រដ្ឋាភិបាលបង្ហាញថាស្ថានភាពឧស្សាហកម្មកម្ពុជានៅមានភាពទន់ខ្សោយ ប៉ុន្តែបង្ហាញជំហរអភិវឌ្ឍ
សហគ្រាសខ្នាតតូច មធ្យម បានគ្របដណ្តប់៩៩ភាគរយ នៃចំនួនសហគ្រាសទាំងអស់នៅកម្ពុជា។ វិស័យនេះកំពុងតែដើរតួនាទីយ៉ាងសំខាន់ក្នុងការជំរុញឲ្យមានកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាជន។ នេះគឺជាការលើកឡើងរបស់រដ្ឋលេខាធិការក្រសួងឧស្សាហកម្មនិងសិប្បកម្ម ក្នុងឱកាសបើកទិវាសប្តាហ៍សហគ្រិនពិភពលោកក្រោមប្រធានបទស្ត្រីក្នុងបរិបទការងារប្រកួតប្រជែង នៅមជ្ឈមណ្ឌលសហប្រតិបត្តិការកម្ពុជាជប៉ុនCJCC នៅរសៀលថ្ងៃសៅរ៍ទី២១វិច្ឆិកានេះ។ ប៉ុន្តែរដ្ឋលេខាធិការូបនេះ ក៏បានបង្ហាញដែរថា ស្ថានភាពឧស្សាហកម្មកម្ពុជានៅមានភាពទន់ខ្សោយនៅឡើយ។
ចុះផ្សាយនៅថ្ងៃ៖
ស្តាប់ - ០២:១២
ស្ថានភាពឧស្សាហកម្មកម្ពុជានៅមានភាពទន់ខ្សោយ ដែលឆ្លុះបញ្ចាំងពីរចនាសម្ព័ន្ធផលិតកម្មសាមញ្ញ និងតូចចង្អៀត ព្រមទាំងប្រមូលផ្តុំជុំវិញផលិតផលសម្លៀកបំពាក់ និងការកែច្នៃអាហារ មូលដ្ឋានផលិតកម្ម ភាគច្រើនមានលក្ខណៈគ្រួសារ និងកង្វះសហគ្រិនភាព ក៏ដូចជាការប្រើប្រាស់បច្ចេកវិទ្យានៅមានកម្រិត មិនទាន់មានសមត្ថភាពប្រកួតប្រជែងក្នុងទីផ្សារអន្តរជាតិ។ នេះគឺជាការបង្ហាញរបស់លោកស្រី ឡាយ ណាវីន រដ្ឋលេខាធិការក្រសួងឧស្សាហកម្មនិងសិប្បកម្ម។
លោកស្រីឡាយ ណាវីនបានបន្តទៀតថា ក្នុងចំណោមសហគ្រាសប្រមាណជា៥១ម៉ឺន ដែលបានជំរឿន សហគ្រាសខ្នាតធំជិត ៦៣% ជាការវិនិយោគបរទេស និងសហគ្រាសខ្នាតមធ្យមមាន ៣៧, ១៤ ភាគរយ។ ដោយឡែកកម្ពុជាជាម្ចាស់កម្មសិទ្ធលើសហគ្រាសខ្នាតមីក្រូ មានរហូតដល់ ៩៩ ភាគរយ និងខ្នាតតូចមាន៩៤ ភាគរយ។ ឧទាហរណ៍ ក្នុងវិស័យកាត់ដេរ ដែលអភិវឌ្ឍជិត២០ឆ្នាំមកហើយ ប៉ុន្តែសហគ្រិនកម្ពុជាមានតិចតួចនៅឡើយ។
ភាពទន់ខ្សោយនៃសហគ្រិនភាព ឆ្លុះបញ្ចាំងតាមរយៈភាពក្មេងខ្ចី និងកម្រិតកម្មសិទ្ធលើសហគ្រាស។ ជិតពាក់កណ្តាលសហគ្រាសទាំងអស់ ដែលមានចំនួន ៤២ ភាគរយ ដែលកំពុងដំណើរការនៅកម្ពុជាទើបបានបង្កើតឡើងចាប់ពីឆ្នាំ ២០០៨ ។ លោកស្រីរដ្ឋលេខាធិការ បញ្ជាក់ទៀតថា សហគ្រិនកម្ពុជា នៅមិនទាន់រៀបចំខ្លួនបានល្អ ដើម្បីក្តាប់យកឱកាសសេដ្ឋកិច្្ចកើតចេញពីចរន្តថ្មីៗ នៃការវិឌ្ឍន៍សេដ្ឋកិច្ច នយោបាយពិភពលោក និងតំបន់។ បន្ថែមពីនេះទៀតក៏មាន កិច្ចសហការជាមួយនិងអ្នកវិនិយោគខាងក្រៅ ដើម្បីប្រើប្រាស់សក្តានុពលក្នុងស្រុកឲ្យបានពេញលេញ នឹងរួមចំណែកដល់ការបង្កើនភាពប្រកួតប្រជែង តាមរយៈការកៀរគរទុនវិនិយោគ ការរៀនសូត្របទពិសោធន៍អន្តរជាតិ និងការផ្ទេរបច្ចេកវិទ្យាថ្មីៗ ។
លោកស្រីឡាយ ណាវីនបានបង្ហាញពីគោលជំហរ ដើម្បីពង្រឹងវិស័យឧស្សាហកម្មនៅកម្ពុជាតាមរយៈ៤ចំណុចសំខាន់ៗ ដែលមានដូចជាការជំរុញឧស្សាហកម្មកែច្នៃកសិផល សមាហរណកម្មទៅនឹងបណ្តាញផលិតកម្មក្នុងតំបន់ ក្នុងក្របខ័ណ្ឌសហគមន៍សេដ្ឋកិច្ចអាស៊ាន ការតម្រង់ទិសការអភិវឌ្ឍន៍តំបន់ឧស្សាហកម្ម ដើម្បីធានាបាននូវភាពប្រមូលផ្តុំ ការតភ្ជាប់សេដ្ឋកិច្ច និងប្រសិទ្ធភាពសេវាដឹកជញ្ជូន ឡូជីស្ទីក និងការផ្គត់ផ្គង់អគ្គិសនី ព្រមទាំងហេដ្ឋារចនាសម្ព័ន្ធគាំទ្រ និងការលើកទឹកចិត្តដល់ការបង្កើតតំបន់សេដ្ឋកិច្ចពិសេស។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ