របាយការណ៍អាមេរិក ៖ អាហ្វហ្កានីស្ថានគ្មានសមត្ថភាពចាត់ចែងប្រាក់ជំនួយ
យុទ្ធនាការឃោសនាបោះឆ្នោតប្រធានាធិបតីអាហ្វហ្កានីស្ថាន នឹងត្រូវចាប់ផ្តើមចាប់ពីថ្ងៃអាទិត្យទី ២ កុម្ភៈនេះតទៅ។ ១២ឆ្នាំក្រោយសង្គ្រាម និងការដួលរលំនៃរបបតាលីបង់ អាហ្វហ្កានីស្ថាន នឹងរៀបចំការបោះឆ្នោតថ្ងៃទី៥មេសា ក្នុងស្ថានភាពយ៉ាប់យឺនដដែល។ សហរដ្ឋអាមេរិកបានចំណាយថវិការាប់លានដុល្លារអាមេរិក ដើម្បីស្ថាបនាប្រទេសនេះឡើងវិញ ប៉ុន្តែបើតាមរបាយការណ៍ដែលទើបចេញផ្សាយនៅសហរដ្ឋ ក្រសួងរដ្ឋបាលអាហ្វហ្កានីសា្ថនគ្មានសមត្ថភាពចាត់ចែងលុយជំនួយនេះត្រឹមត្រូវសោះ។
ចុះផ្សាយនៅថ្ងៃ៖
ស្តាប់ - ០១:៤៩
ជាបញ្ហាដ៏ធ្ងន់ធ្ងរបំផុត ក្នុងគ្រប់ក្រសួងដែលបានប្រាក់ជំនួយផ្ទាល់ កាលពីឆ្នាំទៅ ដែលមានទំហំមិនតិចជាង១ពាន់៦រយលានដុល្លារ ! នេះជាខ្លឹមសារសរុបនៃរបាយការណ៍អាមេរិក ដែលចេញផ្សាយជារៀងរាល់ត្រីមាស ដោយស្ថាប័នឯករាជ្យ SIGAR (អធិការដ្ឋានពិសេសដើម្បីស្ថាបនាអាហ្វហ្កានីស្ថាន) មានបន្ទុកត្រួតពិនិត្យការចាយវាយលុយជំនួយរបស់ពលរដ្ឋអាមេរិក។
កាលពីរដូវក្តៅកន្លងទៅ ស្ថាប័ននេះធ្លាប់បានបរិហារការចំណាយហួសហេតុរបស់អង្គការផ្នែកចាត់ចែងជំនួយអាមេរិក និងចែកចាយថវិកា USAID ម្តងរួចហើយ ចំពោះចំណាយច្រើនតែបានលទ្ធផលតិច។ ការរិះគន់ដែលនាំឱ្យមានការបើកការអង្កេត។ ជាលទ្ធផល ក្រសួងទាំង១៦របស់អាហ្វហ្កានីស្ថាន គ្មានសមត្ថភាពចាត់ចែងប្រាក់ជំនួយទេ ជាពិសេសគឺក្រសួងហិរញ្ញវត្ថុតែម្តង !
ប៉ុន្តែបន្ទាប់មក បើទោះបីជាបានដឹងអំពីអសមត្ថភាពដូច្នេះក្តី និងទោះបីមានសំណើសុំពីក្រុមអ្នកអង្កេតក្តី ក៏ USAID បានចូលទៅធ្វើជាឆ្មាំក្នុងក្រសួងតែចំនួន៧ និងក្នុងបរិមាណតិចតួចបំផុត។ សម្រាប់USAID ដែលមិនបង្អង់នឹងបញ្ចេញប្រតិកម្ម បានការពារខ្លួនពី របាយការណ៍SIGAR ថាអង្គការមានយន្តការ ដែលអនុញ្ញាតឱ្យរដ្ឋាភិបាលអាមេរិកអាចធ្វើការត្រួតពិនិត្យបាន។ យន្តការនេះគួរជាទីទុកចិត្ត ព្រោះការដោះស្រាយរាល់គ្រប់បញ្ហា នៅតាមគ្រប់ក្រសួងរបស់អាហ្វហ្កានីស្ថាន មុននឹងដាក់ឱ្យដំណើរការកម្មវិធីជំនួយ មិនមែនជារបៀបប្រើប្រាស់ប្រភពធនធានអាមេរិក ប្រកបដោយការប្រុងប្រយ័ត្នឡើយ។
សូមបញ្ជាក់ថា ក្នុងរយៈពេល១២ឆ្នាំនេះ ក្រៅអំពីការតម្រូវការថវិកាផ្នែកយោធា សហរដ្ឋអាមេរិក បានចំណាយជិត ១០០ពាន់លានដុល្លារ សម្រាប់កសាងប្រទេសអាហ្វហ្កានីស្ថានឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ