តួកគីសម្រេចដកច្បាប់បំពានភេទអនីតិជនដ៏ចម្រូងចម្រាស
គម្រោងច្បាប់បំពានភេទអនីតិជនដ៏ចម្រូងចម្រាស របស់តួកគី ទីបំផុតត្រូវបាននាយករដ្ឋមន្ត្រីប្រកាសដកចេញ ដើម្បីយកទៅពិភាក្សាជាមួយបក្សប្រឆាំងនិងសង្គមស៊ីវិល។ ច្បាប់នេះចែងលើកលែងទោសជនបំពានភេទក្មេងមិនទាន់ពេញវ័យ ករណីជនល្មើសព្រមរៀបអាពាហ៍ពិពាហ៍ជាមួយជនរងគ្រោះ។ ប្រជាជនតួកគីបានធ្វើបាតុកម្មប្រឆាំងគម្រោងច្បាប់នេះ កាលពីចុងសប្តាហ៍កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
គម្រោងច្បាប់តួកគីដ៏ចម្រូងចម្រាសនេះ ចែងលើកលែងទោសជនល្មើសដែលបំពានភេទក្មេងមិនទាន់ពេញវ័យ ករណីជនល្មើសព្រមរៀបការជនរងគ្រោះ។ គម្រោងច្បាប់ផ្តោតលើបទល្មើសភេទ ដែលបានកើតឡើង មុនពាក់កណ្តាលខែវិច្ឆិកា ឆ្នាំ២០១៦នេះ។ សភាតួកគីបានបោះឆ្នោតលើច្បាប់នេះម្តងហើយ កាលពីសប្តាហ៍មុន ហើយតាមធមុ្មតា សភាត្រូវពិនិត្យអានច្បាប់នេះជាលើកទី២ទៀត នៅថ្ងៃអង្គារនេះ ដើម្បីអាចបោះឆ្នោត អនុម័តបានពេញលេញ។
ការលើកលែងជនបំពានភេទស្រួលៗដូច្នេះ បានធ្វើអោយបក្សប្រឆាំង និងក្រុមការពារសិទ្ធិកុមារបារម្ភជាខ្លាំង។ រដ្ឋាភិបាលតួកគីលើកឡើងថា ច្បាប់នេះគឺសម្រាប់ប្រើក្នុងករណីមួយចំនួនប៉ុណ្ណោះ។ ច្បាប់នេះមិនចែងលើកលែងករណីចាប់រំលោភបង្ខំ រឺការបំពានភេទដោយប្រើហិង្សាទេ។ ខ្លឹមសារពិត គឺដើម្បីស្រោចស្រង់គូស្នេហ៍វ័យក្មេង។ ឧទាហរណ៍ ករណីបុរសបានល្មើសផ្លូវភេទលើនារី រហូតដល់នាងមានផ្ទៃពោះ។ កន្លងមក មានគ្រូពេទ្យបានផ្តល់ដំណឹងករណីមានផ្ទៃពោះនេះ ទៅអាជ្ញាធរ ធ្វើអោយអាជ្ញាធរចាប់ខ្លួនជនល្មើស។ ដូច្នេះ នារីអនីតិជនដែលមានផ្ទៃពោះក៏ត្រូវរ៉ាប់រងចិញ្ចឹមកូនតែម្នាក់ឯង។ ការរៀបការទាំងមិនទាន់គ្រប់អាយុនេះ ច្រើនកើតឡើងនៅតាមភាគខាងកើតតួកគី។
ទោះយ៉ាងនេះក្តី ការលើកលែងជនបំពានភេទ វាជារឿងចម្រូងចម្រាស។ ចុងសប្តាហ៍កន្លងទៅ ប្រជាជនតួកគីរាប់ពាន់នាក់ បានចុះបាតុកម្មប្រឆាំងនឹងគម្រោងច្បាប់នេះ។ ទីបំផុត រដ្ឋាភិបាលតួកគីសម្រេចប្តូរចិត្តដកច្បាប់នេះចេញទៅវិញ ពិសេសក្រោយការអំពាវនាវរបស់ប្រធានាធិបតីអ៊ែរដូហ្កាន។ ល្ងាចថ្ងៃចន្ទ ម្សិលមិញ លោកអ៊ែរដូហ្កាន បានស្នើរដ្ឋាភិបាលអោយដោះស្រាយបញ្ហាច្បាប់នេះ ធ្វើយ៉ាងណាអោយខ្លឹមសារច្បាប់ ទទួលបានការយល់ព្រមពីគ្រប់ភាគី និងស្របតាមការចង់បានរបស់សង្គមស៊ីវិល។ ពេលនេះ រដ្ឋាភិបាលតួកគីត្រៀមរង់ចាំសំណើរបស់បក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ