មនុស្សប្រមាណជា១០ម៉ឺននាក់នឹងទៅអបអរសាទរពិធីបុណ្យចូលឆ្នាំខ្មែរនៅអង្គវត្ត
លោកស៊ូ ភិរិន្ទ អភិបាលខេត្តសៀមរាបបានថ្លែងអោយដឹងនៅថ្ងៃសៅរ៍នេះថា មានប្រជាពលរដ្ឋខ្មែរប្រមាណជា១០ម៉ឺននាក់គ្រោងនឹងមកចូលរួមអបអរសាទរពិធីបុណ្យចូលឆ្នាំខ្មែរនៅទីក្រុងអង្គរនៅឆ្នាំនេះ។ ពិធីអង្គរសង្រ្កានឆ្នាំនេះត្រូវបានគេប្រារព្ធនៅតំបន់ប្រាសាទបាយ័ន ដោយមានការតាំងពិព័ណ៌ផលិតផលខ្មែរ និងការសម្តែងសិល្បៈបុរាណខ្មែរទៀតផង។
ចុះផ្សាយនៅថ្ងៃ៖
ស្តាប់ - ០២:២០
ទីក្រុងភ្នំពេញចាប់ផ្តើមស្ងាត់ជ្រងំ រីឯទីក្រុងព្រះសីហនុ និងទីក្រុងសៀមរាបចាប់ផ្តើមកកកុញទៅដោយមនុស្សមា្នដែលមកពីខេត្ត ក្រុងផ្សេងៗនៃប្រទេសកម្ពុជា។ នៅថ្ងៃសៅរ៍នេះ ក្នុងខេត្តសៀមរាប គេសង្កេតឃើញរថយន្តទាំងខ្សែៗបានបើកចូលបន្តកន្ទុយគ្នាមកក្នុងទីក្រុងប្រាសាទចំណាស់របស់ខេត្តសៀមរាប។ លោក ស៊ូ ភិរិន្ទ អភិបាលលខេត្តសៀមរាបបានថ្លែងប្រាប់វិទ្យុបារាំងអន្តរជាតិនៅល្ងាចថ្ងៃសៅរ៍នេះថា ប្រជាពលរដ្ឋខ្មែរមិនតិចជាង១០ម៉ឺននាក់ទេដែលគ្រោងនឹងមកអបអរសាទរពិធីបុណ្យចូលឆ្នាំខ្មែរនៅក្រុងអង្គរ។ បន្ទប់សណ្ឋាគារទាំងឡាយនៅក្នុងខេត្តត្រូវបានគេកក់ទុកជាមុនស្ទើរអស់ហើយ។
ការសម្រុកមកកម្សាន្តទៅទីក្រុងអង្គរនៅពេលបុណ្យចូលឆ្នាំខ្មែរ គឺជារឿងធម្មតារបស់ប្រជាជនខ្មែរ។ ប៉ុន្តែឆ្នាំនេះ ចំនួនមនុស្សអាចកើនឡើងច្រើនជាងឆ្នាំមុនៗ ពីព្រោះនៅឆ្នាំនេះ សាលាខេត្តសៀមរាប និងសហភាពសហព័ន្ធយុវជនកម្ពុជាបានសម្រេចរៀបចំមហាសង្រ្កាន ឬអង្គរសង្រ្កានដើម្បីទទួលទេវតាឆ្នាំថ្មីនៅតំបន់អង្គរតែម្តង។ លោក ស៊ូ ភិរិន្ទ អភិបាលខេត្តសៀមរាបបានបញ្ជាក់ប្រាប់ថា នៅក្នុងពិធីអង្គរសង្រ្កានឆ្នាំនេះ របាំសិល្បៈបុរាណរបស់ខ្មែរជាច្រើនក្រុម និងជាច្រើនប្រភេទត្រូវបានគេសម្តែងនៅតំបន់ប្រាសាទបាយ័នទល់មុខទីលានជល់តំរី។ មិនត្រឹមតែប៉ុណ្ណោះ ស្តង់លក់ផលិតខ្មែរជាច្រើនរយកន្លែងត្រូវបានគេដាក់អោយដំណើរការផងដែរ។ លោក ស៊ូ ភិរិន្ទ បានបន្តទៀតថា ពិធីមហាសង្រ្កានអង្គរឆ្នាំនេះមិនត្រឹមតែទាក់ទាញអ្នកទេសចរជនជាតិខ្មែរប៉ុណ្ណោះទេ ប៉ុន្តែពិធីនេះអាចទាក់ទាញអ្នកទេសចរបរទេសទៀតផង។
លោក អាង គីមអ៊ាង ប្រធានទីភ្នាក់ងារទេសចរណ៍កម្ពុជាបានថ្លែងអោយដឹងថា នៅក្នុងពិធីបុណ្យចូលឆ្នាំខ្មែរឆ្នាំ២០១៣នេះ ប្រជាពលរដ្ឋខ្មែរមួយចំនួននាំគ្នាចាកចេញដំណើរទៅកម្សាន្តនៅបរទេស ដូចជាប្រទេសវៀតណាម ប្រទេសថៃ ប្រទេសសិង្ហបុរី ទីក្រុងហុងកុងប្រទេសចិន។ល។ រីឯនៅក្នុងប្រទេសកម្ពុជាវិញ អ្នកទេសចរជនជាតិខ្មែរសម្រុកទៅកម្សាន្តនៅខេត្តព្រះសីហនុ ខេត្តរតនគីរី មណ្ឌលគីរី និងទីក្រុងសៀមរាប។ ព្រមពេលជាមួយគ្នា លោក អាង គីមអ៊ាង ប្រធានសមាគមទីភ្នាក់ងារទេសចរណ៍កម្ពុជាបានអំពាវនាវដល់អ្នកធ្វើអាជីវកម្មទាំងឡាយនៅក្នុងប្រទេសកម្ពុជា កុំអោយដំឡើងតម្លៃសេវាកម្ម ឬម្ហូបអាហារហួសហេតុពេកនៅក្នុងរដូវបុណ្យចូលឆ្នាំខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ