ស៊ន សៀវម៉ី នឹងបរិច្ឆាគប្រាក់៤០ភាគរយទៅលើសកម្មភាពមនុស្សធម៌
កីឡាការិនីតេក្វាន់ដូ ម្ចាស់មេដាយមាសអាស៊ី ស៊ន សៀវម៉ី បាប្រកាសនៅថ្ងៃនេះថា នឹងបង្កើតមូលនិធិផ្ទាល់ខ្លួនមួយ នៅពេលខាងមុខនេះ។ ហើយមូលនិធិដែលទទួលបាន កញ្ញាវ័យ១៩ឆ្នាំរូបនេះ នឹងកាត់៤០ភាគរយ ទៅលើសកម្មភាពមនុស្សធម៌។ ក្នុងនោះ ២០ភាគរយនឹងផ្តល់ទៅ មន្ទីរពេទ្យគន្ធបុប្ឆា និង២០ភាគរយផ្តល់ទៅកាកបាទក្រហមកម្ពុជា។ ការបង្កើតមូលនិធិ បានធ្វើឡើង ខណៈដែលកីឡាការិនីរូបនេះ កំពុងទទួលបានការឧបត្ថម្ភពីសម្បុរសជនជាបន្តបន្ទាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
គិតមកត្រឹមព្រឹកថ្ងៃចន្ទទី០៦តុលានេះ កីឡាការិនី ស៊ន សៀវម៉ី ម្ចាស់មេដាយមាសអាស៊ីលើកទី១៧នៅទីក្រុងអ៊ីនឈុនប្រទេសកូរ៉េខាងត្បូង បានទទួលប្រាក់ឧបត្ថម្ភពីសម្បុរសជនខ្មែរ ក្រុមហ៊ុនឯកជន រួមទាំងទឹកប្រាក់ផ្ទាល់របស់លោកនាយករដ្ឋមន្ត្រី ហ៊ុន សែន និងរដ្ឋាភិបាលកម្ពុជា មិនក្រោម៦ម៉ឺនដុល្លាសហរដ្ឋអាមេរិកនោះទេ។ ហើយទឹកប្រាក់ជាច្រើនទៀត នឹងត្រូវប្រកាសជាបន្តបន្ទាប់។
នៅក្នុងសន្និសីទកាសែតនៅឯគណៈកម្មាធិការជាតិអូឡាំពិកកម្ពុជាកាលពីព្រឹកថ្ងៃចន្ទនេះ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រកាសពីឈ្មោះរបស់សប្បុរសជនជាបន្តបន្ទាប់ដែលចូលរួមឧបត្ថម្ភដល់កីឡាការិនីតេក្វាន់ដូទំងន់៧៣គីឡូក្រាមនេះ។
ជាមួយនឹងការមកដល់មាតុប្រទេសវិញ របស់ កីឡាការិនី ស៊ន សៀម៉ី ម្ចាស់មេដាយមាស ASIAN Games លើកទី១៧នៅ Incheon ប្រទេសកូរ៉េខាងត្បូង នៅវេលាម៉ោង១០ និង ១០នាទីយប់ម៉ីញនេះ ស៊ន សៀវម៉ី ត្រូវបានលោកនាយករដ្ឋមន្ត្រី ហ៊ុន សែន រង់ចាំទទួលស្វាគមន៍នៅវិមានសន្តិភាពវេលាម៉ោង១១យប់ថ្ងៃទី៥ តុលា។
ជាមួយនឹងការស្វាគមន៍ដ៍រំជួលចិត្តនេះ លោកនាយករដ្ឋមន្ត្រី ហ៊ុន សែន ក៍បានប្រកាស ឧបត្តម្ភ នូវប្រាក់ មួយម៉ឺន ដុល្លារ បន្ថែម លើប្រាក់ របស់រដ្ឋាភិបាល ២ម៉ឺនដុល្លារ និង មានជាសម្ភារៈ Laptop apple ១គ្រឿង Ipad apple ១គ្រឿង ម៉ូតូ១គ្រឿង បន្ទាប់ពី ម្ចាស់ មេដាយម្នាក់ នេះធ្វើអោយ ប្រទេសកម្ពុជា ទាំងមូលល្បី ឈ្មោះនៅ លើពិភពលោក។
មិនត្រឹមតែប៉ុណ្ណោះ ប្រមុខ រដ្ឋាភិបាលកម្ពុជាបានប្រកាសសេចក្តីសម្រេចរបស់រដ្ឋមន្ត្រីក្រសួង អប់រំដែលអនុញ្ញាតឲ្យ កីឡាការិនី ស៊ន សៀវម៉ី ជាប់សញ្ញាបត្របាក់ឌុបដោយស្វ័យប្រវត្តិ និង ផ្តល់អាហារូបករណ៍ដល់សៀវម៉ី នូវការសិក្សានៅមហាវិទ្យាល័យណាមួយដែលសៀវម៉ីចង់សិក្សាផងដែរ។
នៅក្នុងពិធីជួបសំណេះសំណាលជាមួយនឹងប្រតិភូកីឡានៅវិមានសន្តិភាពកាលពីយប់ម្សិលមិញនេះ លោក ហ៊ុន សែន បានចាត់ទុកថា៖ កីឡាការិនី តេក្វាន់ដូ រូបនេះ ជាវីរនារីរបស់ជាតិ ដែលដណ្តើមបានមេដាយមាសពីព្រឹត្តិការណ៍កីឡា Asian Games ទី១ បើគិតចាប់តាំងពីការចូលរួមរបស់កម្ពុជា កាលពីឆ្នាំ១៩៥៤មក ហើយជ័យជម្នះនេះ គឺជាកិត្តិយស និងជាមោទនភាពជាតិដ៏ធំធេងរបស់កម្ពុជា»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ