ប៉ូលិសបំបែកបណ្តាញពេស្យាចារថៃខុសច្បាប់នៅស្វ៊ីស
មន្រ្តីប៉ូលិសស្វ៊ីសបានឲ្យដឹង កាលពីថ្ងៃពុធម្សិលមិញនេះថា គេបានបំបែកខ្សែបណ្តាញដ៏ធំមួយ ដែលនាំមនុស្សពីថៃ មកបង្ខំឲ្យរកស៊ីផ្លូវភេទ នៅតាមក្រុងមួយចំនួន ក្នុងប្រទេសស្វ៊ីស។ នៅក្នុងការស៊ើបអង្កេតនេះ ប៉ូលិសស្វ៊ីសបានឃុំខ្លួនជនជាប់សង្ស័យចំនួន ៧នាក់ ក្នុងនោះ មានជនជាតិថៃ ៦នាក់ ដែលមានម្នាក់ជាមេខ្លោង និងជនជាតិស្វ៊ីសម្នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
យោងតាមសេចក្តីប្រកាសព័ត៌មានរបស់ប៉ូលិសស្វ៊ីស ការស៊ើបអង្កេតលើបណ្តាញពេស្យាចារថៃនេះបានចាប់ផ្តើមឡើង កាលពីឆ្នាំទៅមិញ ក្រោយពីមានបណ្តឹងពីស្រ្តីថៃម្នាក់ ដែលបានអះអាងថា ជាជនរងគ្រោះ ដោយត្រូវគេចាប់ឃុំឃាំងបង្ខំឲ្យរកស៊ីផ្លូវភេទ នៅក្នុងផ្ទះបនមួយ ក្នុងទីក្រុងប៊ែន (Berne)។
ការស៊ើបអង្កេតនេះបានឈានដល់ការវែកមុខជនសង្ស័យដ៏សំខាន់ម្នាក់ គឺជាស្រ្តី វ័យជាង ៤០ឆ្នាំ ជាជនជាតិថៃ រស់នៅដោយស្របច្បាប់ ក្នុងប្រទេសស្វ៊ីស។ ជនសង្ស័យនេះត្រូវបានចាប់ខ្លួន កាលពីចុងឆ្នាំ២០១១ នៅក្នុងប្រទេសអាល្លឺម៉ង់ រួចហើយត្រូវបានបញ្ជូនមកឲ្យប៉ូលិសស្វ៊ីស ដើម្បីបន្តការស៊ើបអង្កេត។
នៅទីបំផុតប៉ូលិសបានរកឃើញថា ស្រ្តីថៃរូបនេះ គឺជាមេខ្លោង ដែលបានចាប់ផ្តើមបង្កើតរបររកស៊ីផ្លូវភេទដោយខុសច្បាប់នេះ ចាប់តាំងពីចុងឆ្នាំ២០០៨ម៉្លេះ ហើយការចាប់បង្ខំមនុស្សឲ្យរកស៊ីផ្លូវភេទនេះ មិនមែនមានតែមួយកន្លែងទេ ប៉ុន្តែ គឺជាខ្សែបណ្តាញដ៏ធំមួយ ដែលមានផ្ទះបន នៅតាមក្រុងធំៗមួយចំនួនរបស់ស្វ៊ីស។
ជនរងគ្រោះវិញ មានយ៉ាងតិច ៥៧នាក់ ភាគច្រើន គឺមកពីតំបន់ក្រីក្រ ក្នុងប្រទេសថៃ។ ប៉ូលិសបានឲ្យដឹងថា នៅពេលចេញពីប្រទេសថៃ មកប្រទេសស្វ៊ីស ជនរងគ្រោះទាំងនេះដឹងថា នឹងត្រូវមករកស៊ីផ្លូវភេទ ដោយត្រូវរកប្រាក់ចំណូលឲ្យមេបណ្តាញពេស្យាចារ ឲ្យបានគ្រប់ចំនួនដែលបានកំណត់ ជាថ្នូរនឹងការរត់ការឲ្យបានមកប្រទេសស្វ៊ីស។ អ្នកខ្លះបានដាក់ដី ឬផ្ទះ នៅក្នុងប្រទេសថៃ ជាទ្រព្យបញ្ចាំ។ ដោយសារតែប្រាក់ចំណូល ដែលត្រូវរកសងទៅមេខ្លោងនេះមានកម្រិតខ្ពស់ពេក គឺប្រមាណពី ៥ម៉ឺន ទៅ ៧ម៉ឺន ៥ពាន់អឺរ៉ូ ក្នុងម្នាក់ៗ ពួកគេមិនអាចរកបានគ្រប់ចំនួន ទើបមិនអាចដោះខ្លួនរួច ហើយត្រូវក្លាយជាទាសករផ្លូវភេទ។
គួរបញ្ជាក់ថា ចាប់តាំងពីឆ្នាំ១៩៩២មក ច្បាប់ស្វ៊ីសអនុញ្ញាតឲ្យមានរបររកស៊ីផ្លូវភេទ ប៉ុន្តែ អ្នករកស៊ីផ្លូវភេទនេះ ត្រូវតែធ្វើឡើងដោយស្ម័គ្រចិត្ត គ្មានការបង្ខិតបង្ខំ។
ក្រៅពីស្រ្តីជាមេខ្លោង ប៉ូលិសស្វ៊ីសបានឃុំខ្លួនជនសង្ស័យចំនួន ៦នាក់ផ្សេងទៀត ក្នុងនោះ មានជនជាតិថៃ ៥នាក់ និងជនជាតិស្វ៊ីសម្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ