ជំនួបកំពូលមេដឹកនាំអាមេរិក និងចិនបិទបញ្ចប់ដោយភាពស្និទ្ធស្នាល និងយោគយល់គ្នា
នៅរដ្ឋកាលីហ្វនី លោកប្រធានាធិបតីបារ៉ាក់ អូបាម៉ា និងសមភាគីចិន លោក ស៊ី ជីនពីងបានបញ្ចប់កិច្ចប្រជុំក្រៅផ្លូវការ កាលពីថ្ងៃសៅរ៍ទី៨ មិថុនា ២០១៣។ ក្នុងជំនួប ៤៨ម៉ោង លោកអូបាម៉ា និងស៊ី ជីនពីង បានព្យាយាមបង្កើត បរិយាកាសជឿទុកចិត្ត ឡើងវិញរវាងប្រទេសមហាអំណាចទាំងពីរ។ ជារួម ប្រមុខដឹកនាំទាំងពីរបានលើកឡើងពីបញ្ហាចារកិច្ចតាមប្រព័ន្ធអ៊ិនធ័រណេត និងបានសន្យាធ្វើការជាមួយគ្នា ដើម្បីដោះស្រាយបញ្ហាអាកាសធាតុ និង នុយក្លេអ៊ែររបស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ក្នុងទំនាក់ទំនងអាមេរិក និងចិន គេមិនធ្លាប់ឃើញរូបភាពស្និទ្ធស្នាលបែបនេះទេ ពីមុនមក។ នៅក្រោមថ្ងៃក្តៅហែង ប្រមុខដឹកនាំអាមេរិក និងចិន ដែលពាក់តែអាវសាមញ្ញ គ្មានក្រវាត់ក ឈរនិយាយគ្នាតែពីរនាក់ គឺគ្មានហែហមដោយទីប្រឹក្សា ឬរដ្ឋមន្រ្តីណាទេ ក្រៅតែពីអ្នកបកប្រែម្នាក់។ ដូចគេបានដឹងរួចមកហើយថា ជំនួបលោកអូបាម៉ា និងលោកស៊ី ជីនពីងជាជំនួបក្រៅផ្លូវការ ដែលលោកអូបាម៉ា ស្នើសុំឡើង ដើម្បីស្វែងយល់ឲ្យបានច្រើនពីជំហររបស់ប្រមុខដឹកនាំថ្មីរបស់ប្រទេសចិន។ និយាយឲ្យចំ គឺជាជំនួបដែលអាមេរិកទន្ទឹង ចង់បានប្រយោជន៍ច្រើនពីភាគីចិន។ អាមេរិកចង់ដោះស្រាយជាមួយចិនពីរឿង វាយប្រហារតាមប្រព័ន្ធព័ត៌មានវិទ្យា ដែលរដ្ឋាភិបាលអាមេរិក កំពុងរងគ្រោះ និងដែលអាមេរិកជឿថា មានប្រភពចេញមកពីប្រទេសចិន។
យោងតាមលោក Tom Danilon ទីប្រឹក្សាផ្នែកសន្តិសុខអាមេរិកាំង លោកប្រធានាធិបតីចិនបានយល់ដឹងពីកង្វល់របស់អាមេរិក បន្ទាប់ពីលោកអូបាម៉ា បានជម្រាបប្រាប់ទៅលោកថា រឿងចារកិច្ចតាមប្រព័ន្ធព័ត៌មានវិទ្យាសំខាន់ណាស់ ហើយ បើវានៅតែបន្ត នោះវានឹងធ្វើឲ្យប៉ះពាល់ដល់ទំនាក់ទំនងរវាងប្រទេសទាំងពីរ។
ប៉ុន្តែ ទីប្រឹក្សារដ្ឋចិន វិញ បាននិយាយបញ្ជាក់ជំហររបស់លោកប្រធានាធិបតីចិន ដោយអះអាងថា ចិនក៏ជាជនរងគ្រោះដោយការវាយប្រហារផ្នែកព័ត៌មានវិទ្យាដែរ។ ជាមួយគ្នានោះ ទីក្រុងប៉េកាំងសុំវិញដែរ ឲ្យអាមេរិកបញ្ឈប់សកម្មភាពលក់អាវុធឲ្យកោះតៃវ៉ាន់ និងព្រមទទួលស្គាល់គោលនយោបាយចិនតែមួយ។
ក្រៅតែពីនិយាយគ្នាពីរឿងសន្តិសុខតាមប្រព័ន្ធព័ត៌មានវិទ្យា ប្រធានាធិបអាមេរិក និងចិន និយាយផងដែរបញ្ហាអាកាសធាតុ ដែលប្រទេសមហាអំណាចទាំងពីរយល់ព្រមកាត់បន្ថយឧស្ម័នពុលក្នុងឧស្សាហកម្មរបស់ខ្លួន ដែលរហូតមកដល់ពេលនេះ ជាមូលហេតុចំបងនៃការឡើងកម្តៅនៃភពផែនដី។ ក្នុងសំណុំរឿងនុយក្លេអ៊ែររបស់កូរ៉េខាងជើង ដែលជាសម្ព័ន្ធមិត្តរបស់ចិន លោកអូបាម៉ា និងលោកស៊ី ជីនពីងយល់ស្របគ្នា ចង់ឲ្យកូរ៉េខាងជើងបោះបង់ចោលកម្មវិធីនុយក្លេអ៊ែររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ