ជប៉ុនប្រារព្ធខួបពីរឆ្នាំនៃមរណភាពជនរងគ្រោះដោយរលកយក្សស៊ូណាមី
នៅរសៀលថ្ងៃចន្ទនេះ ប្រទេសជប៉ុនបានរៀបចំប្រារព្ធខួបពីរឆ្នាំ រំលឹកវិញ្ញាណក្ខន្ធជនជាតិជប៉ុនប្រហែលពីរម៉ឺននាក់ ដែលរងគ្រោះដោយសាររលកយក្សស៊ូណាមី កាលខែមីនា ឆ្នាំ២០១១។ កាលណោះ រលកយក្សស៊ូណាមីក៏បានបង្កអោយមានគ្រោះថ្នាក់នុយក្លេអ៊ែរផងដែរ ដោយបានធ្វើអោយផ្ទុះម៉ាស៊ីនប្រតិករនុយក្លេអ៊ែរ ដែលផ្ទុកទៅដោយធាតុវិទ្យុសកម្ម នៅមជ្ឈមណ្ឌលនុយក្លេអ៊ែរ Fukushima ។ អធិរាជជប៉ុន ព្រះចៅAkihito ចង់អោយរដ្ឋាភិបាលផ្តោតសំខាន់លើការបង្វឹកប្រជាជនអោយចេះការពារខ្លួន ក្នុងពេលមានគ្រោះមហន្តរាយ។
ចុះផ្សាយនៅថ្ងៃ៖
ស្តាប់ - ០២:០៦
នៅថ្ងៃចន្ទនេះ វេលាម៉ោង២ និង៤៦ នាទីរសៀល នៅប្រទេសជប៉ុន ប្រជាជនជប៉ុនគ្រប់រូប បានសំដែងការស្ងប់ស្ងៀមរយៈពេលមួយនាទី ដើម្បីគោរពវិញ្ញាណក្ខន្ធជនរងគ្រោះ ជិតពីរម៉ឺននាក់ ដែលបានបាត់បង់ជីវិត ដោយសារតែគ្រោះមហន្តរាយបង្កដោយរលកយក្សស៊ូណាមី កាលពីថ្ងៃ ១១មីនា ឆ្នាំ ២០១១។ រដ្ឋាភិបាលជប៉ុនបានរៀបចំពិធីរំលឹកខួបនេះ ជាលក្ខណៈជាតិ នៅក្រុងតូក្យូ ដោយមានការចូលរួមពីអធិរាជជប៉ុន Akihito និងអធិរាជនី Michiko ផងដែរ។
អធិរាជជប៉ុន ព្រះចៅAkihito បានលើកឡើងពីរសារៈសំខាន់ ដែលយុវជនជប៉ុនជំនាន់ក្រោយត្រូវតែចងចាំទុកក្នុងចិត្ត នូវព្រិត្តិការគ្រោះមហន្តរាយនេះ។
គួររំលឹកថា នៅវេលាម៉ោង ២ និង៤៦ នាទីរសៀល ថ្ងៃសុក្រ ទី ១១មីនា ឆ្នាំ ២០១១ ប្រទេសជប៉ុនបានរងនូវគ្រោះរញ្ជួយដីមួយក្នុងកម្រិត ៩ វ៉ិចទ័រ ដែលកើតឡើងនៅក្រោមមហាសមុទ្រប៉ាស៊ីហ្វិក។ ការរញ្ជួយដីនេះ បានបង្កជារលកសមុទ្រខ្ពស់ៗ ដែលនៅកន្លែងខ្លះមានកំពស់រហូតដល់ទៅ ២០ម៉ែត្រ។ រលកយក្សបានបោកបក់លើឆ្នេរតំបន់ Tohoku ស្ថិតនៅភាគឥសានប្រទេសជប៉ុន បណ្តាលអោយមានមនុស្សស្លាប់ និងបាត់ខ្លួនជាបន្តបន្ទាប់។
ពីរឆ្នាំក្រោយការវាយប្រហាររបស់រលកយក្សស៊ូណាមី ប្រជាជនជប៉ុនជាងបីសែននាក់ កំពុងរស់នៅក្នុងលំនៅដ្ឋានជាបណ្តោះអាសន្ននៅឡើយ។ រដ្ឋាភិបាលជប៉ុនបានប្រឹងប្រែងជួសជុល និងកសាងហេដ្ឋារចនាសម្ព័ន្ធសំខាន់ៗ នៅតំបន់រងគ្រោះឡើងវិញ។
ព្រះចៅអធិរាជAkihito ចង់អោយរដ្ឋាភិបាលផ្តោតសំខាន់លើការបង្វឹកប្រជាជនអោយចេះការពារខ្លួន ក្នុងពេលមានគ្រោះមហន្តរាយ។ នាយករដ្ឋមន្ត្រីជប៉ុនបានសន្យាថា នឹងធ្វើអោយប្រទេសជប៉ុនមានប្រព័ន្ធការពារទប់ទល់នឹងគ្រោះមហន្តរាយអោយបានខ្ពស់ថែមទៀត។
គួររំលឹកដែរថា កាលពីពីរឆ្នាំមុន រលកយក្សស៊ូណាមី បានបំផ្លាញម៉ាស៊ីនប្រតិករចំនួនបួន ក្នុងចំនោមម៉ាស៊ីនប្រតិករនុយក្លេអ៊ែរ៦ នៅមជ្ឈមណ្ឌលនុយក្លេអ៊ែរ Fukushima ។ កាលណោះ រលកយក្សបានបង្កអោយមានការផ្ទុះម៉ាស៊ីនប្រតិករ ដែលផ្ទុកទៅដោយធាតុវិទ្យុសកម្ម។
យោងតាមរដ្ឋាភិបាលជប៉ុន ស្ថានភាពនៅ Fukushima នៅពេលបច្ចុប្បន្នមានភាពនឹងនរឡើងវិញហើយ។ ប៉ុន្តែទោះយ៉ាងណាក៏ដោយ ជប៉ុនត្រូវការពេលវេលាយ៉ាងហោចណាស់ក៏៤០ឆ្នាំទៀតដែរ ដើម្បីរំលាយចោលនូវម៉ាស៊ីនប្រតិករនុយក្លេអ៊ែរដែលត្រូវបានបំផ្លាញដោយរលកយក្សស៊ូណាមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ