ទាហានបង្រ្កាបបាតុកម្មអាវក្រហម របួសជាង១៣០នាក់
នៅថ្ងៃសៅរ៍នេះ ទាហានថៃបានចាប់ផ្តើមយុទ្ធនាការបង្រ្កាបបាតុកម្មពួកអាវក្រហម។ ទាហានរាប់ពាន់នាក់ត្រូវបានគេបញ្ជូនទៅព័ទ្ធទីតាំងធំរបស់ពួក អាវក្រហម។ ការប៉ះទង្គិចគ្នាបានកើតមានឡើង នៅជុំវិញនោះ បណ្តាលឲ្យមនុស្សជាង ១៣០នាក់រងរបួស។ ក៏ប៉ុន្តែ កម្លាំងរដ្ឋាភិបាលនៅតែមិនអាចបំបែកពួកអាវក្រហមបាន។
ចុះផ្សាយនៅថ្ងៃ៖ កែប្រែថ្ងៃទី៖
កម្លាំងរដ្ឋាភិបាលថៃ មានទាំងប៉ូលិស និងទាហាន បានចាប់ផ្តើមប្រើកម្លាំងបង្រ្កាបបាតុកម្មរបស់ពួកអាវក្រហម។ យោងតាមអ្នកនាំពាក្យកងទ័ពថៃ បញ្ជាឲ្យបើកការបង្រ្កាប គឺចេញដោយលោកស៊ុទេព។ គេគ្រោងនឹងដណ្តើមកាន់កាប់ទីតាំងធំរបស់ពួកអាវក្រហម នៅស្ពានផានហ្វា ឲ្យបានមុនយប់នេះ។
ក៏ប៉ុន្តែ ពួកទាហានមិនបានចូលទៅបង្រ្កាបដល់សម្បុករបស់ពួកអាវក្រហមនោះទេ។ ការបង្រ្កាបបានធ្វើឡើងតែនៅជុំវិញតំបន់ស្ពានផានហ្វាតែប៉ុណ្ណោះ។ ដោយពួកអាវក្រហមមិនចុះញ៉ម កងកម្លាំងរដ្ឋាភិបាល ក៏ស្រាប់តែបានដកថយវិញ។
នៅថ្ងៃនេះ ការប្រឈមមុខគ្នាបានកើតមានឡើងខ្លាំង នៅជិតទីស្នាក់ការអង្គការសហប្រជាជាតិ ដោយពួកអាវក្រហមបានធ្វើការវាយតបតទៅលើកម្លាំងរដ្ឋាភិបាលវិញ ដោយប្រើដុំថ្ម និងដំបង។ ខាងកងកម្លាំងរដ្ឋាភិបាលបានប្រើឧស្ម័នបង្ហូរទឹកភ្នែក និងកាណុងបាញ់ទឹក បាញ់ទៅលើបាតុករ។
យោង តាមទីភ្នាក់ងារអា.អែហ្វ.ប៉េ (AFP) ខាងទាហានថៃក៏បានបាញ់បង្ហើរពីលើក្បាលពួកបាតុករដែរ។ ប៉ុន្តែ ទីភ្នាក់ងាររ៉យទ័រ (Reuters) វិញ បានរាយការណ៍ថា ទាហានហាក់ដូចជាបាញ់តម្រង់ទៅពួកបាតុករតែម្តង គ្រាន់តែមិនដឹងថា ជាគ្រាប់កាំភ្លើងជ័រ ឬគ្រាប់មែនទែន។
អ្នកកាសែតថៃម្នាក់ ដែលនៅកន្លែងកើតហេតុបានរាយការណ៍ថា គេឃើញមានគ្រាប់កាំភ្លើងមែនទែនបាញ់ត្រូវឡាន ក៏ប៉ុន្តែ មិនដឹងជាខាងណាជាអ្នកបាញ់។
អ្នកនាំពាក្យកងទ័ពថៃបានបដិសេធថា ទាហានមិនបានប្រើគ្រាប់កាំភ្លើងមែនទែនបាញ់ទៅលើបាតុករនោះទេ គឺប្រើតែគ្រាប់កាំភ្លើងជ័រតែប៉ុណ្ណោះ ឯគ្រាប់កាំភ្លើងមែនទែន គឺបាញ់ឡើងលើតែប៉ុណ្ណោះ។ អ្នកនាំពាក្យកងទ័ពបានអះអាងទៀតថា ខាងទាហានទៅវិញទេ ដែលមានរបួស ២នាក់ ដោយគ្រាប់កាំភ្លើងមែនទែន។
យោងតាមទីភ្នាក់ងារអា.អែហ្វ.ប៉េ ការបង្រ្កាបបាតុកម្ម នៅថ្ងៃសៅរ៍នេះ បានបណ្តាលឲ្យមានអ្នករបួសជាង ១៣០នាក់។
នៅពេលដែល រដ្ឋាភិបាលធ្វើការបង្រ្កាបបាតុកម្ម នៅបាងកក នៅខេត្តឈៀងម៉ៃឯណោះវិញ ពួកអាវក្រហមរាប់រយនាក់បាននាំគ្នាសម្រុកចូលកាន់កាប់សាលាខេត្ត។ មេដឹកនាំអាវក្រហមក៏បានគំរាមផងដែរថា ពួកគេនឹងចូលកាន់កាប់សាលាខេត្តផ្សេងទៀត ប្រសិនបើរដ្ឋាភិបាលបន្តប្រើកម្លាំងបង្រ្កាបពួកគេ។
គួរ បញ្ជាក់ថា កាលពីយប់ថ្ងៃសុក្រ លោកអាភិស៊ីតបានបញ្ជាឲ្យកម្លាំងរដ្ឋាភិបាល ទាំងប៉ូលិស និងទាហាន ចាប់ប្រើធម៌ក្តៅ ក្រោយពីពួកអាវក្រហមបានសម្រុកចូលកាន់កាប់ក្រុមហ៊ុនផ្កាយរណប ដើម្បីបង្ខំឲ្យបើកការផ្សាយទូរទស្សន៍របស់ពួកគេឡើងវិញ។
លោក អាភិស៊ីតក៏បានសម្តែងការមិនពេញចិត្តផងដែរចំពោះពួកកងទ័ព ដែលបានដកថយ បណ្តោយឲ្យពួកអាវក្រហមចូលកាន់កាប់ក្រុមហ៊ុនផ្កាយរណបនេះ។ ភ្លាមៗ លោកបានបញ្ជាឲ្យទាហានចូលកាន់កាប់ក្រុមហ៊ុននេះវិញ ហើយបានបិទការផ្សាយទូរទស្សន៍របស់ពួកអាវក្រហមសាជាថ្មីម្តងទៀត។
នៅយប់ ថ្ងៃសុក្រនោះ ទូរទស្សន៍ថៃបានចាក់ផ្សាយនូវរូបភាព ដែលបង្ហាញពីពួកអាវក្រហមកំពុងហុចទឹកទៅឲ្យទាហានថៃ ហើយទាហានថៃបានទទួលយក ទាំងទឹកមុខញញឹមរាក់ទាក់។ លោកអាភិស៊ីត បានធ្វើការស្តីបន្ទោស ជាសាធារណៈ ចំពោះទង្វើរបស់ទាហានទាំងនោះ។
នៅថៃ គេចាប់ផ្តើមនាំគ្នានិយាយាថា នៅក្នុងចំណោមកងទ័ពថៃ មានទាហានខ្លះជា “ទាហានឪឡឹក” គឺមានន័យថា ពួកគេបៃតងតែឯកសណ្ឋាន ចំណែកខាងក្នុងវិញ គឺក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ