយប៉ុណ្ណោះ។ ប្រសិនបើអ្នកនយោបាយមានទំព័របណ្តាញព័ត៌មានសង្គមដោយខ្លួនឯង នោះគេនឹងទទួលបានព័ត៌មានថែមមួយជ្រុងទៀតដោយផ្ទាល់ ហើយក៏អាចជាព័ត៌មានដែលសុក្រឹតជាងព័ត៌មានដែលផ្តល់ដោយជំនួយការ ឬក្រុមការងារនោះទៀតផង។
សូមកុំភ្លេចថា បណ្តាញសង្គមកំពុងតែមានប្រជាប្រិយភាពក្នុងចំណោមយុវជនជំនាន់ថ្មី។ នៅក្នុងការបោះឆ្នោតនីតិកាលទី៥នេះ ក្នុងចំណោមអ្នកបោះឆ្នោតជាង៩លាននាក់ មានយុវជនប្រមាណ៤លាននាក់ដែលគ្រប់អាយុបោះឆ្នោត។ ចាប់ពីពេលនេះទៅដល់កាលបោះឆ្នោតនីតិកាលទី៦ ពោលគឺ៥ឆ្នាំទៀត ចំនួនយុវជនគ្រប់អាយុវបោះឆ្នោតថ្មីនឹងកើនឡើងថែមទៀត។
ប៉ុន្តែ សូមកុំភ្លេចថា អនាគតអ្នកបោះឆ្នោតថ្មីទាំងនោះ ពួកគេកំពុងស្ថិតនៅលើបណ្តាញព័ត៌មានសង្គមរួចអស់ហើយ។ បូកជាមួយ មនុស្សវ័យកណ្តាល មនុស្សចាស់ និងមនុស្សគ្រប់មជ្ឈដ្ឋាន ដែលកំពុងឡើងទៅកាន់ពិភពបណ្តាញសង្គមជារៀងរាល់ថ្ងៃនោះ អ្នកនយោបាយគ្មានជំរើសអ្វីក្រៅតែពីរត់តាមចាប់អ្នកម្ចាស់ឆ្នោតទាំង នោះឡើយ នៅលើទីលានបណ្តាញសង្គម ដែលគេអាចធ្វើទំនាក់ទំនងដោយផ្ទាល់ជាមួយគ្នាទៅវិញទៅមកនោះ។ ពេលនោះហើយដែល បណ្តាញសង្គមនឹងក្លាយទៅជាភ្នាក់ងារដ៏មានប្រសិទ្ធភាពរបស់អ្នកនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ