តើក្រុមចោរអ៊ីនធ័រនែតបានលួចឯកសារអ្វីខ្លះពីក្រុមហ៊ុន Sony Pictures?
ចុះផ្សាយនៅថ្ងៃ៖
ស្តាប់ - ០៤:៣១
កាលពីថ្ងៃទី ២៤ វិច្ឆិការ ឆ្នាំ ២០១៤ កន្លងទៅនេះ ក្រុមចោរអ៊ិនធ័រនែត ដែលគេតែងហៅថា ពួក Hackers បានធ្វើការវាយប្រហារជាទ្រង់ទ្រាយធំលើក្រុមហ៊ុនផលិតកុនហូលីវូដ Sony Pictures។ ឯកសារសំងាត់និងទិន្នន័យបុគ្គលិកទំហំរាប់សែនជីហ្គាបៃរបស់ក្រុមហ៊ុននេះត្រូវបានលួចនិងផ្សព្វផ្សាយជាសាធារណៈតាមអ៊ិនធ័រណេត។ ហេតុការណ៍នេះធ្វើអោយក្រុមហ៊ុនSony Picturesមានក្តីបារម្ភយ៉ាងខ្លាំង។ តើក្រុមចោរ Hackers លួចឯកសារអ្វីខ្លះ?ហើយពួកគេផ្សព្វផ្សាយឯកសារទាំងនោះតាមរបៀបណា?
ក្រោយការវាយប្រហារលើបណ្តាញកុំព្យូទ័ររបស់ក្រុមហ៊ុន Sony Pictures ក្រុមចោរតាមអ៊ីនធ័រនែត ដែលហៅខ្លួនឯងថា ឆ្មាំសន្តិភាព (Guardian of Peace) ធ្លាប់បានប្រកាសថា ពួកគេលួចបានឯកសារសរុបចំនួនប្រមាណ ១១ តេរ៉ាបៃ (ស្មើនឹង ១១ ០០០ ជីហ្គាបៃ)។
ប៉ុន្តែ បើតាមសារព័ត៌មានអាមេរិក ទំហំឯកសារនេះអាចកើនឡើងដល់ទំហំរាប់រយតេរ៉ាបៃ (មានន័យថាស្មើនឹង រាប់សែនជីហ្គាបៃ)។ បើតាមភាសាព័ត៌មានវិទ្យា ទិន្នន័យដ៏ធំបែបនេះស្មើនឹងទំហំឯកសារចំនួនរាប់សែន ឬលានទំព័រ។ ប្រាកដណាស់ វាពិតជាការគំរាមកំហែងមួយដល់ដំណើរការអាជីវកម្មរបស់ក្រុមហ៊ុន Sony Pictures។ ក្រុមហ៊ុនជំនាញផែ្នកសន្តិសុខព័ត៌មានវិទ្យា Risk Based Security បានអោយដឹងថា ឯកសារសំងាត់របស់ក្រុមហ៊ុនផលិតកុនហូលីវូដនេះមានផ្ទុកទិន្នន័យក្រោមទំរង់ជាប្រភេទឯកសារ Excel, Word, Powerpoint និង PDF។
តើក្រុមចោរ Hackers ផ្សព្វផ្សាយឯកសារតាមរបៀបណា?
ដូចក្រុមចោរតាមអ៊ីនធ័រនែតដ៏ទៃទៀត ក្រុមចោរ Hackersលួចឯកសារក្រុមហ៊ុន Sony Pictures ប្រើវិធីតែមួយក្នុងការផ្សព្វផ្សាយឯកសារទាំងនោះ។ មានន័យថាពួកគេយកឯកសារទាំងនោះទៅច្របាច់បញ្ចូលគ្នាតែមួយក្រោមទំរង់ជាឯកសារ RAR ឬ ZIP ហើយ ពួកគេបញ្ជូនឯកសារទាំងនោះចូលទៅក្នុងគេហទំព័រសំរាប់ផ្ទុក និងទាញយកឯកសារ ឬពួកគេប្រើបណ្តាញ Torrent ផ្ទុកឯកសារទាំងនោះ។ ប៉ុន្តែ ដើម្បីអោយសាធារណៈជនអាចទាញយកឯកសារនោះបាន ពួកចោរអ៊ីនធ័រនែតបានដាក់តំណ (ដែលយើងហៅថា Link) សំរាប់ទាញយកឯកសារនៅលើគេហទំព័រមួយ Pastebin។ Pastebin នេះមានលក្ខណៈពិសេសអាចធានាភាពអនាមិកមិនអោយគេស្គាល់ឈ្មោះ និងប្រភពអ្នកសរសេរអត្ថបទលើគេហទំព័ររបស់ខ្លួន។ គេហទំព័រនេះត្រូវបានគេស្គាល់ថាសំរាប់កែរសំរួលអត្ថបទ និងលេខកូដកម្មវិធី។
បន្ទាប់មក ក្រុមចោរផ្ញើរតំណឯកសារលើគេហទំព័រ Pastebin តាមរយៈសារអេឡិចត្រូនិក (ឬ e-mail) ទៅកាន់ជនណាដែលចង់បានឯកសារនោះ។ ជាទូទៅ សមាជិកក្រុមចោរឆ្មាំសន្តិភាពតែងប្រើប្រាស់អាស័យដ្ឋាន e-mail អនាមិក និងបណ្តោះអាសន្នរបស់ខ្លួន ដើម្បីទាក់ទងជាមួយអ្នកដ៏ទៃ។ អ្នកកាសែត ក្រុមចោរ Hackers ដ៏ទៃទៀត ក្រុមហ៊ុនសន្តិសុខព័ត៌មានវិទ្យា មន្ត្រីស៊ើបអង្កេត និងក្រុមហ៊ុនប្រកួតប្រជែងជាមួយ Sony Pictures អាចសរសេរសារស្នើសុំឯកសារទាំងនោះពីក្រុមចោរឆ្មាំសន្តិភាព។ ទិន្នន័យទាំងនោះត្រូវបានពួកចោរដាក់បង្ហោះតែរយៈពេលប៉ុន្មានម៉ោងប៉ុណ្ណោះ មុននឹងម្ចាស់គេហទំព័រផ្ទុកឯកសារ ឬគេហទំព័រ Pastebin លប់ចោល តាមការស្នើសុំពីប៉ូលីស ឬពីមេធាវីរបស់ក្រុមហ៊ុន Sony Pictures។ ចន្លោះពីថ្ងៃទី ២៤ វិច្ឆិការ ដល់ថ្ងៃទី ១០ ធ្នូ ឆ្នាំ២០១៤ គេសង្កេតឃើញថាក្រុមចោរអ៊ីនធ័រនែតបានចែកចាយឯកសារចំនួន ៦ លើក។
តើជាការចាប់ចំរិតយកលុយ?
ពេលផ្សព្វផ្សាយឯកសារតាមអ៊ិនធ័រណេត គេតែងកត់សំគាល់ថា អត្ថបទសរសេរដោយក្រុមចោរ Hackers ពុំបានបញ្ជាក់អ្វីពិតប្រាកដពីហេតុផលរបស់ពួកគេឡើយ ហើយក៏ពុំបង្ហាញពីការគំរាមជំរិតយកលុយពីក្រុមហ៊ុនឡើយ។ រាល់ការគំរាមកំហែងគឺ គ្រាន់តែស្នើមិនអោយក្រុមហ៊ុន Sony Pictures ដាក់បញ្ជាំងខែ្សភាពយន្តមួយ។ ប៉ុន្តែ មានការសង្ស័យថាប្រទេសកូរ៉េខាងជើងស្ថិតនៅពីក្រោយការវាយប្រហារនេះ ដោយសារប្រទេសកុម្មុយនីស្តមួយនេះធ្លាប់បានគំរាមក្រុមហ៊ុន Sony Pictures មិនអោយចាក់បញ្ចាំងខ្សែភាពយន្តរឿង The Interview ដែលនិយាយចំអកអោយប្រមុខដឹកនាំប្រទេសនេះ។
ម៉្យាងទៀត លេខកូដសំគាល់អាស័យដ្ឋានអ៊ីនធ័រនែតមានលក្ខណៈស្រដៀងគ្នាទៅនឹងលេខកូដ ដែលកូរ៉េខាងជើងធ្លាប់បានប្រើពេលវាយប្រហារលើគេហទំព័ររដ្ឋាភិបាល ធនាគារ និងប្រព័ន្ធផ្សព្វផ្សាយរបស់កូរ៉េខាងត្បូង កាលពីឆ្នាំ២០១៣។ ប៉ុន្តែ បើមន្រ្តីម្នាក់របស់ FBI ទទួលបន្ទុកស៊ើបអង្កេតលើសំណុំរឿងនេះបានអោយដឹងថា អាចមានក្រុមជនបរទេស ឬប្រទេសផ្សេងទៀតស្ថិតនៅពីក្រោយការវាយប្រហារនេះ ដោយមានកូរ៉េខាងជើងជាអ្នកដឹកនាំសម្របសម្រួល។
ទិន្នន័យផ្ទាល់ខ្លួនរបស់បុគ្គលិក និងដៃគូរបស់ក្រុមហ៊ុន Sony Pictures
នៅក្នុងឯកសារមួយមានចំណងជើងថា «ធនធានមនុស្ស» គេអាចដឹងពីជីវិតផ្ទៃក្នុងរបស់ក្រុមហ៊ុន Sony Pictures ទាំងមូល ដែលមានបុគ្គលិកបំរើការសរុបចំនួន ៧ ពាន់នាក់។ ទិន្នន័យរបស់បុគ្គលិកម្នាក់ៗត្រូវបានលួចយកដូចជា លេខទូរស័ព្ទ អាស័យដ្ឋានអ៊ីមែល ប្រវត្តិរូប រូបថតប័ណ្ណសំគាល់ខ្លួន ចំនួនប្រាក់ខែ ការស្នើសុំដំឡើងប្រាក់ខែ គំរោងសុំសំរាកវិស្សមកាល និងព័ត៌មានសុខភាព ជាដើម។ ក្រៅពីនោះ ព័ត៌មានទាក់ទងនឹងក្រុមហ៊ុនសហការជាមួយ Sony ដូចជា Columbia Pictures ក៏ត្រូវបានផ្សព្វផ្សាយអោយដឹងផងដែរ។
អ្វីដែលធ្ងន់ធ្ងរបំផុតនោះគឺ លេខសំងាត់ជាច្រើន ដែលបុគ្គលិកក្រុមហ៊ុនប្រើប្រាស់ដើម្បីភ្ជាប់ទៅនឹងបណ្តាញ Server ឬសេវាកម្មតាមអ៊ីនធ័រនែតរបស់ក្រុមហ៊ុន Sony Pictures ត្រូវបានបែកធ្លាយ។ គេហទំព័រ Gizmodo បានកត់សំគាល់ថា លេខសំងាត់ទាំងនោះត្រូវបានទុកនៅក្នុងឯកសារជា Word និង Excel ដោយគ្មានកិច្ចកាពារអ្វីបន្តិចសោះ។
ហេតុដូចនេះហើយបានជាអតីតៈបុគ្គលិកក្រុមហ៊ុន Sony Pictures កំពុងពិចារណាដាក់ពាក្យបណ្តឹងរួមគ្នាមួយ ក្រោមអំណះអំណាងថាក្រុមហ៊ុននេះធ្វេសប្រហែសពុំបានការពារពង្រឹងសន្តិសុខបណ្តាញព័ត៌មានវិទ្យារបស់ខ្លួន។ ទន្ទឹមគ្នានេះផងដែរ ក្រុមមេធាវីមកពីរដ្ឋកាលីហ្វ័រញ៉ាកំពុងព្យាយាមជំរុញអោយបុគ្គលិកកំពុងបំរើការអោយក្រុមហ៊ុន Sony Pictures ដាក់ពាក្យបណ្តឹងប្រឆាំងក្រុមហ៊ុនរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ