ហេតុអ្វីបានជាថៃព្យាយាមរារាំងកិច្ចប្រជុំក្រុមប្រឹក្សាសន្តិសុខអ.ស.ប?
ចុះផ្សាយនៅថ្ងៃ៖
ស្តាប់ - ០៥:១៧
ប្រទេសថៃបានព្យាយាមក្នុងការរារាំងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ នៅថ្ងៃចន្ទសបា្តហ៍ក្រោយ ដោយបន្តគូសបញ្ជាក់ពីយន្តការដោះស្រាយជម្លោះ ឈរលើយន្តការទ្វេភាគី។ តើអ្វីដែលជាមូលហេតុនៃការរារាំងនេះ?
កម្ពុជា-ថៃ នឹងបង្ហាញគោលជំហររួមនឹងភស្តុតាងរៀងៗខ្លួននៅថ្ងៃចន្ទសបា្តហ៍ក្រោយនេះទៅក្រុមប្រឹក្សាសន្តិសុខអង្គការសហប្រជាជាតិជុំវិញការផ្ទុះសង្គ្រាមនៅតំបន់ព្រំដែនព្រះវិហារ។ ប៉ុន្តែពីពេលនេះ បន្តរហូតដល់មុនការបើកកិច្ចប្រជុំ ភាគីថៃដែលកម្ពុជាបានចោទប្រកាន់ថា ឈ្លានពានទឹកដីខ្លួន កំពុងតែព្យាយាមបញ្ចុះបញ្ចូលសមាជិកអាស៊ាន និងជាពិសេសសមាជិកក្រុមប្រឹក្សាសន្តិសុខកុំឲ្យបើកកិច្ចប្រជុំនេះ។ ហេតុអ្វីបានជាថៃរារាំង និងខ្លាចកិច្ចប្រជុំនេះម្ល៉េះ?
ក្រុមអ្នកវិភាគនយោបាយលើកឡើងថា បំណងនៃការរារាំងនេះទី ១ បង្ហាញដល់សហគមន៍អន្តរជាតិថា ជម្លោះព្រំដែនកម្ពុជា-ថៃ គឺអាចដោះស្រាយដោយយន្តការទ្វេភាគីបាន។ ប៉ុន្តែយន្តការទ្វេភាគីត្រូវបានកម្ពុជាបិទទ្វារចោលបាត់ទៅហើយ គឺមានតែពហុភាគី។ ទី២ គឺដោយសារថៃខ្លាចពិភពលោក និងអង្គការសហប្រជាជាតិដឹងពីមហិច្ឆិតាលោភលន់ និងពុតត្បុតអាក្រក់ ល្មោភសង្គ្រាម និងឈ្លានពានមកលើទឹកដីកម្ពុជា។ បើតាមក្រុមមន្ត្រីរដ្ឋាភិបាល និងក្រុមអ្នកវិភាគនយោបាយខ្លះ ការព្យាយាមរបស់ថៃ មិនចង់ឲ្យមានកិច្ចប្រជុំក្រុមប្រឹក្សាសន្តិសុខ គឺគ្រាន់តែចង់បន្តបោកប្រាស់មតិជាតិ និងអន្តរជាតិប៉ុណ្ណោះ ក៏ប៉ុន្តែលេសទាំងអស់នេះ គឺវាហួសសម័យទៅហើយ។
ម្យ៉ាងទៀតថៃមិនចង់ឲ្យជម្លោះនេះធ្លាក់ទៅក្នុងដៃអន្តរជាតិជាថ្មីម្តងទៀត ព្រោះថា ខ្លួនមានបទពិសោធន៍ យ៉ាងអាម៉ាស់នៅតុលាការយុត្តិធម៌អន្តរជាតិទីក្រុងឡាអេនៅឆ្នាំ១៩៦២ម្តងរួចមកហើយ។ ពេលនេះទៀត កម្ពុជាបានទាមទារនូវការបកស្រាយ និងអនុវត្តសាលក្រមឲ្យបានពេញលេញ រួមទាំងស្នើសុំកិច្ចអន្តរាគមន៍ពីអន្តរជាតិនានា គឺបានធ្វើឲ្យថៃវ័ណ្ឌក កាន់តែខ្លាំងក្នុងសំណុំរឿងព្រំដែនជាមួយកម្ពុជា។ ការរារាំងនេះក៏បង្ហាញកាន់តែច្បាស់ថា ថៃពិតជាមិនបានបំភ្លេចចោលនូវចេតនាចង់បានប្រាសាទព្រះវិហារខ្មែរ និងទឹកដីខ្មែរនៅក្នុងតំបន់នោះដោយគូស និងប្រើប្រាស់ផែនទីជាឯកតោភាគីរបស់ខ្លួនដើម្បីយកទឹកដីខ្មែរ ប្រាសចាកពីកិច្ចព្រមព្រៀងអន្តរជាតិនានាដែលខ្លួនបានយល់ព្រម និងអនុវត្តតាម។ ម្យ៉ាងទង្វើរបស់ថៃដែលកំពុងតែធ្វើ បង្ហាញយ៉ាងច្បាស់ថា កំពុងតែរំលោភច្បាប់អន្តរជាតិនានា ក្នុងនោះមានការបាញ់បំផ្លាញប្រាសាទព្រះវិហារ បេតិកភណ្ឌពិភពលោក និងការប្រើប្រាស់គ្រាប់បែកចង្កោមដែលពិភពលោកហាមឃាត់ជាដើម។
ដូច្នេះការប្រជុំរបស់ក្រុមប្រឹក្សាសន្តិសុខអង្គការសហប្រជាជាតិបញ្ជាក់ឲ្យឃើញច្បាស់ថាថៃកំពុងតែបាក់ មុខបាក់មាត់នៅក្នុងសហគមន៍អន្តរជាតិ ដោយគេដឹងថា ថៃគឺជាប្រទេសឈ្លានពានប្រទេសជិតខាងខ្លួន និងរំលោភ លើច្បាប់អន្តរជាតិនានា។ ថៃគ្មានអ្វីក្រៅពីការលើកឡើងថា ការចុះប្រាសាទព្រះវិហារចូលក្នុងបញ្ជីបេតិកភណ្ឌពិភពលោក និងគម្រោងអភិវឌ្ឍន៍តំបន់នោះបានបង្កភាពតានតឹង និងជម្លោះប្រដាប់អាវុធរវាងកម្ពុជាថៃ។ ការលើកឡើង ដែលគ្រាន់តែជាសេសប៉ុណ្ណោះ ប៉ុន្តែតាមពិតក្រុមអ្នកវិភាគបានលើកឡើងថា ថៃបានព្យាយាមបង្វែរវិបត្តិនយោបាយ ផ្ទៃក្នុងខ្លួនមកជាយដែន ហើយបន្តមហិច្ឆតាលេបត្របាក់ទឹកដីខ្មែរ។
សម្រាប់កម្ពុជា កិច្ចប្រជុំនេះគឺជាជោគជ័យផ្នែកការងារការទូតមួយប្រឆាំងនឹងប្រទេសថៃ ដោយសារថាថៃ កំពុងតែបរាជ័យជាបន្តបន្ទាប់ក្នុងនយោបាយការទូត និងមិនអាចបញ្ចុះបញ្ចូលសមាជិកនានាលុបចោលកិច្ចប្រជុំក្រុមប្រឹក្សាសន្តិសុខបាន។ ប៉ុន្តែសំណួរចោទសួរថា តើកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិនេះនឹងជួយស្វែងរកដំណោះស្រាយចុងក្រោយមួយសម្រាប់ជម្លោះព្រំប្រទល់ដែនរវាងកម្ពុជា-ថៃដែលបានកើតឡើងជាយូរមកហើយនេះបានឬទេ? លទ្ធផលពិតជាមិនទាន់ដឹងនៅឡើយទេ ដោយរង់ចាំអ៊ុតមើលលទ្ធផលនៅថ្ងៃចន្ទ។
ប៉ុន្តែអ្វីដែលក្រុមប្រឹក្សាសន្តិសុខត្រូវពិនិត្យ គឺមិនមែនត្រឹមតែដើម្បីបញ្ចប់សង្គ្រាមយោធារវាងកម្ពុជាថៃ នៅតំបន់ប្រាសាទព្រះវិហារទេ ប៉ុន្តែត្រូវមានការធានាពីអន្តរជាតិចំពោះប្រទេសកម្ពុជា និងការពារមិនឲ្យមានជម្លោះ ប្រដាប់អាវុធទាំងតូចទាំងធំតាមបណ្តោយព្រំដែនរួមគ្នាជាង ៨០០ គីឡូម៉ែត្រ ព្រមទាំងការប្រើប្រាស់ផែនទីស្របច្បាប់ និងការបញ្ចប់ការបោះបង្គោលព្រំដែនរួមផងដែរ។ កម្ពុជាក៏ត្រូវបង្កើនកិច្ចខិតខំប្រឹងប្រែងរបស់ខ្លួនដើម្បីបញ្ចប់ជម្លោះដ៏រ៉ាំរ៉ៃរវាងខ្មែរ-ថៃ នៅតំបន់ប្រាសាទព្រះវិហារនេះដែរ ហើយក៏ជា អ្វីដែលពលរដ្ឋខ្មែរចង់បាន ព្រោះថាកម្ពុជាបានទទួលរងគ្រោះសង្គ្រាមជាង៣០ឆ្នាំមកហើយ មិនចង់ឃើញឡើយសង្គ្រាមបង្ហូរឈាមគ្នា។ ចំណែកឯថៃក៏ត្រូវបង្ហាញ ឆន្ទៈធ្វើជាអ្នកជិតខាងល្អ មិនបង្កសង្គ្រាម និងការឈ្លានពានកម្ពុជាដែរ។
សុរបមកវិញ អ្វីដែលថៃព្យាយាមរារាំងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ គឺគ្រាន់តែដើម្បី ពន្យារពេលការរកដំណោះស្រាយលើជម្លោះព្រំដែនកម្ពុជា-ថៃ និងដើម្បីបានផលចំណេញនយោបាយសម្រាប់ក្រុម អាវលឿង និងប្រជាប្រិយភាពរបស់នាយករដ្ឋមន្ត្រីអាភីស៊ីតសម្រាប់ការបោះឆ្នោតនាពេលខាងមុខ ហើយនឹងការប៉ុន ប៉ងម្តងហើយម្តងទៀតដើម្បីទាមទារទឹកដីកម្ពុជាតែប៉ុណ្ណោះ។ ប៉ុន្តែមហិច្ឆតានេះត្រូវបានបរាជ័យនៅពេលដែលកម្ពុជា បានផ្លាស់ប្តូរជំហរយ៉ាងលឿនពីយន្តការទ្វេភាគីមកដោះស្រាយបញ្ហាដោយយន្តការអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ