ប្រមុខការទូតចិនបំពេញទស្សនកិច្ចក្នុងប្រទេសសេណេហ្កាល់ដើម្បីពង្រឹងទំនាក់ទំនងសេដ្ឋកិច្ច
ដើម្បីបង្ហាញពីការចាប់អារម្មណ៍របស់ចិនចំពោះទ្វីបអាហ្រ្វិក លោកប្រមុខការទូតចិនបានជ្រើសរើសទ្វីបអាហ្រ្វិកដើម្បីបំពេញទស្សនកិច្ចសម្រាប់ឆ្នំាថ្មី។ បន្ទាប់ពីប្រទេសអេត្យូពី ជីប៊ូទី និងប្រទេសហ្គាណា លោករដ្ឋមន្រ្តីការបរទេសចិនបានបញ្ចប់ទស្សនកិច្ចនៅក្នុងប្រទេសសេណេហ្កាល់ក្នុងថ្ងៃទី១០ និងទី១១ មករានេះ។ នៅក្នុងប្រទេសសេណេហ្គាល់ លោកប្រមុខការទូតចិនបានជួបសន្ទនាជាមួយលោកប្រមុខការទូត លោកនាយករដ្ឋមន្រ្តី និងលោកប្រធានាធិបតីសេណេហ្គាល់។ ទស្សនកិច្ចដែលផ្តោតសំខាន់លើការពង្រឹងទំនាក់ទំនងសេដ្ឋកិច្ចរវាងទីក្រុងប៉េកំាង និងទីក្រុងដាកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
តំាងពីប្រទេសទំាងពីរចិន និងសេណេហ្គាល់បានភ្ជាប់ទំនាក់ទំនងការទូតរវាងគ្នាជាថ្មីកាលពី ៨ឆ្នំាមុនមក ចិនបានក្លាយជាដៃគូពាណិជ្ជកម្មទីមួយមិនអាចខ្វះបានរបស់ប្រទេសសេណេហ្គាល់។ បច្ចុប្បន្ននេះ ចំណែកទីផ្សារដែលចិនទទួលបានពីសេណេហ្គាល់ គឺមានប្រហាក់ប្រហែលនឹងប្រទេសបារំាងដែរ ពោលមានប្រមាណជា ១១% ដោយមិនរាប់បញ្ចូលផលិតផលប្រេងកាតទេ។ បើយោងតាមឯកអគ្គរដ្ឋទូតចិនប្រចំាទីក្រុងដាកាឲ្យដឹងថា ទឹកប្រាក់នៃការដោះដូរពាណិជ្ជកម្មរវាងចិន និងសេណេហ្គាល់គិតត្រឹមខែសីហា ឆ្នំា ២០១៣ មានប្រមាណជា ៦៣៣លានដុល្លារ ពោលមានការកើនឡើងចំនួន ២០,៨% បើគិតក្នុងរយៈពេលដូចគ្នាកាលពីឆ្នំា ២០១២។ សព្វថ្ងៃនេះ ៩៥% នៃផលិតផលសេណេហ្គាល់ដែលនំាចូលប្រទេសចិនមិនមានបង់ពន្ធទេ
អ្វីជាការកត់សម្គាល់នោះគឺថា ទោះបីជាបរិមាណនៃការនំាផលិតផលសេណេហ្គាល់ចូលក្នុងប្រទេសចិននៅមានចំនួនតិចក៏ដោយ ក៏ចរន្តនៃការដោះដូរពាណិជ្ជកម្មរវាងប្រទេសទំាងពីរកំពុងមានកំណើនទៅមុខជាប្រចំា និងដោយមានការគំាទ្រពីជំនួយអភិវឌ្ឍន៍សាធារណៈ។ ជាមួយនឹងជំនួយជាង ២០០លានដុល្លារដែលចិនជួយសេណេហ្គាល់ក្នុងឆ្នំា ២០១៣ ចិនបានក្លាយជាអ្នកផ្តល់ជំនួយឲ្យសេណេហ្គាល់លំដាប់ទី៤។ ជំនួយនៅក្នុងគម្រោងសាងសង់អាកាសយានដ្ឋាន និងផ្លូវ highway ជាដើម។ ក្រៅពីនោះ ចិនក៏បានផ្តល់ជំនួយជួយសាងសង់មន្ទីរពេទ្យសម្រាប់ព្យាបាលកូនក្មេងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ