ដណ្ហើមចុងក្រោយនៃរបបកាដាហ្វី
នៅពេញមួយថ្ងៃចន្ទទី២២សីហានេះ ពួកទ័ពឧទ្ទាមលីប៊ីដែលបានចូលដល់កណ្តាលរដ្ឋធានីទ្រីប៉ូលី(Tripoli)ហើយនោះ បាននិងកំពុងបន្តវាយលុកចូលទៅក្នុងគេហដ្ឋានរបស់កាដាហ្វី(Kadhafi) ដែលមានទីតាំងនៅក្នុងបរិវេណនៃបន្ទាយទាហានមួយដ៏ធំ។ ទ័ពឧទ្ទាមថែមទាំងចាប់បានកូនប្រុសម្នាក់យ៉ាងតិចរបស់កាដាហ្វីទៀតផង។ សម្រាប់សហរដ្ឋអាមេរិកនិងអឺរ៉ុប របបផ្តាច់ការ៤២ឆ្នាំរបស់កាដាហ្វីដើរដល់ទីបញ្ចប់ហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៣៧
ទ័ពឧទ្ទាមបានវាយលុកចូលទៅដល់រដ្ឋធានីទ្រីប៉ូលីកាលពីថ្ងៃអាទិត្យទី២១សីហាម្សិលមិញ។ តាំងពីពេលនោះមក ព្រឹត្តិការណ៍វិវឌ្ឍទៅមុខយ៉ាងលឿនរហ័ស ហើយឈានដល់ការចាប់ខ្លួនកូនប្រុសម្នាក់យ៉ាងតិចរបស់កាដាហ្វី នោះគឺSeif al-Islam។
ការវាយលុករបស់ទ័ពឧទ្ទាមចូលដល់កណ្តាលទីក្រុងទ្រីប៉ូលីយ៉ាងលឿនរហ័ស កាលពីម្សិលមិញអាចមានមូលហេតុពីរយ៉ាងសំខាន់ៗ។ ម្យ៉ាងបើយោងទៅតាមកាសែតអាមេរិកាំងNew York Times គឺដោយសារតែកងទ័ពអូតង់ឬណាតូបានបង្កើនជំនួយយោធាខ្លាំងក្លាដល់ពួកទ័ពឧទ្ទាម។ កាសែតអាមេរិកាំងមួយនេះបានអះអាងថា ប៉ុន្មានថ្ងៃចុងក្រោយនេះ សហរដ្ឋអាមេរិកប្រើប្រាស់យន្តហោះប្រយុទ្ធដែលគ្មានមនុស្សបើកនិងថាបារាំងនិងអង់គ្លេសប្រើប្រាស់កងកម្លាំងពិសេសរបស់ខ្លួននៅសមរភូមិក្រោយ ដើម្បីផ្តល់អាវុធដល់ទ័ពឧទ្ទាមនិងបង្ហាត់ហ្វឹកហ្វឺនពួកបះបោរ។ រីឯមូលហេតុម្យ៉ាងទៀត នេះបើយោងទៅតាមព័ត៌មានរបស់វិទ្យុRFIជាភាសាបារាំង គឺដោយសារតែប្រជាជននៅក្នុងសង្កាត់ខ្លះនៃរដ្ឋធានីទ្រីប៉ូលីបានងើបបះបោរដែរហើយបាននិងកំពុងបន្តកៀកស្មាគ្នាជាមួយទ័ពឧទ្ទាម ដើម្បីធ្វើប្រតិបត្តិការវាយលុកទៅលើបន្ទាយគេហដ្ឋានរបស់កាដាហ្វី។
តើកាដាហ្វីនៅឯណា?
របបផ្តាច់ការរយៈពេល៤២ឆ្នាំនៃប្រទេសលីប៊ីនឹងប្រហែលជាធ្លាក់ នាអនាគតឆាប់ៗខាងមុខនេះ គឺនៅពេលណាដែលមានព័ត៌មានផ្លូវការថា កាដាហ្វីត្រូវបានចាប់ខ្លួន ឬក៏បានស្លាប់ឬក៏បានភៀសខ្លួនចាកចេញពីប្រទេស។ ប្រការនេះ វាអាស្រ័យទៅលើការយល់ឃើញរបស់កាដាហ្វីផ្ទាល់ ថាតើគាត់នឹងបញ្ជាឲ្យទាហានដែលនៅសេសសល់ និងដែលនៅស្មោះស្ម័គ្រនឹងគាត់បន្តប្រយុទ្ធដល់តំណក់ឈាមចុងក្រោយ ឬឲ្យទម្លាក់អាវុធ។
យ៉ាងណាមិញ ប្រតិកម្មផ្សេងៗរបស់ថ្នាក់ដឹកនាំនានា នៅក្នុងពិភពលោកតាំងពីល្ងាចម្សិលមិញមកទល់ថ្ងៃនេះ ស្តែងឲ្យឃើញកាន់តែច្បាស់ថា ពេលនេះជាដង្ហើមចុងក្រោយនៃរបបកាដាហ្វី។ ជាក់ស្តែង សហរដ្ឋអាមេរិកអះអាងថា ថ្ងៃអវសាននៃរបបកាដាហ្វីជិតមកដល់ហើយ។ រីឯប្រទេសបារាំងវិញ អំពាវនាវឲ្យកាដាហ្វីលះបង់ចោលជាបន្ទាន់ អំណាចដែលនៅសេសសល់បន្តិចបន្តួចរបស់ខ្លួន។ ហើយនៅថ្ងៃចន្ទទី២២សីហានេះ បណ្តារដ្ឋាភិបាលនៃលោកខាងលិចអំពាវនាវឲ្យកាដាហ្វីចុះចាញ់ពីឥឡូវឲ្យហើយទៅ ដើម្បីស្រោចស្រង់ជីវិតទាហាននិងប្រជាជនដែលអាចនឹងស្លាប់ក្នុងប្រតិបត្តិការយោធាចុងក្រោយនេះ។ សូម្បីតែប្រទេសចិនក៏បានថ្លែងកាលពីព្រឹកមិញមុននេះដែរថា ខ្លួនគោរពនិងគាំទ្រជម្រើសរបស់ប្រជាពលរដ្ឋលីប៊ី។
បើយោងទៅតាម អតីតមនុស្សខ្លាំងទីពីរនៃរបបកាដាហ្វី Abdessalem Jalloud ដែលបានភៀសខ្លួនចេញពីទ្រីប៉ូលីមកកាន់ប្រទេសអ៊ីតាលី កាលពីថ្ងៃសុក្រទី១៩សីហា កាដាហ្វីកំពុងឋិតនៅក្នុងបន្ទាយគេហដ្ឋានក្នុងរដ្ឋធានីទ្រីប៉ូលី ហើយគ្មានមធ្យោបាយចាកចេញពីទីក្រុងបានឡើយ ពីព្រោះផ្លូវនៅជុំវិញបន្ទាយនិងនៅជុំវិញរដ្ឋធានីត្រូវបានបិទខ្ទប់អស់ហើយ។
បើសិនជាកាដាហ្វីកំពុងពួនលាក់ខ្លួនក្នុងគេហដ្ឋាននៅទ្រីប៉ូលីមែន នោះព្រឹត្តិការណ៍នឹងត្រូវប្រព្រឹត្តទៅតាមច្រកពីរ។ ទីមួយ កាដាហ្វីបន្តប្រយុទ្ធស្លាប់រស់រហូតដល់តំណក់ឈាមចុងក្រោយ។ ទីពីរ កាដាហ្វីសុំចុះចាញ់និងប្រគល់ខ្លួនទៅឲ្យទ័ពព្រៃ។ ក្នុងករណីនេះ ក្រុមប្រឹក្សាជាតិអន្តរកាលCNTដែលជាស្ថាប័ននយោបាយរបស់ទ័ពព្រៃបានយល់ព្រមហើយជាស្រេចថានឹងអនុញ្ញាតឲ្យកាដាហ្វីនិងក្រុមគ្រួសារចាកចេញពីប្រទេសលីប៊ីដោយសុវត្ថិភាព។
ផ្ទុយទៅវិញបើសិនជាកាដាហ្វីឋិតនៅក្រៅទីក្រុងទ្រីប៉ូលី នោះការប្រយុទ្ធគ្នានឹងអាចបន្តច្រើនសប្តាហ៍ទៅមុខទៀត បើទោះបីជាទ្រីប៉ូលីធ្លាក់ហើយក៏ដោយ។ ពីព្រោះ កាដាហ្វីអាចនឹងភៀសខ្លួនទៅជ្រកនៅក្នុងតំបន់Beni Oulid នៅខាងត្បូងទ្រីប៉ូលី។ នៅទីនោះ កាដាហ្វីអាចពឹងពាក់ពួកកុលសម្ព័ន្ធWarfalla ដែលសុទ្ធសឹងជាអ្នកស្មោះស្ម័គ្រនឹងខ្លួន ដើម្បីបន្តការតស៊ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ