ធនាគារ ពិភពលោកផ្តល់ ៤០លានដុល្លារក្រោយព្យុះកេតសាណា
ធនាគារពិភពលោកបានសម្រេចផ្តល់ជំនួយតម្លៃ៤០លានដុល្លារដល់កម្ពុជា សម្រាប់ការស្តារឡើងវិញនូវហេដ្ឋារចនាសម្ព័ន្ធសង្គមនានាដែលត្រូវបានបំផ្លាញដោយព្យុះកេតសាណាកាលពីខែកញ្ញាឆ្នាំកន្លងទៅ។ កាលពីខែកញ្ញាឆ្នាំមុន ខ្យល់ព្យុះកំបុតត្បូង កេតសាណា បានបោកបក់លើប្រទេសកម្ពុជា ដែលធ្វើឲ្យខូចខាតទ្រព្យសម្បត្តិរដ្ឋ និងឯកជនក្នុងខេត្តចំនួន៨នៃប្រទេសកម្ពុជាដែលគិតជាទឹកប្រាក់មានតម្លៃប្រមាណ១៣១លានដុល្លារអាមេរិក៕
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច
ធនាគារពិភពលោកបានសម្រេចផ្តល់ជំនួយ៤០លានដុល្លារដល់កម្ពុជា ដើម្បីស្តារហេដ្ឋារចនាសម្ព័ន្ធ និងជួយដល់ប្រជាជនរងគ្រោះដែលត្រូវបានបំផ្លាញដោយព្យុះកំណាចកេតសាណា។ ក្នុងជំនួយ៤០លានដុល្លារនេះ ពាក់កណ្តាលជាជំនួយឥតសំណង និងពាក់កណ្តាលទៀតគឺជាកំចីឥតការប្រាក់។
យោងតាមសេចក្តីប្រកាសព័ត៌មានរបស់ធនាគារពិភពលោកដែលចេញផ្សាយកាលពីថ្ងៃទី២វិច្ឆិកាម្សិលមិញ ជំនួយរបស់ធនាគារពិភពលោកនេះ នឹងត្រូវប្រើប្រាស់ជាបន្ទាន់ទៅលើគម្រោងស្តារឡើងវិញនូវសេវាដឹកជញ្ជូន ការផ្គត់ផ្គង់ទឹក និងអនាម័យដល់ប្រជាពលរដ្ឋក្រីក្ររងគ្រោះដោយព្យុះកេតសាណា។ ជំនួយទាំងនេះ ក៏នឹងត្រូវប្រើដើម្បីការជួយពង្រឹងសមត្ថភាពភ្នាក់ងាររដ្ឋាភិបាល ក្នុងការត្រៀមជាស្រេច និងការគ្រប់គ្រងគ្រោះមហន្តរាយ។
លោក ឈីម៉ាវ ហ្វាន់ ប្រធានគ្រប់គ្រងធនាគារពិភពលោកប្រចាំកម្ពុជា បានលើកឡើងក្នុងសេចក្តីប្រកាសព័ត៌មានថា ព្យុះកេតសាណាបានបំផ្លាញការរស់នៅរបស់ប្រជាជនកម្ពុជារាប់ពាន់នាក់ ពិសេសប្រជាជនក្រីក្រ។ លោកបន្តថា ជំនួយនេះនឹងជួយស្តារហេដ្ឋារចនាសម្ព័ន្ធ ដែលខូចខាតឡើងវិញដូចជា ផ្លូវលំជនបទ និងផ្តល់សេវាកម្មមូលដ្ឋានដល់ប្រជាជនដែលទទួលរងគ្រោះ ពិសេសនៅជនបទ។
កាលពីខែកញ្ញា ឆ្នាំ២០០៩ ខ្យល់ព្យុះកំបុតត្បូង កេតសាណា បានបោកបក់លើប្រទេសកម្ពុជា ដែលធ្វើឲ្យខូចខាតនៅតំបន់ខ្លះនៃខេត្តចំនួន៨នៅក្នុងប្រទេសកម្ពុជារួមមាន ខេត្តរតនគិរី ស្ទឹងត្រែង ក្រចេះ កំពង់ចាម កំពង់ធំ សៀមរាប ឧត្តរមានជ័យ និងខេត្តព្រះវិហារ។ ពលរដ្ឋចំនួន ៥៣៣៦គ្រួសារ ត្រូវបានជម្លៀស មនុស្ស៦៧នាក់បានទទួលរងរបួស និង២៤នាក់បានស្លាប់។ ចំណែកសាលារៀនចំនួន១៤០ទទួលរងប៉ះពាល់ដោយទឹកជំនន់ និងផ្ទៃដីស្រែចំនួនជិត៣ម៉ឺនហិចតា ព្រមទាំងដីដំណាំផ្សេងៗចំនួន២០០០ហិចតាត្រូវបានបំផ្លាញ។
មិនតែប៉ុណ្ណោះ ផ្លូវលំ និងផ្លូវជាតិត្រូវលិចទឹកនិងខូចខាត។ របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបានបង្ហាញថា ទំហំនៃការខូចខាតដែលបណ្តាលមកពីព្យុះកេតសាណា គិតជាទឹកប្រាក់មានតម្លៃសរុបប្រមាណ១៣១ លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ