គ្រោះថ្នាក់ចរាចរណ៍សម្លាប់មនុស្ស១៣នាក់ថ្ងៃបុណ្យភ្ជុំបិណ្ឌ
ក្នុងពេលដែលប្រជាពលរដ្ឋប្រជ្រៀតគ្នាចេញពីទីក្រុងភ្នំពេញទៅកាន់បណ្តាខេត្តដើម្បីប្រារព្ឋពិធីបុណ្យភ្ជុំបិណ្ឌ អគ្គស្នងការនគរបាលជាតិ បានឱ្យដឹងថាមនុស្សចំនួនប្រមាណ៦០នាក់ បានស្លាប់និងរងរបួសដោយសារគ្រោះថ្នាក់ចរាចរណ៍កាលពីថ្ងៃអាទិត្យម្សិលមិញ។ បើទោះបីជាទាំងអង្គការ និងអាជ្ញាធរបានរឹតបន្តឹងឱ្យមានការគោរពច្បាប់ចរាចរណ៍ក៏ដោយ។
ចុះផ្សាយនៅថ្ងៃ៖
ស្តាប់ - ០២:១៦
យ៉ាងហោចណាស់មានមនុស្ស១៣នាក់បានស្លាប់ និង ៤៧នាក់ផ្សេងទៀតបានរងរបួសធ្ងន់និងស្រាលក្នុងគ្រោះថ្នាក់ចរាចរណ៍នៅថ្ងៃបុណ្យភ្ជុំបិណ្ឌកាលពីថ្ងៃអាទិត្យទី២១ កញ្ញា។ ជាថ្ងៃដែលប្រជាពលរដ្ឋរាប់រយនាក់សម្រុកចេញពីទីក្រុងភ្នំពេញ។ អគ្គស្នងការនគរបាលជាតិនៃក្រសួងមហាផ្ទៃ បានបញ្ជាក់ថាគ្រោះថ្នាក់ចរាចរណ៍ដែលបានកើតឡើងចំនួន២៧លើកនោះ គឺបណ្តាលមកពីការបើកបរហួសល្បឿនកំណត់ និងគ្រឿងស្រវឹង រួមទាំងការមិនពាក់មួកសុវត្ថិភាពជាដើម។
លោកគង់ សុវណ្ណ ប្រធានអង្គការដៃគូសុវត្ថិភាពចរាចរណ៍សកលប្រចាំកម្ពុជាដែលធ្វើសកម្មភាពដើម្បីធានាសុវត្ថិភាពចរាចរណ៍ បានលើកឡើងថា ការបើកបរហួសល្បឿនកំណត់ និងការបើកបរក្រោមឥទ្ធិពលគ្រឿងស្រវឹងគឺជាអត្រាគ្រោះថ្នាក់ជាងគេសម្រាប់បញ្ហាចរាចរណ៍នៅកម្ពុជា។ក្រៅពីនោះ កំរិតនៃការយល់ដឹងនិងភាពអធ្យាស្រ័យគ្នារបស់ពលរដ្ឋអ្នកប្រើប្រាស់ទ្រូងផ្លូវក៏ជាកត្តាជំរុញឱ្យមានគ្រោះថ្នាក់ចរាចរណ៍ផងដែរ។ ផ្អែកលើកត្តាទាំងនេះ លោក គង់ សុវណ្ណ បានបញ្ចេញទស្សនៈថា គ្រោះថ្នាក់ចរាចរណ៍សម្រាប់ពិធីបុណ្យភ្ជុំបិណ្ឌឆ្នាំ២០១៤នេះ គឺប្រហែលជាមិនអាចធ្លាក់ចុះនោះទេ។ បើទោះបីជាអង្គការរបស់លោក និងស្ថាប័នជំនាញរបស់រដ្ឋាភិបាល បានបើកយុទ្ធនាការផ្សព្វផ្សាយណែនាំក៏ដោយ។
ដើម្បីបង្កាបញ្ហាគ្រោះថ្នាក់ចរាចរណ៍នេះ លោកបានបញ្ជាក់ថា ការអប់រំណែនាំប្រជាពលរដ្ឋតែម្យ៉ាងគឺមិនគ្រប់គ្រាន់នោះទេ។ ពោលគឺត្រូវការរឹតបន្តឹងច្បាប់ចរាចរណ៍បន្ថែមទៀតសំណាក់មន្ត្រីអាជ្ញាធរអ្នកអនុវត្តច្បាប់ផងដែរ។ អនុប្រធាននាយកដ្ឋានសណ្តាប់ធ្នាប់នៃក្រសួងមហាផ្ទៃលោក សុខ ណុប បានឱ្យដឹងថា តាំងពីមុនថ្ងៃបុណ្យភ្ជុំបិណ្ឌរហូតមក មន្ត្រីប៉ូលិសចរាចរណ៍នៅទូទាំងប្រទេស សម្រួលចរាចរណ៍ និងបានបើកយុទ្ធនាការរឹតបន្តឹងការប្រើប្រាស់ទ្រូងផ្លូវ។ ដោយឡែករាជធានីភ្នំពេញដែលនៅពេលនេះ មានសភាពស្ងប់ស្ងាត់ព្រោះតែពលរដ្ឋជាច្រើនបានចាក់ចេញពីទីក្រុងភ្នំពេញនោះ ក៏ត្រូវបានរឹតបន្តឹងទាំងសន្តិសុខនៅតាមតំបន់ក្នុងន័យដើម្បីធានាសុវត្ថិភាពនិងសណ្តាប់ធ្នាប់ផងដែរ។ នេះបើតាមការបញ្ជាក់ពីលោកឡុង ឌីម៉ង់ អ្នកនាំពាក្យសាលាក្រុងភ្នំពេញ។
សូមបញ្ជាក់ថា បញ្ហាគ្រោះថ្នាក់ចរាចរណ៍នៅតែជាក្តីកង្វល់ធំធេង ដែលបានសម្លាប់ និងបង្ករបួសដល់ពលរដ្ឋខ្មែររាប់ពាន់នាក់ក្នុងរយៈពេលមួយឆ្នាំ។ ក្នុងឆមាស ទី១ ដើមឆ្នាំ២០១៤ គ្រោះថ្នាក់ចរាចរណ៍កើនឡើង ជាង២ ៦០៣គឺបានកើនឡើង១០ភាគរយ បើធៀបនឹង ឆ្នាំ២០១៣ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ