ជនជាតិភាគតិចការពារព្រៃឡង់ប្រមាណជា៦០០នាក់គ្រោងចូលបង្រា្កបបទល្មើសព្រៃឈើជាថ្មីទៀត
ជនជាតិភាគតិចការពារព្រៃឡង់ប្រមាណជា៦០០នាក់គ្រោងនឹងចូលបង្រា្កបបទល្មើសព្រៃឈើនៅតំបន់ព្រៃឡង់នៅថ្ងៃទី២០ខាងមុខនេះ។ ជនជាតិភាគតិចដែលមកពីខេត្តកំពង់ធំ ស្ទឹងត្រែង ក្រចេះនិងខេត្តព្រះវិហារទាំងនេះនឹងជិះម៉ូតូចំនួន៣០០គ្រឿងចូលត្រួតពិនិត្យការកាប់បំផ្លាញព្រៃឈើខុសច្បាប់នៅតំបន់ព្រៃឡង់ដែលមានព្រំប្រទល់ជាប់ខេត្តទាំង៤ខាងលើនេះ។ នេះគឺជាលើកទី២ហើយដែលជនជាតិភាគតិចសម្រេចចិត្តចូលក្នុងព្រៃឡង់ជាថ្មីម្តងទៀតជាទ្រង់ទ្រាយដើម្បីបង្ក្រាបបទល្មើសព្រៃឈើ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
យុទ្ធនាការប្រយុទ្ធប្រឆាំងនឹងការកាប់បំផ្លាញព្រៃឡង់នៅព្រំប្រទល់ខេត្តព្រះវិហារ ខេត្តក្រចេះ ខេត្តស្ទឹងត្រែងនិងខេត្តកំពង់ធំនៅមិនទាន់បិទបញ្ចប់នៅឡើយទេ។
នៅថ្ងៃអង្គារទី២០សប្តាហ៍ក្រោយនេះ ជនជាតិភាគតិចប្រមាណជា៦០០នាក់នឹងជិះម៉ូតូប្រមាណជា៣០០គ្រឿងចុះស៊ើបអង្កេតនិងកត់ត្រាការកាប់បំផ្លាញព្រៃឈើនៅតំបន់ព្រៃឡង់។ កាលពីចុងឆ្នាំ២០១១កន្លងមក ជនជាតិភាគតិចប្រមាណជា៥០០នាក់បាននាំគ្នាដើរចូលព្រៃឡង់ដើម្បីបង្រ្កាបបទល្មើសព្រៃឈើម្តងរួចមកហើយប៉ុន្តែកាលនោះ ពួកគេមិនទទួលបានជ័យជំនះទេពីព្រោះមានការរារាំងពីអាជ្ញាធរ។
ម្តងនេះ ប្រជាជនមិនដើរចូលព្រៃទៀតទេ។ ពួកគេមានគម្រោងជិះម៉ូតូចូលព្រៃវិញម្តង។ ក្នុងចំណោមប្រជាជន៦០០នាក់ដែលគ្រោងនឹងជិះម៉ូតូចូលព្រៃនោះ មានមកពីខេត្តកំពង់ធំចំនួន៣០០នាក់ ក្រចេះ១០០នាក់ ស្ទឹងត្រែង១០០នាក់និងខេត្តព្រះវិហារចំនួន១០០នាក់។
ព្រៃឡង់ត្រូវបានអ្នកសិក្សាស្រាវជ្រាវសន្និដ្ឋានថា ជាព្រៃដែលមានទំហំធំជាងគេនៅតំបន់អាស៊ីអាគ្នេយ៍។ ព្រៃនេះមានទំហំ៦០ម៉ឺនហិកតានៅក្នុងអំឡុងទសវត្សរ៍ឆ្នាំ៧០ប៉ុន្តែសព្វថ្ងៃនេះ ព្រៃឡង់នៅមានទំហំប្រមាណជា៤០ម៉ឺនហិកតាប៉ុណ្ណោះ។
ដោយសារតែទំហំព្រៃឡង់បានថយចុះយ៉ាងច្រើន ហើយបទល្មើសកាប់ព្រៃនៅបន្តកើនឡើងនោះ ជនជាតិភាគតិចដែលរស់នៅដោយពឹងផ្អែកលើអនុផលព្រៃឈើពីតំបន់ព្រៃឡង់នេះ បានសម្រេចចិត្តសាជាថ្មីម្តងទៀតចុះបង្រ្កាបបទល្មើសព្រៃឈើនៅទីនោះ។
លោក ឈឹម សាវុធ អ្នកសម្របសម្រួលគម្រោងវេទិកាសាធារណៈនិងបណ្តុះបណា្តលនៃមជ្ឈមណ្ឌលសិទ្ឋិមនុស្សកម្ពុជាបានបញ្ជាក់ប្រាប់នៅថ្ងៃសៅរ៍នេះថា ជនជាតិភាគតិចទាំងនោះសម្រេចចិត្តចូលព្រៃម្តងទៀតពីព្រោះបទល្មើសព្រៃឈើនៅរដូវប្រាំងនេះមានការកើនឡើងយ៉ាងខ្លាំងបើប្រៀបធៀបទៅនឹងពេលមុន។លោក ឈឹម សាវុធ បានបន្តទៀតថា ការកាប់បំផ្លាញព្រៃឈើនៅតំបន់ព្រៃឡង់មិនមែនប៉ះពាល់តែជីវភាពប្រជាជននៅតំបន់នោះទេប៉ុន្តែវាប៉ះពាល់បរិស្ថានសម្រាប់មនុស្សទាំងអស់គ្នា។
បើយោងតាមគម្រោង ប្រជាជនដែលមានបំណងបង្រ្កាបបទល្មើសក្នុងតំបន់ព្រៃឡង់នឹងព្យាយាមប្រមូលភស្តុតាង និង វត្ថុតាងពីបទលើ្មសទាំងឡាយមកកាន់ស្រុកសណា្តន់ ខេត្តកំពង់ធំ នៅថៃ្ងទី ២៨ខែមីនា ឆ្នាំ២០១២ ក្នុងគោលបំណងចូលរួមនិងបង្ហាញភស្តុតាងទាំងនោះដល់តំណាងរាស្រ្តនឹងអ្នកពាក់ព័ន្ធនៅក្នុងកម្មវិធីវេទិកាសាធារណៈដែលគ្រោងនឹងរៀបចំឡើងដោយមជ្ឈមណ្ឌលសិទិ្ធមនុស្សកម្ពុជា។
មជ្ឈមណ្ឌលសិទ្ធិមនុស្សកម្ពុជានឹងអញ្ជើញតំណាងរាស្ត្រពី៥គណបក្សនៅក្នុងរដ្ឋសភាជាតិនិងអាជ្ញាធរថ្នាក់មូលដ្ឋានអោយចូលរួមវេទិកាសាធារណៈនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ