ប្រធានាធិបតីម័រស៊ីធ្វើផ្គើនយោធាដោយចេញក្រឹត្យរៀបចំសភាអេហ្ស៊ីបឲ្យមានសុពលភាពឡើងវិញ
៨ថ្ងៃក្រោយពីបានចូលកាន់កាប់តំណែង ប្រធានាធិបតីអេហ្ស៊ីបថ្មីលោក ម៉ូហាមេដ ម័រស៊ី ដែលជាអ្នកអ៊ីស្លាមនិយម បានសម្រេចចេញក្រឹត្យប្រកាសដាក់សភាអេហ្ស៊ីបឲ្យមានសុពលភាពនិងមានសកម្មភាពប្រក្រតីឡើងវិញ។ សភាអេហ្ស៊ីបដែលបានត្រូវរំលាយដោយសេចក្តីសម្រេចចិត្តរបស់តុលាការ។ សេចក្តីសម្រេចចិត្តនេះបានបណ្តាលឲ្យក្រុមភាតរបុត្រអ៊ីស្លាមកើតមានក្តីក្រេវក្រោធយ៉ាងខ្លាំង។ ដូច្នេះនៅថ្ងៃអង្គារទី១០កក្កដានេះ ប្រទេសអេហ្ស៊ីបពិតជាឋិតនៅក្នុងស្ថានភាពនយោបាយមួយដ៏សែនតានតឹង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៣
ប្រធានាធិបតីអេហ្ស៊ីបថ្មីលោក ម៉ូហាមេដ ម័រស៊ី ពុំឲ្យខាតបង់ពេលវេលាឡើយ ៨ថ្ងៃប៉ុណ្ណោះក្រោយពីបានចូលកាន់កាប់តំណែង លោកបានបញ្ចេញសំញែងអនុភាពរបស់អ្នកអ៊ីស្លាមនិយមអេហ្ស៊ីបដាក់ក្រុមប្រឹក្សាជាន់ខ្ពស់នៃកងកម្លាំងយោធា។ ចប់ហើយសុន្ទរកថាដែលពោរពេញដោយការសម្រាលភាពតានតឹងនាឱកាសថ្លែងឡើងកាន់អំណាចនៅថ្ងៃទី៣០មិថុនាកន្លងទៅ។ នៅថ្ងៃអាទិត្យទី៨កក្កដាឆ្នាំ២០១២ នៅខណៈពេលដែល ប្រធានាធិបតីអេហ្ស៊ីបថ្មីលោក ម៉ូហាមេដ ម័រស៊ី បានធ្វើការប្រកាសចេញក្រឹត្យដាក់សភាអេហ្ស៊ីបឲ្យមានសុពលភាពនិងមានសកម្មភាពប្រក្រតីឡើងវិញ គឺលោកប្រធានាធិបតីអេហ្ស៊ីបពិតជាចង់សំញែងកម្លាំងនិងអនុភាពរបស់អ្នកអ៊ីស្លាមនិយមអេហ្ស៊ីបដាក់ក្រុមប្រឹក្សាជាន់ខ្ពស់នៃកងកម្លាំងយោធាដែលជាអ្នកគាំទ្រសេចក្តីសម្រេចចិត្តរបស់តុលាការជាន់ខ្ពស់អេហ្ស៊ីបដែលបានប្រកាសរំលាយសភាអេហ្ស៊ីប។
រឿងរ៉ាវអស់ទាំងនេះកើតមានតាំងពីថ្ងៃទី១៥មិថុនាកន្លងទៅ នៅពេលដែលតុលាការជាន់ខ្ពស់ធម្មនុញ្ញអេហ្ស៊ីបបានប្រកាសសម្រេចពី “អសុពលភាព” នៃរដ្ឋសភាអេហ្ស៊ីប ដោយហេតុថា “មានអាសនៈមួយចំនួនបានត្រូវកាន់កាប់ដោយអ្នកតំណាងរាស្ត្រដែលគ្មានសិទ្ធិគ្រប់គ្រាន់មកឈរឈ្មោះចូលរួមធ្វើការបោះឆ្នោត”។
ទាំងនេះហើយដែលបានធ្វើឲ្យក្រុមភាតរបុត្រអ៊ីស្លាមអេហ្ស៊ីបខឹងក្រេវក្រោធយ៉ាងខ្លាំង។ ក្រុមអ៊ីស្លាមនិយមអេហ្ស៊ីបដែលមានសំឡេងភាគច្រើននៅក្នុងសភាអេហ្ស៊ីបបានមើលឃើញថា សេចក្តីប្រកាសសម្រេចពី “អសុពលភាព” នៃរដ្ឋសភាអេហ្ស៊ីបដោយតុលាការជាន់ខ្ពស់ធម្មនុញ្ញអេហ្ស៊ីបគឺជាទង្វើរបស់ក្រុមយោធាអេហ្ស៊ីបដែលនៅពីក្រោយហើយចង់នៅបន្តក្តោបក្តាប់កាន់កាប់រដ្ឋអំណាច។ ក្រុមភាតរបុត្រអ៊ីស្លាមអេហ្ស៊ីបបាននាំគ្នាចុះថ្នល់ធ្វើបាតុកម្មជាច្រើនថ្ងៃនៅទីលានសេរីភាព “តាហ៍រា” នៅទីក្រុងគែរ។ ចន្លោះពេលនោះ ការបោះឆ្នោតជ្រើសតាំងប្រធានាធិបតីអេហ្ស៊ីបបានប្រព្រឹត្តទៅនៅថ្ងៃទី១៦និង១៧មិថុនាឆ្នាំ២០១២។ ពេញមួយសប្តាហ៍ ប្រទេសអេហ្ស៊ីបទាំងមូលឋិតនៅក្នុងសភាពពុំជាក់ច្បាស់ ដោយគេពុំដឹងថា នរណាជាអ្នកឈ្នះឆ្នោត។ ហើយបន្ថែមពីលើនេះ ក្រុមប្រឹក្សាជាន់ខ្ពស់នៃកងកម្លាំងយោធាអេហ្ស៊ីបបានឆ្លៀតដាក់កម្រិតទៅលើ “អំណាចរបស់ប្រធានាធិបតី”។
ហេតុដូច្នេះហើយបានជាលោក ម៉ូហាមេដ ម័រស៊ី ក្រោយពីបានឈ្នះឆ្នោតជាប្រធានាធិបតីអេហ្ស៊ីបបានតែ៨ថ្ងៃប៉ុណ្ណោះ ក៏បានចេញក្រឹត្យប្រកាសដាក់សភាអេហ្ស៊ីបឲ្យមានសុពលភាពនិងមានសកម្មភាពប្រក្រតីឡើងវិញ។ តើទាំងនេះ ដើម្បីអ្វី? ទាំងនេះគឺពិតជាដើម្បីខាឃាំងកុំឲ្យរដ្ឋអំណាចធ្លាក់ទៅក្នុងកណ្តាប់ដៃរបស់ ក្រុមប្រឹក្សាជាន់ខ្ពស់នៃកងកម្លាំងយោធាអេហ្ស៊ីបតទៅទៀត។
ក្រុមប្រឹក្សាជាន់ខ្ពស់នៃកងកម្លាំងយោធាអេហ្ស៊ីបបានជួបប្រជុំគ្នាជាបន្ទាន់ ប៉ុន្មានម៉ោងប៉ុណ្ណោះក្រោយពីមានសេចក្តីសម្រេចចិត្តរបស់ប្រធានាធិបតីអេហ្ស៊ីប លោកម៉ូហាមេដម័រស៊ី ហើយក្រុមយោធាបានថ្លែងគូសបញ្ជាក់ពី “សារៈសំខាន់ក្នុងការគោរពរដ្ឋធម្មនុញ្ញ” ។ ទាំងនេះបានសេចក្តីថា ក្រុមយោធាចង់និយាយពីរដ្ឋធម្មនុញ្ញដែលពួកគេបានធ្វើការកែទម្រង់ ដើម្បីឲ្យក្រុមយោធាអេហ្ស៊ីបអាចបន្តក្តោបក្តាប់កាន់កាប់អំណាចតទៅទៀត។
រីឯតុលាការជាន់ខ្ពស់ធម្មនុញ្ញវិញ បានប្រកាសតាមរយៈសេចក្តីថ្លែងការណ៍ថា “រាល់សេចក្តីសម្រេចចិត្តរបស់ តុលាការជាន់ខ្ពស់ធម្មនុញ្ញ ពុំអាចតវ៉ាប្រកែកបានឡើយ ហើយត្រូវតែគោរពដោយគ្រប់ស្ថាប័នរបស់រដ្ឋ”។
ទោះជាយ៉ាងណាក៏ដោយ ប្រធានសភាអេហ្ស៊ីប លោក Saad al-Katani ដែលចេញពីក្រុមអ៊ីស្លាមភាតរបុត្របានចេញប្រកាសកោះហៅឲ្យមានកិច្ចប្រជុំនៅសភាអេហ្ស៊ីបនៅថ្ងៃអង្គារទី១០កក្កដាឆ្នាំ២០១២នេះ។
ចំណែកឯអ្នកតំណាងរាស្ត្រចេញពីបក្សយុត្តិធម៌និងសេរីភាព ដែលជាទូកញ្ចក់នយោបាយរបស់ពួកអ៊ីស្លាមភាតរបុត្រថ្លែងប្រកាសថា "ពួកគេគាំទ្រ ប្រធានាធិបតីអេហ្ស៊ីបថ្មីលោក ម៉ូហាមេដ ម័រស៊ី ១០០%"។
ដូច្នេះ ប្រទេសអេហ្ស៊ីបពិតជាកំពុងឋិតនៅក្នុងស្ថានភាព “អស្ថិរភាពនយោបាយ” មួយដ៏គួរឲ្យសែនបារម្ភ។ ចំណែកឯអ្នកឯកទេសខាងច្បាប់វិញ ក៏មានខ្វែងគំនិតនឹងគ្នាដែរពាក់ព័ន្ធនឹងបញ្ហាសភាអេហ្ស៊ីបនេះ។
សូមបញ្ជាក់ថា ប្រធានាធិបតីអេហ្ស៊ីបថ្មីលោក ម៉ូហាមេដ ម័រស៊ី បានថ្លែងសន្យានៅថ្ងៃអាទិត្យទី៨កក្កដាម្សិលម៉្ងៃថា នឹងប្រកាសឲ្យមានការរៀបចំបោះឆ្នោតជ្រើសតាំងសមាជិកសភាថ្មីពីរខែក្រោយពីការបោះឆ្នោតធ្វើប្រជាមតិដើម្បីអនុម័តទទួលយករដ្ឋធម្មនុញ្ញថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ