សកម្មជនដីធ្លីសហគមន៍បឹងកក់ទាមទារឲ្យដោះលែងអ្នកស្រីទេព វន្នី
នៅព្រឹកនេះ ក្រុមសកម្មជនដីធ្លីសហគមន៍បឹងកក់ប្រមាណ៤០នាក់បានធ្វើសន្និសីទកាសែត និងយុទ្ធនាការថ្ងៃចន្ទពណ៌ខ្មៅទាមទារឲ្យដោះលែងស្រី្តសកម្មជនដីធ្លីសហគមន៍បឹងកក់អ្នកស្រីទេព វន្នី និងមន្ត្រីការពារសិទ្ធិមនុស្ស ដែលកំពុងជាប់ឃុំនៅពន្ធនាគារ។ អ្នកស្រីទេព វន្នី នឹងត្រូវបង្ហាញខ្លួនក្នុងសវនាការនៅថ្ងៃទី ១៩ កញ្ញា ២០១៦ ដែលជាប់ចោទពីបទប្រមាថរាជការសាធារណៈ និងប្រឆាំងអ្នករាជការសាធារណៈមានស្ថានទម្ងន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
សកម្មជនដីធ្លីសហគមន៍បឹងកក់ និងអ្នកស្រីបូវ សោភា ដែលទើបតែត្រូវបានដោះលែងពីពន្ធនាគារ ក្រោយពេលជាប់ឃុំរយៈ៦ថ្ងៃនោះ នៅថ្ងៃនេះបានធ្វើសន្និសីទកាសែត និងយុទ្ធនាការថ្ងៃចន្ទពណ៌ខ្មៅ សប្តាហ៍ទី១៧។ គោលបំណងនៃសន្និសីទកាសែត និងយុទ្ធនាការថ្ងៃចន្ទពណ៌ខ្មៅថ្ងៃនេះ គឺទាមទារឲ្យដោះលែងអ្នកស្រីទេព វន្នី ទម្លាក់ចោលការចោទប្រកាន់លើសកម្មជនដីធ្លីសហគមន៍បឹងកក់ទាំងអស់ ដោះលែងមន្ត្រីការពារសិទ្ធិមនុស្សអាដហុកទាំង៤រូប និងមន្ត្រីគ.ជ.បម្នាក់ ទាមទារឲ្យមានការដោះស្រាយបញ្ហាដីធ្លី ដែលនៅសល់១៩គ្រួសារទៀត។ នេះបើតាមអ្នកស្រីបូវ សោភា។
អ្នកស្រីបានបន្ថែមថាសកម្មជនដីធ្លីសហគមន៍បឹងកក់២នាក់ទៀត នឹងត្រូវតុលាការកោះហៅឲ្យចូលខ្លួននៅថ្ងៃទី១៩ ខែកញ្ញា។ សកម្មជនបឹងកក់ទាំង២នាក់នោះ រួមមានអ្នកស្រីបូ ឆវី និងអ្នកស្រីគង់ ចន្ឋា។ ដូចច្នេះ ការបើកសវនាការនៅថ្ងៃទី១៩ កញ្ញា ខាងមុខនេះ សកម្មជនបឹងកក់៣នាក់អាចនឹងត្រូវបង្ហាញខ្លួន ដែលក្នុងនោះក៏មានអ្នកស្រីទេព វន្នីផងដែរ។ យ៉ាងណាមិញដីកាសម្រាប់កោះហៅសកម្មជនដីធ្លីទាំង២នាក់នេះមិនទាន់មាននោះទេ។
អ្នកស្រីបូវ សោភា បានបញ្ជាក់ថាអ្នកស្រីបូ ឆវី និងអ្នកស្រីគង់ ចន្ថាត្រូវបានចោទប្រកាន់ពីបទជេរប្រមាថ និងប្រើហិង្សាលើមន្ត្រីសាធារណៈ តាំងពីឆ្នាំ២០១១មកម្លេះ។
នៅព្រឹកថ្ងៃទី២៩ ខែសីហានេះ វិទ្យុបារាំងអន្តរជាតិមិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញបានទេ ជុំវិញគម្រោងកោះហៅស្ត្រីសកម្មជនដីធ្លីពីរនាក់ទៀត ដោយអ្នកនាំពាក្យសាលាដំបូងរាជធានីភ្នំពេញ បញ្ជាក់ថាលោកកំពុងតែជាប់ប្រជុំ។
សូមបញ្ជាក់ថាអ្នកស្រីទេព វន្នី រួមទាំងអ្នកស្រីបូវ សោភាផង ត្រូវបានអាជ្ញាធរចាប់ខ្លួន ក្នុងពេលដែលពួកគាត់កំពុងធ្វើយុទ្ធនាការថ្ងៃចន្ទពណ៌ខ្មៅក្នុងសប្តាហ៍ទី១៥ កាលពីថ្ងៃទី១៥ ខែសីហា កន្លងទៅ។ ក្រោយមកតុលាការបានសម្រេចកាត់ទោសអ្នកទាំងពីរ ពីបទប្រមាថ និងផ្តន្ទាទោស៦ថ្ងៃ ពិន័យជាប្រាក់៨ម៉ឺនរៀល។ អ្នកស្រីបូវ សោភាត្រូវបានដោះលែងនៅថ្ងៃទី២២ ខែសីហា ក្រោយសាលាដំបូងរាជធានីភ្នំពេញកាត់ទោស។
ដោយឡែក អ្នកស្រីទេព វន្នី មិនត្រូវបានដោះលែងទេ ដោយតុលាការបានសម្រេចឃុំខ្លួនបណ្តោះអាសន្ន និងបន្តសវនាការ ដោយជាប់ចោទពីបទ ប្រមាថរាជការសាធារណៈ និងប្រឆាំងអ្នករាជការសាធារណៈមានស្ថានទម្ងន់។ អ្នកស្រីទេព វន្នី នឹងត្រូវបង្ហាញខ្លួននៅសវនាការ នៅថ្ងៃទី ១៩ កញ្ញា ២០១៦ ពេលព្រឹក ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ