លោកអេម៉ានុយអែល ម៉ាក្រុង ប្តេជ្ញាស្ថាបនាអឺរ៉ុប និងផ្តល់ទំនុកចិត្តដល់ពលរដ្ឋបារាំងឡើងវិញ
លោកអេម៉ានុយអែល ម៉ាក្រុងបានក្លាយជាប្រធានាធិបតីបារាំង ជាផ្លូវការហើយ។ ថ្ងៃអាទិត្យនេះ លោកម៉ាក្រុង បានសន្យាស្ថាបនាអឺរ៉ុប និងផ្តល់ទំនុកចិត្តដល់ពលរដ្ឋបារាំងឡើងវិញ។ ថ្ងៃចន្ទនេះ លោកនឹងបង្ហាញឈ្មោះនាយករដ្ឋមន្ត្រីបារាំង ហើយក៏នឹងធ្វើដំណើរទៅជួបប្រមុខដឺកនាំអាល្លឺម៉ង់ លោកស្រី អាន់ហ្កឺឡា មែរគែល នៅទីក្រុងប៊ែរឡាំងផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ការបោះឆ្នោតប្រធានាធិបតីបារាំងកន្លងមក បង្ហាញពីការកើនអានុភាពរបស់បក្សស្តាំជ្រុលនិយម និងឆ្វេងជ្រុលនិយម បង្ហាញពីការធ្លាក់ចុះនូវទំនុកចិត្តពលរដ្ឋចំពោះបក្សស្តាំនិយម និងឆ្វេងនិយមដែលធ្លាប់តែផ្លាស់ប្តូរគ្នាកាន់អំណាចពីដើមមក។ ការបោះឆ្នោតបង្ហាញថា ពលរដ្ឋបារាំងបែកបាក់គ្នា លែងទុកចិត្តនយោបាយថ្នាក់ដឺកនាំដូចមុនទៀត។
នៅចំពោះមុខបញ្ហាទាំងអស់នេះ នៅចំពោះមុខបញ្ហាជនគ្មានការងារធ្វើ១០ភាគរយក្នុងស្រុក ប្រធានាធិបតីបារាំងថ្មី អេម៉ានុយអែល ម៉ាក្រុង ប្តេជ្ញាមិនរាថយនៅចំពោះការសន្យារបស់លោកទេ លោកនឹងធ្វើកំណែទំរង់នយោបាយអោយស៊ីជំរៅ ផ្សះផ្សាបង្រួបបង្រួមប្រជាជន ដើម្បីផ្តល់ទំនុកចិត្តដល់ប្រជាជនឡើងវិញ។ លោកម៉ាក្រុងដែលគេស្គាល់ថា ជាអ្នកគាំទ្រនយោបាយអឺរ៉ុបពេញទីនោះ ក៏បានប្តេជ្ញាស្ថាបនាអឺរ៉ុបឡើងវិញផងដែរ។ ក្រោយចូលកាន់តំណែងជាផ្លូវការថ្ងៃអាទិត្យនេះ លោកម៉ាក្រុងលើកឡើងថា បារាំងទទួលខុសត្រូវផ្តល់ចម្លើយចំពោះគ្រប់បញ្ហា មិនថាជាវិបត្តិជនភៀសខ្លួន ការប្រែប្រួលអាកាសធាតុ រឺក៏អំពើភេរវកម្មទេ។
មុននឹងតែងតាំងរដ្ឋមន្ត្រីរដ្ឋាភិបាលតាមធម្មតា ថ្ងៃចន្ទនេះ លោកម៉ាក្រុងត្រូវបង្ហាញឈ្មោះនាយករដ្ឋមន្ត្រី។ លោកម៉ាក្រុងបានតែងតាំងមនុស្សមួយចំនួនក្នុងក្រុមការងារលោករួចហើយ។ បែបយ៉ាង ដើម្បីលើកស្ទួយនិងបន្តទំនាក់ទំនងជាមួយអាល្លឺម៉ង់ លោកម៉ាក្រុងបានតែងតាំងលោកហ្វីលីព អេជែន អាយុ៦១ឆ្នាំ អោយធ្វើជាទីប្រឹក្សាការទូតវិមានអេលីហ្សេ។ លោកអេជែន ជាឯកអគ្គរដ្ឋទូតបារាំងប្រចាំនៅអាល្លឺម៉ង់។ ថ្ងៃចន្ទនេះ ប្រធានាធិបតីបារាំងម៉ាក្រុងនឹងទៅជួបលោកស្រីមែរគែលនៅក្រុងប៊ែរឡាំង។ ប្រតិកម្មចំពោះការឡើងកាន់តំណែងផ្លូវការរបស់លោកម៉ាក្រុង ប្រធានគណៈកម្មការអឺរ៉ុប ហ្សង់ក្លូត យុងកឺ បានលើកឡើងថា ទំព័រថ្មីបានបើកឡើងសម្រាប់បារាំង សន្ទុះថ្មីសម្រាប់អឺរ៉ុប។
តទៅនេះ ដើម្បីអាចកាន់អំណាចបានពេញលេញនៅបារាំង ប្រធានាធិបតី អេម៉ានុយអែល ម៉ាក្រុងត្រូវបង្រួបបង្រួមពលរដ្ឋបារាំង ធ្វើយ៉ាងណាដណ្តើមអោយបានជោគជ័យការបោះឆ្នោតសភា ក្នុងខែមិថុនាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ