នាយករដ្ឋមន្រ្តីចិន៖ រដ្ឋាភិបាលមានសមត្ថភាពគ្រប់គ្រាន់ក្នុងការទប់ទល់នឹងបញ្ហាអតិផរណា
នៅថ្ងៃអាទិត្យ ២៦ ធ្នូ ២០១០នេះ លោកវេន ជាប៉ាវ (Wen Jiabao) នាយករដ្ឋមន្រ្តីចិនបានបានបង្ហាញនូវជំនឿចិត្តថា រដ្ឋាភិបាលចិនអាចនឹងដោះស្រាយបញ្ហាអតិផរណាបាន។ ការប្រកាសធានាបែបនេះ ត្រូវបានធ្វើឡើង មួយថ្ងៃក្រោយពីធនាគារកណ្តាលចិនបានសម្រេចដំឡើងអត្រាការប្រាក់ ចំនួន ០,២៥%។
ចុះផ្សាយនៅថ្ងៃ៖ កែប្រែថ្ងៃទី៖
ការពន្យល់របស់សេង ឌីណា
វិធានការ ដែលរដ្ឋាភិបាលចិនបានដាក់ចេញ កាលពីខែកន្លងទៅ ពិតជាបានបង្កើតផលផ្លែជាវិជ្ជមាន ក្នុងការទប់ស្កាត់ការឡើងថ្លៃទំនិញ។ នេះបើតាមការអះអាងរបស់លោកវេន ជាប៉ាវ នៅថ្ងៃអាទិត្យនេះ។
កាលពីថ្ងៃសៅរ៍ ម្សិលមិញ ត្រូវចំនឹងថ្ងៃបុណ្យណូអែល ធនាគារកណ្តាលចិនបានប្រកាសដំឡើងអត្រាការប្រាក់ជាលើកទី២ ក្រោយពីបានដំឡើងម្តងរួចមកហើយ កាលពីខែតុលាកន្លងទៅ។ មុននេះ ចិនក៏បានសម្រេចបង្កើនផលធៀបធនបម្រុងធនាគារ (Reserve Requirement Ratio) ចំនួន ៦លើករួចមកហើយដែរ។
អ្នកវិភាគជាច្រើនយល់ថា ការដែលធនាគារចិនបានសម្រេចបង្កើនអត្រាការប្រាក់ ជាលើកទី២ កាលពីថ្ងៃសៅរ៍ ម្សិលមិញនេះ បង្ហាញថា វិធានការ ដែលចិនបានដាក់ចេញ នាពេលកន្លងទៅ ទំនងជាមិនមានប្រសិទ្ធិភាពគ្រាប់គ្រាន់ ក្នុងការទប់ទល់នឹងនឹងបញ្ហាអតិផរណានោះទេ។
គិតមកត្រឹមខែវិច្ឆិកាកន្លងទៅនេះ អត្រាអតិផរណាមធ្យមប្រចាំឆ្នាំ នៅចិន បានកើនឡើង រហូតដល់ ៥,១%។ អត្រានេះ នៅមានកម្រិតទាបនៅឡើយ ធៀបនឹងឆ្នាំ២០០៨ ដែលមានរហូតដល់ទៅ ៨,៧%។ ក៏ប៉ុន្តែ អ្វីដែលធ្វើឲ្យរដ្ឋាភិបាលចិនបារម្ភ គឺល្បឿននៃកំណើនអតិផរណា។ ក្នុងចន្លោះ ពីខែកញ្ញា ដល់ខែវិច្ឆិកានេះ អត្រាអតិផរណាបានកើនឡើង ជាមធ្យម ប្រមាណជា ០,៨% ក្នុងមួយខែ។
នៅពេលនេះ ការទប់ស្កាត់ការឡើងថ្លៃទំនិញ គឺជាអាទិភាពចម្បងបំផុតរបស់រដ្ឋាភិបាលចិន។ ចិនកំពុងតែបារម្ភខ្លាច បញ្ហាអតិផរណាបង្កឲ្យមានការបះបោរតវ៉ា ពីសំណាក់ប្រជាជនទូទៅ ជាពិសេស ប្រជាជនក្រីក្រ និងប្រជាជនថ្នាក់កណ្តាល ដែលជាអ្នកត្រូវរងគ្រោះមុនគេ នៅពេលទំនិញសព្វសារពើឡើងថ្លៃកប់ពពក។
បន្ទាប់ពីការឡើងថ្លៃគ្រឿងឧបភោគ-បរិភោគ តម្លៃអចលនវត្ថុ នៅចិន ក៏ចាប់ផ្តើមកើនឡើងគួរឲ្យព្រួយបារម្ភដែរ នៅក្នុងរយៈពេលប៉ុន្មានសប្តាហ៍ចុងក្រោយនេះ។ លោកវេន ជាប៉ាវ បានថ្លែងថា នៅក្នុងឆ្នាំ២០១១នេះ រដ្ឋាភិបាលចិនមានគម្រោងសាងសង់លំនៅដ្ឋាន ចំនួន ១០លាន សម្រាប់លក់ ឬជួលក្នុងតម្លៃថោកសមរម្យ។ ឥណទានធនាគារក្នុងវិស័យអចលនវត្ថុ ព្រមទាំងការប្រើប្រាស់ដីធ្លី ដើម្បីសាងសង់ផ្ទះលក់ ក៏នឹងត្រូវរឹតបន្តឹងផងដែរ ដើម្បីទប់ស្កាត់នឹងការកើនឡើងនៃតម្លៃអចលនវត្ថុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ