ការដ្ឋានស្ពានអាកាសទី៣នៅទីក្រុងភ្នំពេញនឹងបើកសម្ពោធនៅថ្ងៃស្អែក
រដ្ឋាភិបាលកម្ពុជានឹងប្រកាសបើកសម្ពោធការដ្ឋានសាងសង់ស្ពានអាកាសទីបីនៅត្រង់ចំណុចស្ទឹងមានជ័យនៅព្រឹកថ្ងៃចន្ទស្អែកនេះ។ នេះគឺជាការស្ថាបនាស្ពានអាកាសទីបីនៅទីក្រុងភ្នំពេញបន្ទាប់ពីស្ពានអាកាសក្បាលថ្នល់ និងស្ពានអាកាសពេទ្យលោកសង្ឃ។
ចុះផ្សាយនៅថ្ងៃ៖
ស្តាប់ - ០១:៥៥
បញ្ហាកកស្ទះចរាចរណ៍បានក្លាយទៅជារឿងឈឺក្បាលរបស់អ្នកធ្វើដំណើរជារៀងរាល់ថ្ងៃ។
ប្រភពពីសាលារាជធានីភ្នំពេញបានអោយដឹងថា នាពេលបច្ចុប្បន្ននេះ ទីក្រុងភ្នំពេញមានប្រជាជនរស់នៅជាង២លាននាក់។ទីក្រុងភ្នំពេញមានម៉ូតូជាង១លានគ្រឿងនិងមានរថយន្តជាង២សែនគ្រឿងបាននិងកំពុងធ្វើចរាចរណ៍។ បើយោងតាមការប៉ាន់ស្មាននានា ជារៀងរាល់ឆ្នាំ ទីក្រុងភ្នំពេញត្រូវការលំនៅដ្ឋានថ្មីប្រមាណ១ម៉ឺនខ្នង។
ដើម្បីដោះស្រាយបញ្ហាកកស្ទះចរាចរណ៍ និងដើម្បីឆ្លើយតបទៅនឹងកំណើនប្រជាជន និងយានយន្តធ្វើដំណើរយ៉ាងឆាប់រហ័សនោះ ទីក្រុងភ្នំពេញត្រូវបានគេពង្រីកពី៣៧៨គីឡូម៉ែត្រក្រឡាទៅដល់៦៧៨គីឡូម៉ែត្រក្រឡា។ មិនត្រឹមតែប៉ុណ្ណោះ ស្ពានអាកាសជាច្រើនត្រូវបានស្ថាបនាឡើងជាបន្តបន្ទាប់។
នៅព្រឹកថ្ងៃចន្ទស្អែកនេះ ការដ្ឋានសាងសង់ស្ពានអាកាសទីបីនៅចំណុចគល់ស្ពានស្ទឹងមានជ័យគ្រោងនឹងបើកសម្ពោធក្រោមអធិបតីភាពលោកនាយករដ្ឋមន្ត្រី ហ៊ុន សែន។ នេះគឺជាការស្ថាបនាស្ពានអាកាសទីបីនៅទីក្រុងភ្នំពេញបន្ទាប់ពីស្ពានអាកាសក្បាលថ្នល់ និងស្ពានអាកាសពេទ្យលោកសង្ឃ។
ការដ្ឋានសាងសង់ស្ពានអាកាសចំណុចស្ទឹងមានជ័យមានរយៈពេលជាង២ឆ្នាំ និងត្រូវចំណាយថវិកា១៧លានដុល្លារអាមេរិក។
ទាក់ទងទៅនឹងការបើកសម្ពោធការដ្ឋានស្ថាបនាស្ពានអាកាសចំណុចស្ទឹងមានជ័យនៅថ្ងៃចន្ទស្អែកនេះ សាលារាជធានីភ្នំពេញប្រកាសបិទសកម្មភាពចរាចរណ៍បណ្តោះអាសន្ន នៅចំណុចភ្លើងស្តុបស្ទឹងមានជ័យចាប់ពីម៉ោង៨ព្រឹកថ្ងៃទី២៥ខែវិច្ឆិកា ឆ្នាំ២០១២ ដល់ម៉ោង១២ព្រឹកថ្ងៃចន្ទទី២៦ខែវិច្ឆិកាឆ្នាំ២០១២។ ផុតរយៈពេលកំណត់នេះ ចរាចរណ៍ នឹងត្រូវដាក់អោយដំណើរការជាប្រក្រតីឡើងវិញ។
សូមបញ្ជាក់ថា ក្នុងរយៈពេលចុងក្រោយនេះ បុគ្គលិកក្រុមហ៊ុន និងអង្គការមួយចំនួនចាប់ផ្តើមទាមទារដំឡើងប្រាក់ខែពីម្ចាស់ក្រុមហ៊ុនដោយសារតែការកកស្ទះចរាចរណ៍មានទំហំកាន់តែលំបាកឡើងៗពីមួយឆ្នាំទៅមួយឆ្នាំ។ ការកកស្ទះចរាចរណ៍ធ្វើអោយពួកគេចំណាយប្រាក់សម្រាប់សាំងកាន់តែខ្ពស់ និងពេលវេលាកាន់តែច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ