តាលីបង់ដោះលែងអ្នកទោសអាមេរិកម្នាក់ជាថ្នូរនឹងអ្នកទោសអាហ្វហ្កានីស្ថាននៅGuantanamo
សហរដ្ឋអាមេរិកបានប្រកាសនៅល្ងាចថ្ងៃសោរ៍ម្សិលមិញ អំពីការដោះលែងទាហានអាមេរិកម្នាក់ ដែលពួកតាលីបង់នៅអាហ្វហ្កានិស្ថានចាប់បាន កាលពីជិត៥ឆ្នាំមុន។ ជាថ្នូរនឹងសេរីភាពនេះ សហរដ្ឋអាមេរិកបានប្រកាសដោះលែងអ្នកទោសអាហ្វហ្កានីស្ថាន ក្នុងពន្ធនាគារហ្គ័នតាណាម៉ូ ចំនួន៥នាក់ ឱ្យទៅជាប់ឃុំឃាំងក្នុងគេហដ្ឋាននៅប្រទេសកាតា ដែលជាអន្តរការី។ សម្រាប់លោកប្រធានាធិបតីអាមេរិក កាតាអាចធានាបាននូវសុវត្ថិភាពនៃការផ្ទេរអ្នកទោសនេះ។ ការផ្តោះប្តូរអ្នកទោសដែលអាចផ្តល់សន្ទុះដល់ដំណើរការស្វែងរកសន្តិភាពឱ្យអាហ្វហ្កានិស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
បាត់ខ្លួនតាំងពីថ្ងៃទី ៣០មិថុនា ឆ្នាំ២០០៩ ពលបាលត្រី Bowe Bergdahl ជាទាហានអាមេរិកតែម្នាក់គត់ដែលបានធ្លាក់ខ្លួនជាអ្នកទោសរបស់ពួកតាលីបង់ ក្នុងអំឡុងពេលសង្គ្រាម១៣ឆ្នាំនៅអាហ្វហ្កានីស្ថាន។ ការដោះលែងនេះ ត្រូវបានប្រកាសជូនដំណឹងផ្ទាល់ដោយប្រធានាធិបតី បារ៉ាក់ អូបាម៉ា ពីសេតវិមាន ជាមួយនឹងការថ្លែងអំណរគុណប្រទេសកាតាដែលបានជួយជ្រោមជ្រែងអាមេរិកក្នុងសំណុំរឿងអ្នកទោសនេះ។
ក្នុងពេលជាមួយគ្នានោះ រដ្ឋមន្ត្រីក្រសួងការពារជាតិអាមេរិក លោក ឆាក់ ហាហ្គែល បានជូនដំណឹងអំពីការដោះលែងអ្នកទោសអាហ្វហ្កានីស្ថាន ៥នាក់ ជាថ្នូរនឹងសេរីភាពទាហានអាមេរិក ពីពន្ធនាគារហ្គ័នតាណាម៉ូ។ អ្នកទោសទាំង៥នាក់នោះសុទ្ធតែជាតំណាងជាន់ខ្ពស់នៃរបបតាលីបង់ ដែលត្រូវគេបណ្តេញចេញពីតំណែង នៅពេលអាមេរិកចូលសង្គ្រាមនៅអាហ្វហ្កានីស្ថាន ក្រោយព្រឹត្តិការណ៍មហាភេវកម្មថ្ងៃទី ១១កញ្ញា២០០១។ លក្ខខណ្ឌនៃការផ្តោះប្តូរអ្នកទោសមិនត្រូវបានលម្អិតឱ្យដឹងទេ ជាហេតុធ្វើក្រុមអ្នកសាធារណរដ្ឋអាមេរិក រិះគន់យ៉ាងខ្លាំង ខ្លាចក្រែងពួកភេរវនិយមមានសេចក្តីក្លាហានចាប់ទាហានអាមេរិក ដើម្បីប្រើជាថ្នូរសម្រាប់ដោះលែងអ្នកទោស។
អាមេរិកសុខចិត្តដោះលែងពួកតាលីបង់ប្រាំនាក់នេះ បន្ទាប់ពីបានទទួលការធានារ៉ាប់រង ពីប្រទេសកាតា ដែលដើរតួជាអន្តរការី និងបានយល់ព្រមទទួលអតីតអ្នកទោសតាលីបង់នៅហ្គ័នតាណាម៉ូទាំង៥នាក់នោះ ឱ្យស្នាក់នៅក្នុងទឹកដីកាតា ជាមួយនឹងការដាក់កំរិតសកម្មភាព។
នេះក៏មិនមែនជាលើកទីមួយ ដែលកាតាបានបានរិតចំណងជាមួយពួកតាលីបង់។ កាតាធ្លាប់បានអនុញ្ញាតឱ្យតាលីបង់បើកការិយាល័យនយោបាយនៅទីក្រុង ដូហា កាលពីឆ្នាំមុនដោយមានការព្រមព្រៀងពីសហរដ្ឋអាមេរិក សម្រាប់ភ្ជាប់ទំនាក់ទំនងចរចាជាមួយរដ្ឋាភិបាលនៅកាប៊ូល មុននឹងត្រូវបិទទ្វារទៅវិញ ដោយគ្មានចរន្តចរចាអ្វីលេចជារូបរាង។ យ៉ាងណាក៏ដោយ ក៏នៅលើកនេះ ក្រុមប្រឹក្សាជាន់ខ្ពស់សន្តិភាពអាហ្វហ្កានីស្ថាន ផ្តល់ក្តីសង្ឃឹមលើការផ្តោះប្តូរអ្នកទោស ថាជាការផ្តល់សន្ទុះដល់ការចរចាសន្តិភាពឱ្យអាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ