កូរ៉េខាងត្បូង អាចនឹងពន្យារពេលបើកការិយាល័យទំនាក់ទំនង នៅកូរ៉េខាងជើង
នៅថ្ងៃទី២៧ ខែសីហានេះ កូរ៉េខាងត្បូង បានប្រកាសពន្យារពេលបើកការិយាល័យទាក់ទង នៅក្នុងទឹកដីកូរ៉េខាងជើង។ ការប្រកាសបែបនេះ គឺធ្លាយចេញពីមាត់របស់អ្នកនាំពាក្យវិមានបៃតង និងដែលធ្វើឡើង បន្ទាប់ពីប្រធានាធិបតីអាមេរិកលុបចោលដំណើរទស្សនកិច្ចនៃប្រមុខការទូត Mike Pompeo ទៅកូរ៉េខាងជើង។ អ្នកនាំពាក្យវិមានប្រធានាធិបតីកូរ៉េខាងត្បូង មិនអាចអះអាងបានទេថា ការពន្យារពេលនេះ គឺគ្មានផលប៉ះពាល់នោះ។ ក៏ប៉ុន្តែ រដ្ឋបាលក្រុងស៊េអ៊ូល កំពុងតែតាមដានការវិវត្តថ្មីៗទៀត នៃសភាពការណ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
បើទោះបីជាសម្ភារៈបរិក្ខារសម្រាប់ទីស្នាក់ការការិយាល័យទាក់ទងគ្នានោះ បានត្រូវបញ្ជូនទៅខ្លះហើយក៏ដោយ តែការពន្យារពេលបើកការិយាល័យនេះ គឺអាចជាសញ្ញាណនៃការតានតឹងគ្នាជាថ្មី របស់ឧបទ្វីបកូរ៉េ និងសម្ព័ន្ធមិត្ត។
សូមជ្រាបថា កាលពីសប្តាហ៍មុននេះ ប្រធានាធិបតីអាមេរិក លោក ដូណាល់ ត្រាំ បានប្រកាសលុបចោលដំណើររបស់រដ្ឋមន្ត្រីបរទេសរបស់ខ្លួន ទៅកូរ៉េខាងជើង។ ការប្រកាសដូច្នេះ គឺធ្វើឡើង ក្រោយពីទីភ្នាក់ងារស៊ើបអង្កេតសំណុំរឿងនុយក្លេអ៊ែរកូរ៉េខាងជើងរបស់អង្គការសហប្រជាជាតិ បានរាយការណ៍ថា កូរ៉េខាងជើង មិនបានរំសាយគម្រោងផលិតថាមពលនុយក្លេអ៊ែរនោះទេ ផ្ទុយទៅវិញ គឺរឹងរឹតតែពីប្រឹងអភិវឌ្ឍទៅមុខថែមទៀត។
ជាប្រតិកម្មភ្លាមៗ របបក្រុងព្យុងយ៉ាង បានចោទប្រកាន់អាមេរិក ថាមានពុតព្បុត ហើយនិងបានចង្អុរមុខអាមេរិក ទៀតថា កំពុងតែលេងល្បែងចាប់ដៃជាន់ជើង។ នៅពីម្ខាង អាមេរិកខំប្រឹងធ្វើចរចា និងលួងលោមឲ្យកូរ៉េខាងជើងរំសាយនុយក្លេអ៊ែរ។ ប៉ុន្តែពីម្ខាងទៀត អាមេរិកពឺតតែពីខំប្រឹងពង្រឹងកាណុងយោធា តម្រង់ឆ្ពោះមកផ្ជុងកូរ៉េខាងជើង តាមរយៈទ័ពជើងទឹករបស់ខ្លួន ដែលកំពុងឈរជើងនៅជប៉ុន និងកូរ៉េខាងត្បូង។
ទោះយ៉ាងណាក៏ដោយ ជំហររបស់របបក្រុងស៊េអូល, គឺកូរ៉េខាងត្បូង ចង់ឲ្យកិច្ចចរចាគ្នារវាងកូរ៉េទាំងពីរ នៅតែបន្តមានជីវិត ខណៈដែលជំនួបកំពូលរវាងបងប្អូនកូរ៉េទាំងពីរ គ្រោងនឹងត្រូវរៀបចំនៅខែកញ្ញា ខែក្រោយនេះ។ ក៏ប៉ុន្តែ ប្រសិនបើភាពតានតឹងគ្នារវាងអាមេរិកនិងកូរ៉េខាងជើងផ្ទុះឡើងវិញកាន់តែខ្លាំង នោះកិច្ចសន្ទនាទៅរកសន្តិភាពរបស់កូរ៉េទាំងពីរ ប្រហែលជាគ្មានផ្លូវឃើញពន្លឺឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ