ឆាដដកសិទ្ធិរុករកប្រេងពីក្រុមហ៊ុនចិន ដើម្បីសង្គ្រោះបរិស្ថាន
អាជ្ញាធរប្រទេសឆាដ បានសម្រេចដកអាជ្ញាប័ណ្ណរុករកប្រេង ពីក្រុមហ៊ុនរដ្ឋចិន(CNPC) ទាំងអស់ និងព្រមានដាក់ពាក្យបណ្តឹងទៅតុលាការពាណិជ្ជកម្មអន្តរជាតិទៀត។ សម្រាប់ឆាដ សេចក្តីសម្រេចចិត្តនេះ ធ្វើឡើងបន្ទាប់ពីសម្គាល់ឃើញថា ក្រុមហ៊ុនសាធារណៈចិន បានរំលោភជាស្វ័យប្រវត្តិច្បាប់បរិស្ថាន។
ចុះផ្សាយនៅថ្ងៃ៖
ស្តាប់ - ០១:៥១
រដ្ឋាភិបាលឆាដ បានចេញក្រិត្យដកអាជ្ញាប័ណ្ណ ចំនួន៥ពីក្រុមហ៊ុនចិន ដើម្បីបញ្ចៀសការបំផ្លិចបំផ្លាញបរិស្ថាន មិនមែនដោយហេតុត្រូវការរកស៊ីជាមួយក្រុមហ៊ុនផ្សេងទេ ! មជ្ឈមណ្ឌលរុករកប្រេងជាង១០កន្លែង បានរងគ្រោះយ៉ាងខ្លាំងផ្នែកបរិស្ថាន តាមរយៈការចាក់ចោលកាកសំណល់ពុល ក្រុមហ៊ុនតែជ្រើសរើសជាស្វ័យប្រវត្តិ និងគ្មានពិចារណា ប្រើវិធីសាស្ត្រអាក្រក់មិនអាចទទួលយកសម្រាប់បរិស្ថាន។ នេះជាការគូសបញ្ជាក់របស់រដ្ឋមន្ត្រីក្រសួងថាមពលប្រេងឆាដ តាមរយៈសន្និសីទនៅល្ងាចមិញ។
តាំងពីខែឧសភាកន្លងមក ឆាដបានចេញបញ្ជាទៅកាន់ក្រុមហ៊ុនចិនឱ្យព្យួរសកម្មភាពរុករកប្រេង ដោយមូលហេតុបរិស្ថាននេះដូចគ្នា និងបានទាមទារពីក្រុមហ៊ុនចិននូវសំណងចំនួន១២០០លានដុល្លារសហរដ្ឋអាមេរិក ចំពោះការខូចខាត និងការល្មើសមិនគោរពសន្យាបរិស្ថាន។ ការចរចាដោះស្រាយវិបត្តិតាមសម្រួលរវាងគ្នា មិនបានសម្រេច ដូច្នេះហើយបានជារដ្ឋាភិបាលឆាដគ្រោងនឹងដាក់ពាក្យបណ្តឹងទៅកាន់តុលាការពាណិជ្ជកម្មអន្តរជាតិ ចំពោះសកម្មភាពរំលោភច្បាប់បិរស្ថាន និងការបដិសេធពុំព្រមបង់ពិន័យ។ ពាក្យបណ្តឹងទីពីរបានដាក់រួចហើយទៅសាលាដំបូង ក្រុងNdjamena ប្រឆាំងនឹងការបំផ្លាញបរិស្ថាន និងការបង្កគ្រោះថ្នាក់ជីវិតអ្នកដទៃ។ អ្នកទទួលខុសត្រូវក្រុមហ៊ុនប្រេងចិនទាំងអស់ ត្រូវជាប់ពាក់ព័ន្ធក្នុងបណ្តឹងនេះ និងត្រូវហាមឃាត់មិនឱ្យចាកចេញពីទឹកដីឆាដទេ។
នេះមិនមែនជាលើកដំបូងទេដែល ក្រុមហ៊ុនប្រេងចិនមានវិវាទអាជ្ញាធរឆាដ។ កាលពីខែមីនា សហជីពបុគ្គលិកឆាដក្នុងក្រុមហ៊ុនចិន បាននាំគ្នាបាតុកម្មទាមទារដំឡងប្រាក់ខែ និងសម្រួលលក្ខខណ្ឌការងារ។ ឆាដចាប់ផ្តើមធ្វើផលិតកម្មប្រេងនៅឆ្នាំ២០០៣ ជាមួយនឹងសមត្ថភាពផលិត ១២០០០០ធុងបារីលក្នុងមួយថ្ងៃ។ ចំណូលបានមកពីការបូមប្រេង ត្រូវបានប្រើប្រាស់សម្រាប់ធ្វើទំនើបកម្មវិស័យយោធា ប្រព័ន្ធផ្លូវថ្នល់ និងស្ថាបនាអាគារសាធារណៈ។ ប៉ុន្តែសង្គមស៊ីវិលចង់ឱ្យអាជ្ញាធរគិតគូរពីលក្ខខណ្ឌរស់នៅរបស់ពលរដ្ឋឱ្យប្រសើរជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ