បន្ទាប់ពីអេស្តូនី ឡេតូនីក៏ចូលជាសមាជិកអង្គការOCDEដែរ
កាលពីដើមខែមិថុនានេះ រដ្ឋាភិបាលឡេតូនីបានចុះហត្ថលេខាលើសន្ធិសញ្ញាដើម្បីភ្ជាប់ប្រទេសបាល់ទ៏នេះទៅជាសមាជិករបស់អង្គការសហប្រតិបត្តិការនិងអភិវឌ្ឍន៍សេដ្ឋកិច្ច ហៅកាត់ថាOCDE”ឬក្លឹបនៃប្រទេសលូតលាស់“។ កន្លងផុតពីរសប្តាហ៍មក សន្ធិសញ្ញានេះ បានទទួលការឲ្យសច្ចាប័ន ដោយ រដ្ឋសភាឡេតូនី ហេតុដែលបានបើកផ្លូវឲ្យប្រទេសបាល់ទ៏នេះ ក្លាយជាសមាជិកពេញសិទ្ធិ ទី៣៥ របស់ OCDE។ តើOCDEជាអ្វីរួច ហេតុដូចម្តេចបានជាឡេតូនីចូលជាសមាជិកអង្គការនេះ ដោយធ្វើត្រាប់តាមប្រទេសបាល់ទ៏ មួយផ្សេង គឺអេស្តូនីដែលបានចូលក្នុងអង្គការនេះ តាំងពី៦ឆ្នាំមុនម៉្លេះ។ ចំណែកលីទុយអានីក៏កំពុងធ្វើកិច្ចចរចាដើម្បីចូលដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៧
ជាបឋម គួរនិយាយថា ក្រោយពីសហភាពសូវៀតដួលរលំទៅក្នុងឆ្នាំ១៩៩១ បីប្រទេស បាល់ទ៏ ពោលគឺ អេស្តូនី លីទុយអានី ឡេតូនី ដែលសុទ្ធតែក្លាយជារដ្ឋឯករាជ្យទៅហើយ មុនឈានដល់អង្គការសហប្រតិបត្តិការនិងអភិវឌ្ឍន៍សេដ្ឋកិច្ច ហៅកាត់ថា OCDE គឺបានត្រូវទទួលឲ្យចូល កាលក្នុងឆ្នាំ២០០៤ ជាមួយគ្នាតែម្តង ក្នុងបក្សសម្ព័ន្ធអូតង់ផង និងក្នុងសហភាពអឺរ៉ុបផង ហើយក្នុងឋានៈនេះ ដែលពីក្នុង ចំណោមអតីតសាធារណរដ្ឋសូវៀត មានតែ៣ប្រទេសនេះ ដែលរាជាណាចក្រកម្ពុជាបានតាំងទំនាក់ទំនងការទូតជាមួយទន្ទឹមនឹងសហព័ន្ធរុស្ស៊ី។
ក្នុងដំណាក់បន្ទាប់មក នៅឆ្នាំ២០១០ គឺអេស្តូនីដែលត្រូវបានទទួលឲ្យចូលជា សមាជិកពេញសិទ្ធិទៅហើយរបស់អង្គការOCDE។ ហើយកាលពីខែឧសភាកន្លងទៅ ក្រុមប្រឹក្សាដឹកនាំរបស់អង្គការសហប្រតិបត្តិការនិងអភិវឌ្ឍន៍សេដ្ឋកិច្ចOCDE បានអញ្ជើញឡេតូនីឲ្យក្លាយជាសមាជិកពេញសិទ្ធិរបស់អង្គការនេះ បន្ទាប់ពីបានទទួលការអនុម័តជាឯកច្ឆន្ទ ដោយគ្រប់តែ៣៤ប្រទេសជាសមាជិកចាស់។ ចំណែកលីទុយអានីកំពុងបន្តកិច្ចចរចាតទៅទឿត នៅលើផ្លូវដើម្បីក្លាយទៅជាសមាជិកOCDEដែរ។
លុះថ្ងៃទី២មិថុនាដើមខែនេះ ក្នុងក្រុងប៉ារីស លោកនាយករដ្ឋមន្ត្រីឡេតូនី Maris Kucinskis និងលោកអគ្គលេខាធិការOCDE Angel Gurria បានចុះហត្ថលេខាលើសន្ធិសញ្ញា ស្តីអំពីការចូលខ្លួនរបស់ឡេតូនី ទៅក្នុងអង្គការនេះ។ លុះថ្ងៃ១៦មិថុនា រដ្ឋសភាឡេតូនីដោយសម្លងតំណាងរាស្ត្រភាគច្រើន ដល់ទៅ៦៨សម្លេង បានឲ្យសច្ចាប័នទៅលើឯកសារនេះ។ ចំណែកតំណាងរាស្ត្រដែលមិនព្រមចូលរួមបោះឆ្នោត គឺមានតែ១១នាក់ប៉ុណ្ណោះ។
ពេលចុះហត្ថលេខានោះ លោកនាយករដ្ឋមន្ត្រីឡេតូនី Maris Kucinskis បានថ្លែងថា ៖ ទម្រាំឈានដល់ដំណាក់នេះ ឡេតូនីមុនដំបូង បានធ្វើកិច្ចចរចាអស់៣ឆ្នាំឯណោះ ហើយសមាជិកភាពនេះ មានន័យជាការទទួលស្គាល់ដោយ OCDE ការងារបំពេញយ៉ាងស្វិតស្វាញ ដោយរដ្ឋាភិបាល ក៏ដូចជាដោយរដ្ឋសភាឡេតូនី នូវចំណុចនិមួយៗដែលទាមទារ ដោយOCDE ដើម្បីអាចចូលជាសមាជិកអង្គការនេះទៅកើត។ ដោយចូលជាសមាជិកOCDE ឡេតូនីទទួលបានបុព្វសិទ្ទិ ប៉ុន្តែព្រមជាមួយគ្នា ក៏ទទួលយកមកដាក់លើខ្លួនទាំងកាតព្វកិច្ច និងនាទីទទួលខុសត្រូវ។ ប្រមុខរដ្ឋាភិបាលឡេតូនីក៏កត់សម្គាល់ថា ការចូលជាសមាជិកOCDE គឺគ្រាន់តែជាដំណាក់ដំបូងប៉ុណ្ណោះ ហើយក្នុងថ្ងៃមុខ ការងារយ៉ាងច្រើនដែលនៅរង់ចាំឡេតូនី។ គាត់បានសន្យាថា ឡេតូនីនឹងក្លាយជាសមាជិកសកម្មរបស់OCDE ដោយខិតខំរកឲ្យឃើញដំណោះស្រាយបញ្ហាពិភពលោកនៃបច្ចុប្បន្នសម័យ។
លោកអគ្គលេខាធិការOCDE Angel Gurria ពីចំណែកគាត់បានអបអរសាទរឡេតូនី ចំពោះការភ្ជាប់ខ្លួនទៅនឹងOCDE ទាំងឲ្យតម្លៃយ៉ាងខ្ពស់ ដល់ការងារបំពេញដោយឡេតូនី នៅលើផ្លូវ លុះទាល់តែចូលបានដូចចិត្តជាសមាជិកនៃ”ក្លឹបប្រទេសលូតលាស់”។ ការនេះសឲ្យឃើញថា ឡេតូនីចេះសម្រេចបានវឌ្ឍនភាពយ៉ាងបង្គួរក្នុងការអនុវត្តតាមអនុសាសន៍របស់OCDE។
ក្រសួងការបរទេសឡេតូនី បានចេញសេចក្តីថ្លែងការណ៍ ដែលចង្អុលឲ្យឃើញថា ការចូលខ្លួនរបស់ឡេតូនីទៅក្នុងអង្គការនៃប្រទេសលូតលាស់បំផុតក្នុងលោក គឺហុចជាគុណសម្បត្តិធំធេងដល់ប្រទេសនេះ បែបយ៉ាង កែឲ្យប្រសើរមែនទែនមុខមាត់ហិរញ្ញវត្ថុ ដែលជះឥទ្ធិពល ទៅលើការបន្ទាបយ៉ាងបង្គួរ កម្រិតការប្រាក់ ហើយបញ្ចុះខ្ទង់ចំណាយរបស់គេ សម្រាប់សងបំណុលរដ្ឋ។ សមាជិកភាពក្នុងអង្គការOCDE ក៏លើកកាន់តែខ្ពស់ឡើង ស្តង់ដារនៃការធ្វើBusiness នៅឡេតូនី និងនៃការការពារវិនិយោគ ព្រមទាំងរាប់បញ្ជូលឡេតូនី ទៅក្នុងការស្រាវជ្រាវនិងមូលដ្ឋានស្ថិតិអន្តរជាតិ។ សមាជិកភាពក្នុងអង្គការOCDE នឹងជម្រុញដល់ការប្រយុទ្ធទល់នឹងអំពើពុករលួយទល់នឹងការលាងលុយ និងដល់ការសកម្មទំនាក់ទំនងសេដ្ឋកិច្ចត្រង់ផ្ទាល់ជាមួយប្រទេសឯទៀត ជាសមាជិកOCDE ព្រមទាំងជម្រុញដល់ការផ្លាស់ប្តូរជាវិជ្ជមានក្នុងវិស័យសិក្សាធិការ។ សមាជិកភាពក្នុងOCDE នឹងជម្រុញដល់ការលើកផលិតភាពការងារ នៅតាមគ្រប់វិស័យនៃសេដ្ឋកិច្ចជាតិ និងលើកកម្រិតជីវភាពពលរដ្ឋឡេតូនី។
អង្គការសហប្រតិបត្តិការនិងអភិវឌ្ឍន៍សេដ្ឋកិច្ច OCDE បានប្រសូតមក ក្នុងឆ្នាំ១៩៦១ ដោយមានទីស្នាក់ការនៅក្រុងប៉ារីសប្រកបដោយគោលដៅ ច្រានទៅមុខនយោបាយដែលតម្រង់ទៅលើកកំណើនសេដ្ឋកិច្ចរបស់រដ្ឋសមាជិក។ ក្រោយពីទទួលឡេតូនីចូលជាសមាជិកថ្មី ឥឡូវOCDE មាន៣៥រដ្ឋ ជាសមាជិក ក្នុងនោះមានប្រទេសអភិវឌ្ឍអឺរ៉ុបខាងលិច បែបយ៉ាងអាល្លឺម៉ង់ អង់គ្លេស ព្រមទាំងប្រទេសលូតលាស់ទ្វីបឯទៀតបែបយ៉ាង ស.រ.អា. អូស្ត្រាលី ជប៉ុន និងប្រទេសមានសេដ្ឋកិច្ចលូតលាស់ឯទៀត។ រុស្ស៊ីមិនមែនជាសមាជិកOCDEទេ។
ជាការមិនសមគួរឡើយបើប្រៀបប្រដូចឡេតូនី ទៅនឹងសមាជិកឯទៀតរបស់OCDE ដូចជា ស.រ.អា ឬកាណាដា។ ប៉ុន្តែគេអាចប្រៀបប្រដូចឡេតូនី ឧទាហរណ៍ទៅនឹងអេស្តូនី ៖ យ៉ាងណាមិញ ខាងខ្ទង់ចំណូលគិតសម្រាប់ពលរដ្ឋម្នាក់ៗក្នុង១ឆ្នាំ គឺថានៅឡេតូនី ខ្ទង់ចំណូលនេះមានទឹកប្រាក់ ១៧.៩៥១ដុល្លារ នៅអេស្តូនី គឺ២១.០៦៥ដុល្លារ កាលដែលខ្ទង់ចំណូលមធ្យមប្រចាំឆ្នាំ គិតសម្រាប់ពលរដ្ឋម្នាក់ៗ នៅទូទាំងអង្គការសហប្រតិបត្តិការនិងអភិវឌ្ឍន៍សេដ្ឋកិច្ចOCDE គឺ៣២.៤២៤ ដុល្លារ។
គិតសម្រាប់វិស័យសិក្សាធិការ ឡេតូនីចំណាយ១,៤% នៃផលិតផលសរុបក្នុងស្រុក GDP អេស្តូនីចំណាយ ១,៦%។ ចំណែកGDPឡេតូនី គិតសម្រាប់ពលរដ្ឋម្នាក់ៗ គឺ ២៤.៦១៦ ដុល្លារ ហើយនៅអេស្តូនី គឺ២៨.៩៤០ដុល្លារ។
ចំនួនគ្រោះថ្នាក់ជាទូទៅ គិតសម្រាប់ពលរដ្ឋ ១.០០០.០០០ នាក់ នៅឡេតូនី គឺ ១០៦,៥ករណី នៅអេស្តូនី គឺ៥៩,៤ ករណី។ អាយុមធ្យមនៃពលរដ្ឋនៅឡេតូនី គឺ៧៤,១ឆ្នាំ នៅអេស្តូនី គឺ ៧៧,៣ ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ