ព្យុងយ៉ាងបរិហារការភាពយន្តហូលីវ៉ូតនិយាយពី លោក គីមជុងអ៊ុន
ភាពយន្តហូលីវ៉ូត បែបកំប្លែង ស្តីពី ប្រមុខដឹកនាំកូរ៉េខាងជើង គីមជុងអ៊ុន មិនបានធ្វើឱ្យរបបកុម្មុយនិស្តសើចសប្បាយទេ ! សម្រាប់ព្យុងយ៉ាង ភាពយន្តដែលមានលក្ខណៈបន្តុះបង្អាប់មេដឹកនាំ គឺជាសកម្មភាពភេរវនិយម និងបានព្រមាន ធ្វើការសងសឹក ដោយមិនអាសូរ នៅថ្ងៃខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
រឿង “The Interview” ជាស្នាដៃរបស់សមិទ្ធិករអាមេរិកពីររូប Seth Rogen និង James Franco ដែលរៀបរាប់អំពីសកម្មភាពរបស់ភ្នាក់ងារស៊ើបការណ៍សម្ងាត់អាមេរិក សេអ៊ីអា ប្លែងខ្លួនជាអ្នកកាសែតរបស់ទូរទស្សន៍មួយ មានភារៈទៅធ្វើឃាតលោក គីម ដោយមានតួសម្តែងជាជនជាតិអាមេរិកដើមកំណើតកូរ៉េ។ សមិទ្ធិកររូបនេះ មានគំនិតផលិតជារឿងចេញឡើង បន្ទាប់ពីបានទទួលការអនុញ្ញាតឱ្យបទសម្ភាសន៍ជាមួយលោកប្រមុខដឹកនាំកូរ៉េខាងជើង គីមជុងអ៊ុន នៅទីក្រុងព្យុងយ៉ាង។
ភាពយន្តនោះបានថតនៅក្រុង Vancouver ប្រទេសកាណាដា នឹងត្រូវចេញបញ្ចាំងនៅថ្ងៃទី ១៤តុលា ឆ្នាំ២០១៤ នៅសហរដ្ឋអាមេរិក។ ប៉ុន្តែតាមរយៈសេចក្តីថ្លែងការណ៍មួយចេញផ្សាយនៅថ្ងៃពុធនេះ ដោយភ្នាក់ងារព័ត៌មានផ្លូវការកូរ៉េខាងជើង KCNA អ្នកនាំពាក្យក្រសួងការពារជាតិកូរ៉េខាងជើង បានចាត់ទុកសមិទ្ធិករអាមេរិកទាំងពីររូបថា មេបងធំ Gangsters និងទាមទារឱ្យរដ្ឋាភិបាលអាមេរិកដាក់បម្រាបហាមឃាត់ការចេញផ្សាយរឿងនេះ។
សម្រាប់ព្យុងយ៉ាង ការផលិតនិងការចាក់បញ្ចាំងរឿង The Interview គឺជាការបង្ហាញសកម្មភាពភេរវកម្មប្រឆាំងនឹងប្រមុខដឹកនាំរបបកុម្មុយនិស្តកូរ៉េខាងជើង ជាសកម្មភាពភេរវនិយម និងជាសកម្មភាពសង្គ្រាមដែលមិនអាចអនុគ្រោះឱ្យបានឡើយ។ ដូច្នេះប្រសិនបើគ្មានការហាមឃាត់ទេ នោះនឹងមានការសងសឹកដ៏គ្មានអាសូរមួយកើតឡើង។
នៅក្នុងការផ្សាយពាណិជ្ជកម្មឃោសនារឿង The interview គេឃើញភ្នាក់ងារសេអ៊ីអា ប្រដូចកូរ៉េខាងជើង ក្នុងចំណាត់ប្រទេសដែលគ្រោះថ្នាក់ជាងគេបំផុត។ កាលពីឆ្នាំ២០០៤ ក្រុមហ៊ុនហូលីវ៉ូតធា្លប់បានផលិតកុនបង្អាប់របបព្យុងយ៉ាងដែរ ដោយកាលណោះ គឺជាការប្រៀបប្រដូចលោក គីមជុងអ៊ីលជាឪពុក ថាមេដឹកនាំឯកាលាក់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ