ក្រសួងការងារបំភ្លឺពីការតាក់តែងច្បាប់ស្តីពីសហជីព ក្រោយពីសហជីពប្រតិកម្ម
នៅថ្ងៃទី២៩ ខែឧសភា ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីប្រកាសមួយ ដើម្បីបំភ្លឺចំពោះការរៀបចំតាក់តែងច្បាប់ស្តីពីសហជីព។ ការតាក់តែងច្បាប់នេះ ត្រូវបានសហជីពក្នុងប្រទេសកម្ពុជាមួយចំនួន លើកឡើងថារឹតបន្តឹងសកម្មភាពរបស់ខ្លួន ក្នុងដំណើរបេសកកម្មជួយកម្មកររោងចក្រ។ តែក្រសួងថាច្បាប់នេះ គឺមានប្រយោជន៍សម្រាប់កម្មករ។
ចុះផ្សាយនៅថ្ងៃ៖
ស្តាប់ - ០២:១១
ការប្រតិកម្មនឹងការលើកឡើងរបស់សហជីពមួយចំនួនក្នុងប្រទេសកម្ពុជា ក្រសួងការងារ និងបណ្តុះបណ្តាលវិជ្ជាជីវៈ បានចេញសេចក្តីប្រកាសព័ត៌មានមួយ ស្តីពីការរៀបចំតាក់តែងច្បាប់ស្តីពីសហជីពកាលពីថ្ងៃទី២៩ ខែឧសភា ម្សិលមិញនេះ។ ក្រសួងការងារបានបញ្ជាក់ តាមរយៈសេចក្តីប្រកាសព័ត៌មាននោះថា ការតាក់តែងច្បាប់សហជីពក្នុងរយៈពេល៧ឆ្នាំមកនេះ នឹងជិតដល់ពេល ដែលត្រូវដាក់ឲ្យគណៈរដ្ឋមន្ត្រីត្រួតពិនិត្យ រួមទាំងបញ្ជូនទៅសភា ដើម្បីអនុម័តហើយ។ ម្យ៉ាងវិញទៀត ច្បាប់នេះបានអនុញ្ញាតឲ្យគ្រប់ភាគីពាក់ព័ន្ធទាំងអស់ចូលរួមជជែកពិភាក្សាជាច្រើនលើកច្រើនសារទៀតផង។
ការតាក់តែងច្បាប់ស្តីពីសហជីពនេះ គឺបានធ្វើឡើងដោយមានការសហការជាមួយនឹងអង្គការអន្តរជាតិខាងការងារ ILO និងបានរៀបចំសិក្ខាសាលាពិគ្រោះយោបល់ជាសាធារណៈចំនួន ០៧លើករួចមកហើយ ហើយមតិយោបល់របស់ភាគីនីមួយៗ ត្រូវបានយកមកបញ្ចូលក្នុងខ្លឹមសារនៃសេចក្តីព្រាងច្បាប់នេះ ក្នុងនោះក្រុមសហជីព ដែលកំពុងជំទាស់នឹងច្បាប់នេះ ក៏បានចូលរួមពិភាក្សាដែរ។ នេះបើតាមការបញ្ជាក់របស់ក្រសួងការងារ និងបណ្តុះបណ្តាលវិជ្ជាជីវៈ។
លោកអាត់ ធន់ ប្រធានសហជីពសេរីកម្មករនៃព្រះរាជាណាចក្រកម្ពុជា បានបញ្ជាក់ថាការតាក់តែងច្បាប់នេះគឺខាងសហជីពរបស់លោកបានចូលរួមមែន ប៉ុន្តែការចូលរួមនោះគឺវាមានរយៈពេលយូរឆ្នាំមកហើយ ដែលមកដល់ពេលនេះច្បាប់នេះអាចនឹងមានការកែប្រែ ដើម្បីរឹតបន្តឹងទៅលើសកម្មភាពរបស់សហជីពមួយចំនួនក្នុងប្រទេសកម្ពុជា។
បើតាមការសេចក្តីប្រកាសព័ត៌មានដដែលឲ្យដឹងថា ច្បាប់នេះតាក់តែងឡើងក្នុងគោលបំណងការពារសិទ្ធិ និងផលប្រយោជន៍ស្របច្បាប់របស់បងប្អូន កម្មករ ធានានូវសិទ្ធិសេរីភាពនៃអង្គការវិជ្ជាជីវៈរបស់កម្មករ និងនិយោជក ជំរុញឲ្យមានទំនាក់ទំនងល្អរវាងនិយោជក សហជីព និងកម្មករ។ ក្រៅពីនេះ ក៏មានចំណែកចូលរួមលើកកំពស់ផលិតភាព ដើម្បីអភិវឌ្ឍប្រទេសជាតិ និងលើកកម្ពស់កម្រិតជីវភាពរបស់និយោជិតផងដែរ។
ចំណែកអគ្គលេខាធិការងសមាគមន៍រោងចក្រកាត់ដេរកម្ពុជា(GMAC) លោកកាំង ម៉ូនីកា បានបញ្ជាក់ថាការបង្កើតច្បាប់នេះ គឺមានតួនាទីការពារទាំងអ្នកវិនិយោគ និងកម្មករ ហើយច្បាប់នេះក៏អាចបញ្ឈប់រាល់ជនខិលខូចដែលលួចជ្រកក្រោមស្លាកសហជីពផងដែរ។ សូមបញ្ជាក់ថារហូតមកដល់ពេលនេះ ក្នុងប្រទេសកម្ពុជាមានសហជីពប្រហែលជិត៤០០០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ