ប្រតិភូកីឡាកម្ពុជាជុំគ្នានៅក្នុងទីក្រុងឡុងដ៍មុនការប្រកួតអូឡាំពិកចាប់ផ្តើម
ប្រតិភូជាន់ខ្ពស់នៃក្រុមកីឡាកម្ពុជាដែលដឹកនាំដោយលោកថោង ខុន ប្រធានគណៈកម្មាធិការជាតិអូឡាំពិកកម្ពុជាបានទៅដល់ទីក្រុងឡុងដ៍ហើយកាលពីថ្ងៃព្រហស្បតិ៍ម្សិលមិញ។ ថ្នាក់ដឹកនាំជាន់ខ្ពស់កីឡាកម្ពុជាបានទៅទស្សនកិច្ចដល់កន្លែងស្នាក់នៅរបស់ក្រុមអត្តពលិកកម្ពុជានៅក្នុងភូមិកីឡាក្បែរកន្លែងប្រកួត។ ពិធីបើកសម្ពោធការប្រកួតកីឡាអូឡាំពិកឆ្នាំ២០១២នេះនឹងត្រូវចាប់ផ្តើមនៅម៉ោង៨និង៣០នាទី ម៉ោងក្នុងប្រទេសអង់គ្លេសដែលត្រូវនឹងម៉ោង២ភ្លឺ ថ្ងៃសៅរ៍នៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ប្រតិភូជាន់ខ្ពស់នៃកីឡាកម្ពុជាបានទៅដល់ទីក្រុងឡុងដ៍ប្រទេសអង់គ្លេសហើយកាលពីថ្ងៃព្រហស្បតិ៍ម្សិលមិញ ដើម្បីចូលរួមក្នុងពិធីសម្ពោធបើកការប្រកួតកីឡាអូឡាំពិកឆ្នាំ២០១២ជាផ្លូវការ។
ប្រតិភូជាន់ខ្ពស់កីឡាកម្ពុជាដឹកនាំដោយលោកថោង ខុន ប្រធានគណៈកម្មាធិការជាតិអូឡាំពិកកម្ពុជា លោកវ៉ាត់ ចំរើនអគ្គលេខាធិការគណៈកម្មាធិការជាតិអូឡាំពិកកម្ពុជា និងលោកលី កុសលប្រធានបេសកកម្មក្រុមកីឡាកម្ពុជា។
បន្ទាប់ពីបានទៅដល់ទីក្រុងឡុងដ៍ភា្លម ប្រតិភូជាន់ខ្ពស់បានទៅទស្សនច្ចនៅភូមិអូឡាំពិកភា្លម ដើម្បីជួបក្រុមអត្តពលិក និងគ្រូបង្វឹករបស់កម្ពុជា។ នៅទីនោះហើយ ដែលលោកថោង ខុន បាននិយាយលើកទឹកចិត្តអោយក្រុមកីឡាករ កីឡាការិនីខ្មែរប្រឹងប្រែងដើម្បីលើកទង់ជាតិកម្ពុជានៅក្នុងការប្រកួតកីឡាថ្នាក់អន្តរជាតិនេះ។
លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានប្រាប់វិទ្យុបារាំងអន្តរជាតិពី ទីក្រុងឡុងដ៍ តាមទូរស័ព្ទថា កីឡាករ កីឡាការិនីកម្ពុជាទាំង៦នាក់សុទ្ធតែមានសុខភាព និងកាយសម្បទាមាំទាំល្អសម្រាប់ការប្រកួត។ លោកបន្តថា ពួកគេសុទ្ធតែបានហ្វឹកហាត់នៅលើទីលានផ្ទាល់តែម្តង។
ក្នុងរយៈពេលប៉ុន្មានម៉ោងទៀតនេះ ក្នុងការដើរព្យុហយាត្រាក្នុងពិធីបើកការប្រកួតកីឡាអូឡាំពិក កញ្ញាស៊ន ដាវីន ដែលជាកីឡាការិនីតៃក្វាន់ដូ គឺជាអ្នកកាន់ទង់ជាតិកម្ពុជា ដើរមុខប្រតិភូកម្ពុជានៅក្នុងពិធីដើរក្បួននោះ។ ចំណែកឯលោក ថោង ខុន និងលោកវ៉ាត់ ចំរើនត្រូវបានអញ្ជើញអោយអង្គុយនៅលើវេទិកាកិត្តិយសនៃពិធីបើកសម្ពោធ ដែលនឹងចូលរួមដោយព្រះមហាក្សត្រីអេលីហ្សាប៊ែតផង។
សូមបញ្ជាក់ថា នេះគឺជាលើកដំបូងហើយតាំងពីឆ្នាំ១៩៩៦មក ដែលកម្ពុជាបានបញ្ជូនក្រុមកីឡាកររហូតដល់៦នាក់ទៅចូលរួមក្នុងការប្រកួតកីឡាអូឡាំពិក។ អត្តពលិកទាំង៦នាក់រួមមាន កីឡាករ កីឡារិនីហែលទឹក២នាក់ កីឡាករកីឡាការិនីរត់ប្រណាំង២នាក់ កីឡាការិនីតៃក្វាន់ដូ ម្នាក់ និងកីឡាករយូដូម្នាក់។
បើតាមលោក វ៉ាត់ ចំរើន ក្រោយការប្រកួតនេះចប់ ក្រុមកីឡាកម្ពុជាត្រូវអញ្ជើញអោយធ្វើដំណើរកំសាន្ត៣ថ្ងៃនៅទីក្រុងប៉ារីស ដែលដំណើរកំសាន្តនេះត្រូវបានឧបត្ថម្ភដោយ ក្រុមហ៊ុន អាកាសចរណ៍បារាំងAir France៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ