អង្គការតម្លាភាពកម្ពុជាអំពាវនាវឲ្យចូលរួមបំបែកសង្វាក់អំពើពុករលួយ
អង្គការតម្លាភាពកម្ពុជានិងសម្ព័ន្ធដើម្បីសុចរិតភាពនិងគណនេយ្យភាពសង្គមដែលធ្វើការពាក់ ព័ន្ធនឹងការប្រឆាំងអំពើពុករលួយបានអំពាវនាវរួមគ្នានៅថ្ងៃពុធនេះឲ្យប្រជាពលរដ្ឋខ្មែរគ្រប់គ្នាក្រោកឡើងដើម្បីប្រឆាំងអំពើពុករលួយនិងបំបែកសង្វាក់អំពើពុករលួយ។ ការអំពាវនាវនេះធ្វើឡើងចំថ្ងៃប្រារព្ធទិវាអន្តរជាតិប្រឆាំងអំពើពុករលួយ៩ធ្នូ។
ចុះផ្សាយនៅថ្ងៃ៖
ស្តាប់ - ០២:០៣
នៅក្នុងសេចក្តីថ្លែងការណ៍រួមគ្នាមួយដែលចេញផ្សាយនៅថ្ងៃទី៩ធ្នូនេះ អង្គការសង្គមស៊ីវិលទាំងពីរបានលើកទឹកចិត្តឲ្យប្រជាពលរដ្ឋកម្ពុជាទាំងអស់ចាត់វិធានការជាក់លាក់ដើម្បីប្រឆាំងអំពើពុករលួយដើម្បីទទួលបានសិទ្ធិជាមូលដ្ឋានរបស់ខ្លួន និងដើម្បីការរស់នៅប្រកបដោយសេចក្តីថ្លៃថ្នូរ។
អង្គការទាំងពីរនេះបានហៅអំពើពុករលួយថាជាការរំលោភអំណាចដើម្បីប្រយោជន៍ផ្ទាល់ខ្លួន ហើយប្រាក់ដែលបានមកពីអំពើពុករលួយប្រៀបបាននឹងពន្ធដ៏ស្មោកគ្រោកដែលបានដាក់បន្ទុកទៅលើជនងាយរងគ្រោះក្នុងសង្គម។ លោកព្រាប កុល នាយកអង្គការតម្លាភាពកម្ពុជាមានប្រសាសន៍ថា បុគ្គលគ្រប់រូបមានសិទ្ធិនិងការតព្វកិច្ចប្រឆាំងអំពើពុករលួយ។ លោកថា ប្រសិនបើពលរដ្ឋគ្រប់គ្នាចូលរួម សង្គមនឹងមានអំពើពុករលួយតិចជាងមុន។
បើតាមលោក ព្រាប កុល ការចូលរួមរបស់ប្រជាពលរដ្ឋអាចធ្វើឡើងតាមរយៈ ការមិនសូកនិងមិនទទួលសំណូក ការហ៊ាននិយាយដោយបើកចំហអំពីអំពើពុករលួយ ការគាំទ្របេក្ខជនសម្រាប់មុខតំណែងសាធារណៈណាដែលនិយាយថាទេចំពោះអំពើពុករលួយ និងកិច្ចសហការជាមួយតួអង្គនានាដើម្បីប្រឆាំងអំពើពុករលួយជាដើម។
សូមបញ្ជាក់ថា ថ្ងៃទី៩ធ្នូត្រូវបានទទួលស្គាល់ថាជាទិវាអន្តរជាតិប្រឆាំងអំពើពុករលួយដែលមានចែងក្នុងអនុញ្ញាអង្គការសហប្រជាជាតិហើយដែលកម្ពុជាបានចុះហត្ថលេខាកាលពីឆ្នាំ ២០០។ ដើម្បីអបអរសាទរទិវានេះ អង្គការតម្លាភាពកម្ពុជានិងសម្ព័ន្ធដើម្បីសុចរិតភាពនិងគណនេយ្យភាពសង្គមបានប្រារព្ធពិធីក្នុងខេត្តចំនួន៥គឺកំពង់ចាម បាត់ដំបង ពោធិសាត់ ស្វាយរៀងនិងខេត្តកំពង់ស្ពឺ។
អង្គភាពប្រឆាំងអំពើពុករលួយរបស់រដ្ឋាភិបាលក៏កំពុងធ្វើសកម្មភាពយ៉ាងសកម្មដែរក្នុងការប្រយុទ្ធប្រឆាំងអំពើពុករលួយ។ អង្គភាពនេះបានព្រមាននិងបានចាត់វិធានការជាបន្តបន្ទាប់ប្រឆាំងនឹងមន្ត្រីដែលទទួលសំណូកឬដែលធ្វើការខ្វះតម្លាភាព។ យ៉ាងណាក៏ដោយ អំពើពុករលួយនៅតែជាបញ្ហាធំធេងមួយនៅឡើយសម្រាប់ប្រទេសកម្ពុជាដែលសង្គមស៊ីវិលទាមទារឲ្យមានការចូលរួមពីសំណាក់មហាជនទូទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ