ថៃប្រារព្ធព្រះរាជពិធីថ្វាយព្រះភ្លើងព្រះចៅភូមិបុលយ៉ាងមហោឡារិក
តាំងពីព្រឹកព្រលឹមថ្ងៃព្រហស្បតិ៍នេះ ប្រជារាស្ត្រថៃគ្រងដោយសម្លៀកបំពាក់ពណ៌ខ្មៅរាប់ម៉ឺននាក់ បានប្រមូលផ្ដុំគ្នាជុំវិញព្រះបរមរាជវាំងថៃ ដើម្បីជូនដំណើរព្រះចៅភូមិបុលជាចុងក្រោយ ទៅកាន់ព្រះមេរុថ្វាយព្រះភ្លើង។ ព្រះរាជពិធីថ្វាយព្រះភ្លើងសពព្រះចៅភូមិបុល នឹងត្រូវប្រារព្ធធ្វើនៅយប់ថ្ងៃព្រហស្បតិ៍នេះ ដោយព្រះមហាក្សត្រថ្មីរបស់ថៃ គឺព្រះបាទ មហាវិច្ឆរ៉ាឡុងកន ក្រោមក្ដីអាឡោះអាល័យរបស់ប្រជារាស្ត្រថៃទាំងអស់។
ចុះផ្សាយនៅថ្ងៃ៖
ស្តាប់ - ០២:០២
បន្ទាប់ពីកាន់ទុក្ខអស់រយៈពេលជាងមួយឆ្នាំ នៅទីបំផុត ដល់ពេលហើយដែលថៃត្រូវប្រារព្ធពិធីថ្វាយព្រះភ្លើង បូជាព្រះសពព្រះបាទ ភូមិបុល អាប់ឌុល យ៉ាដេត ដែលបានយាងចូលទិវង្គតកាលពីថ្ងៃទី១៣តុលាឆ្នាំ២០១៦។ ព្រះរាជពិធីដ៏មហាឡារិកនេះ ត្រូវបានផ្សាយបន្តផ្ទាល់តាមទូរទស្សន៍គ្រប់ប៉ុស្តិ៍នៅប្រទេសថៃ និងតាមបណ្ដាញសង្គមរបស់សារព័ត៌មានអន្ដរជាតិមួយចំនួនផង។
ប្រារព្ធធ្វើឡើងតាមទំនៀមទម្លាប់ពីបុរាណ ព្រះរាជពិធី ដែលចាប់ផ្ដើមតាំងពីព្រឹកព្រលឹមនេះ មានការចូលរួមពីប្រជារាស្ត្រថៃមិនតិចជាង២៥ម៉ឺននាក់ទេ។ ពលរដ្ឋថៃទាំងនេះ ខ្លះបានទៅរង់ចាំមួយឬពីរយប់មុន នៅជាប់របងព្រះបរមរាជវាំង ដើម្បីមានឱកាសថ្វាយការគោរពចំពោះព្រះបាទ ភូមិបុល អាប់ឌុល យ៉ាដេត ជាលើកចុងក្រោយ។ ដៃកាន់រូបថតស្ដេចថៃរជ្ជកាលទី៩ ទឹកមុខសោកសង្រេង ខ្លះមានទឹកភ្នែកជោគថ្ពាល់ ពលរដ្ឋថៃដែលគ្រងដោយសម្លៀកបំពាក់ពណ៌ខ្មៅសុទ្ធបានឱនក្រាបថ្វាយបង្គំ នៅពេលក្បួនដង្ហែព្រះសុវណ្ណកោដ្ឋរំកិលមកដល់មុខខ្លួន។
ព្រះសុវណ្ណកោដ្ឋនៃព្រះចៅ ភូមិបុល ត្រូវបានដង្ហែចេញពីព្រះបរមរាជវាំង តាមតម្រាយផ្លូវជុំវិញព្រះបរមរាជវាំង មុននឹងយកទៅតម្កល់នៅព្រះមេរុកម្ពស់៥០ម៉ែត្រ តំណាងឲ្យភ្នំព្រះសុមេរុ ដែលនៅក្នុងព្រហ្មញ្ញសាសនា គេជឿថាជាឋានត្រៃត្រិង្ស ជាចំណុចកណ្ដាលនៃសាកលលោក។
ចំណែកព្រះរាជពិធីថ្វាយព្រះភ្លើងសពព្រះចៅភូមិបុល នឹងត្រូវប្រារព្ធធ្វើនៅម៉ោង១០យប់ថ្ងៃព្រហស្បតិ៍នេះ ដោយព្រះមហាក្សត្រថ្មីរបស់ថៃ គឺព្រះបាទ មហាវិច្ឆរ៉ាឡុងកន ជាអ្នកព្រះរាជទានព្រះភ្លើង។ ក្រៅពីនោះ ក៏មានការចូលរួមពីសែរាជវង្ស និងថ្នាក់ដឹកនាំសំខាន់ៗមកពីជាង៤០ប្រទេសផងដែរ។
ប្រទេសថៃ បានចំណាយថវិកាជាង៩០លានដុល្លារ ដើម្បីកសាងព្រះមេរុ និងរៀបចំព្រះរាជពិធីថ្វាយព្រះភ្លើងដល់ព្រះចៅ ភូមិបុល ដើម្បីឲ្យសក្តិសមទៅនឹងព្រះកិត្តិយស និងព្រះរាជបូជនីយកិច្ចរបស់ក្សត្រអង្គនេះសម្រាប់ប្រទេសថៃ អស់រយៈពេល៧ទសវត្សនៃការសោយរាជ្យរបស់ទ្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ