រដ្ឋមន្ដ្រីក្រសួងព័ត៌មាន៖ សេចក្ដីព្រាងច្បាប់ស្ដីពីសិទ្ធិទទួលបានព័ត៌មាន ត្រូវការពេលយ៉ាងតិច៣ឆ្នាំ និងចំណាយជិត១លានដុល្លារ
នៅក្នុងពិធីបិទវេទិកានិពន្ធនាយក កាលពីព្រលប់ថ្ងៃចន្ទម្សិលមិញ លោកខៀវ កាញារីទ្ធ រដ្ឋមន្ដ្រីក្រសួងព័ត៌មាន បានបង្ហើបឲ្យដឹងថា សេចក្ដីព្រាងច្បាប់ស្ដី ពីសិទ្ធិទទួលបានព័ត៌មាន នឹងត្រូវចំណាយពេលយ៉ាងហោចណាស់៣ឆ្នាំ គិតចាប់ពីឆ្នាំ២០១៤តទៅ។ ក្នុងនោះ ក្រសួងក៏ត្រៀមថវិកាចំណាយជិត១លានដុល្លារ ដើម្បីរៀបចំសិក្ខាសាលាជាច្រើន រួមទាំងការចុះស្រាវជ្រាវជាដើម។ ថវិកាជិត១លានដុល្លារ និងរយៈ ពេល៣ឆ្នាំ ដែលក្រសួងត្រូវការ ដើម្បីបញ្ចប់សេចក្ដីព្រាងច្បាប់នេះ ត្រូវបានសង្គមស៊ីវិលរិះគន់ថា ច្រើនហួសហេតុ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
សេចក្ដីព្រាងច្បាប់ស្ដីពីសិទ្ធិទទួលបានព័ត៌មាន ត្រូវការពេលយ៉ាងហោចណាស់៣ឆ្នាំ ដើម្បីតាក់តែង និងចំណាយជិត១លានដុល្លារ។ នេះជាការបញ្ជាក់របស់លោកខៀវ កញារីទ្ធិ រដ្ឋមន្ដ្រីក្រសួងព័ត៌មាន ដែលជាក្រសួងទទួលបន្ទុកតាក់តែងសេចក្ដីព្រាងច្បាប់ ស្ដីពីសិទ្ធិទទួលបានព័ត៌មាន។
នៅខែមករា ឆ្នាំ២០១៤ ក្រសួងព័ត៌មាន នឹងចុះកិច្ចព្រមព្រៀងជាមួយអង្គការយូនេសស្កូ ដើម្បី ចាប់ផ្ដើមដំណើរការតាក់តែងសេចក្ដីព្រាងច្បាប់ ស្ដីពីសិទ្ធិទទួលបានព័ត៌មាន។ ការតាក់តែងនេះ ត្រូវការរយៈពេល៣ឆ្នាំ និងថវិកាចំណាយជិត១លានដុល្លារ ដើម្បីចុះស្រាវជ្រាវ ចងក្រង ពិភាក្សា និងពិគ្រោះយោបល់ជាមួយអ្នកជំនាញពីប្រទេសស៊ុយអែត ដែលជាប្រទេសដែលមានសេរីភាពសារព័ត៌មានល្អជាងគេ។ ក្នុងនោះ ក្រសួងក៏ត្រៀមរៀបចំសិក្ខាសាលាជាច្រើន ដោយបើកទូលាយឲ្យមានការចូលរួមពីស្ថាប័ននានា រួមមានសមាគមអ្នកកាសែត អង្គការសង្គមស៊ីវិលផ្នែកសិទ្ធិមនុស្សជាតិ និងអន្ដរជាតិជាដើម។
លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានសម្ដែងការស្វាគមន៍ចំពោះស្មារតីរបស់ក្រសួង ដែលត្រៀមរៀបចំសេចក្ដីព្រាងច្បាប់ ស្ដីពីសិទ្ធិទទួលបានព័ត៌មាន ឲ្យមានការចូលរួមពីគ្រប់ភាគីពាក់ព័ន្ធទាំងអស់។
ប៉ុន្តែ លោកបានរិះគន់ថា ថវិកាចំណាយ១លានដុល្លារ ដែលក្រសួងត្រៀមសម្រាប់ការងារនេះ វាច្រើនហួស។ បើតាមបទពិសោធន៍របស់ក្រុមការងារលោក ថវិកាប្រមាណតែ១សែនដុល្លារ វាគ្រប់គ្រាន់ពេកហើយ សម្រាប់ការព្រាងសេចក្ដីព្រាងច្បាប់មួយ ដោយរួមមានទាំងការរៀបចំសិក្ខាសាលាជាច្រើន។ ប្រសិនបើមានការអញ្ជើញអ្នកជំនាញបរទេស ឲ្យមកចូលរួមក្នុងការតាក់តែងសេចក្ដីព្រាងច្បាប់ ការចំណាយអាចកើនដល់១សែន៥ម៉ឺនដុល្លារ។ នេះបើតាមលោក អ៊ូ វីរៈ។ លោកបន្ថែមថា ការងារនេះ ត្រូវការពេលប្រមាណតែ១ឆ្នាំប៉ុណ្ណោះ បើក្រសួងមានឆន្ទៈពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ