សម្តេចប៉ាបហ្រ្វង់ស័រយាងបំពេញទស្សនកិច្ចរយៈពេល ៥ថ្ងៃនៅកូរ៉េខាងត្បូង
ប្រមុខសង្ឃសាសនាកាតូលិក សម្តេចប៉ាបហ្រ្វង់ស័របានយាងទៅបំពេញទស្សនកិច្ចរយៈពេល ៥ថ្ងៃក្នុងទឹកដីកូរ៉េខាងត្បូងនៅថ្ងៃព្រហស្បតិ៍ ទី១៤ សីហានេះ។ គឺជាទស្សនកិច្ចលើកទី១នៅក្នុងឧបទ្វីបកូរ៉េ តំាងពីព្រះអង្គបានក្លាយជាសម្តេចប៉ាបមក។ នៅក្នុងទឹកដីកូរ៉េខាងត្បូង សម្តេចប៉ាបហ្រ្វង់ស័រនឹងយាងចូលរួមនៅក្នុងទិវាយុវជនកាតូលិកអាស៊ីដោយមានការចូលរួមពីក្រុមយុវជនអាស៊ីពីជាង ២០ប្រទេសក្នុងតំបន់។ ដោយឡែក និងក្រៅពីការពង្រឹងវិស័យសាសនាកាតូលិកនៅអាស៊ី សម្តេចប៉ាបក៏បានអំពាវនាវឲ្យមានសន្តិភាពនៅក្នុងឧបទ្វីបកូរ៉េ ពិសេសការបង្រួបបង្រួមរវាងកូរ៉េខាងត្បូង និងកូរ៉េខាងជើងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នេះជាលើកទី១ ក្នុងរយៈពេល ២៥ឆ្នំាកន្លងទៅដែលទើបមានសម្តេចប៉ាបមួយអង្គបានដាក់ជើងជាន់លើទឹកដីកូរ៉េខាងត្បូង។ សម្តេចប៉ាបហ្រ្វង់ស័រត្រូវបានទទួលដោយលោកស្រីប្រធានាធិបតីកូរ៉េខាងត្បូងប៉ាក់ គុនហ៊ឺនៅឯអាកាសយានដ្ឋានអ៊ីនឆុងក្នុងទីក្រុងសេអ៊ូល។ នៅក្នុងដំណើរទស្សនកិច្ចរយៈពេល ៥ថ្ងៃក្នុងទឹកដីកូរ៉េខាងត្បូង សម្តេចប៉ាបនឹងត្រូវទទួលជួបសន្ទនាដោយថ្នាក់ដឹកនំាកូរ៉េខាងត្បូង ក្រុមអង្គការសង្គមស៊ីវិល ព្រមទំាងស្ថានប័នសាសនាកាតូលិកនៅទូទំាងប្រទេស។ ដោយឡែក ព្រះអង្គក៏ត្រូវយាងចូលរួមនៅក្នុងទិវាយុវជនកាតូលិកអាស៊ីលើកទី៦ ដោយមានការចូលរួមពីក្រុមយុវជនកាតូលិកអាស៊ីជាង ២០ប្រទេសនៅក្នុងតំបន់។
គួររម្លឹកជូនថា កាលពី ២៥ឆ្នំាមុន ពោលក្នុងឆ្នំា ១៩៨៩ ក៏ធ្លាប់មានដំណើរទស្សនកិច្ចរបស់ប្រមុខសង្ឃកាតូលិកមួយអង្គដែរនៅក្នុងទឹកដីកូរ៉េខាងត្បូង គឺសម្តេចប៉ាបហ្សង់ប៉ូលទី២។ បើធៀបនឹងប្រទេសអាស៊ីផ្សេងទៀត កូរ៉េខាងត្បូងជាប្រទេសមួយដែលមានអ្នកកាន់សាសនាកាតូលិកច្រើនជាងគេ និងដែលមានការកើនឡើងជាលំដាប់ពីមួយឆ្នំាទៅមួយឆ្នំា។ បច្ចុប្បន្ននៅកូរ៉េខាងត្បូង មានអ្នកកាន់សាសនាកាតូលិកប្រមាណជា ៥លាននាក់ ពោលស្មើនឹង ១០% នៃប្រជាជនសរុប។ បើធៀបនឹងសាសនាផ្សេង គឺនៅមានចំនួនតិចតួចនៅឡើយ តែមានការកើនឡើងប្រមាណជា ១០ម៉ឺននាក់ជារៀងរាល់ឆ្នំា។ នៅកូរ៉េខាងត្បូង សាសនាកាតូលិក ជាសាសនាមួយដែលមានឥទ្ធិពលខ្លំាងនៅក្នុងផ្នែកនយោបាយ បញ្ញវន្ត និងសេដ្ឋកិច្ច។ តំណាងរាស្រ្តកូរ៉េខាងត្បូងចំនួន ២០% ជាអ្នកកាន់សាសនាកាតូលិក ហើយរូបលោកស្រីប្រធានាធិបតីប៉ាក់ គុនហ៊ឺក៏ជាអ្នកកាន់សាសនាកាតូលិក និងធ្លាប់បានសិក្សានៅក្នុងសកលវិទ្យាល័យកាតូលិកក្នុងទីក្រុងសេអ៊ូលដែរ។
ក្រៅពីកម្មវត្ថុពង្រឹងវិស័យសាសនាកាតូលិកនៅកូរ៉េខាងត្បូង សម្តេចប៉ាបហ្រ្វង់ស័រក៏គ្រោងនឹងអំពាវនាវឲ្យមានសន្តិភាពនៅក្នុងឧបទ្វីបកូរ៉េ ពិសេសការបង្រួបបង្រួមរវាងកូរ៉េខាងត្បូង និងកូរ៉េខាងជើង។ តែកូរ៉េខាងជើងបានឆ្លើយតបដោយបានបាញ់គ្រាប់មីស៊ីលចម្ងាយខ្លីចំនួន ៣ដើមធ្លាក់ក្នុងសមុទ្រជប៉ុន នៅក្រោយការយាងមកដល់របស់សម្តេចប៉ាបក្នុងទឹកដីកូរ៉េខាងត្បូងតែប៉ុន្មាននាទីប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ