នាយករដ្ឋមន្ត្រីម៉ាឡេស៊ី ៖ យន្តហោះMH៣៧០ ពិតជាបានធ្លាក់ក្នុងមហាសមុទ្ទឥណ្ឌា
យន្តហោះម៉ាឡេស៊ីអ៊ែរឡាញ MH៣៧០ ហោះចេញពីទីក្រុងកូឡាឡាំពួរ សំដៅទៅកាន់ក្រុងប៉េកាំង កាលពីថ្ងៃទី ៨មីនា ពិតជាបានធ្លាក់នៅក្នុងមហាសមុទ្ទឥណ្ឌា។ គ្មានអ្នកដំណើរ និងអ្នកបំរើការតាមយន្តហោះ និងអ្នកបើកបរណាម្នាក់ នៅមានជីវិតរស់រានទេ។ នេះបើតាមការប្រកាសរបស់លោកនាយករដ្ឋមន្ត្រីម៉ាឡេស៊ី កាលពីប៉ុន្មាននាទីមុននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
បន្ទាប់ពី មានមន្ទិល និងពាក្យចចាមអារាម អស់ជិតម្ភៃថ្ងៃ នៅទីបំផុត អាជ្ញាធរម៉ាឡេស៊ី បានប្រកាសនៅល្ងាចថ្ងៃចន្ទទី ២៤មីនា ថាយន្តហោះ ម៉ាឡេស៊ីអ៊ែរឡាញ ដែលមានជើងហោះហើរ លេខ MH៣៧០ បាត់ខ្លួនឈឹងតាំងពីថ្ងៃទី ៨ មីនា ២០១៤ ពិតជាបានធ្លាក់ក្នុង ភាគខាងត្បូង មហាសមុទ្ទឥណ្ឌា និងសម្លាប់ជីវិតមនុស្សក្នុងយន្តហោះទាំងអស់។
“ដោយក្តីសោកស្តាយជាទីបំផុត ដែលខ្ញុំត្រូវប្រកាសជូនដំណឹងថា យន្តហោះMH៣៧០ បានបញ្ចប់ដំណើរក្នុងមហាសមុទ្ទឥណ្ឌា”! នេះជាប្រសាសន៍របស់លោកនាយករដ្ឋមន្ត្រីម៉ាឡេស៊ី Najib Raza តាមរយៈសន្និសីទកាសែត ដោយបានគូសបញ្ជាក់បន្ថែមទៀតថា គ្មានអ្វីគួរឱ្យសង្ស័យទេ ហើយក៏គ្មានអ្នករួចពីស្លាប់ដែរ។ ក្រុមគ្រួសារអ្នកដំណើរទាំង ២៣៩នាក់ (ភាគច្រើនជាជនជាតិចិន ១៥៣នាក់ចិន) ស្លាប់ក្នុងគ្រោះថ្នាក់នោះ ត្រូវបានជូនដំណឹងតាមរយៈសារទូរស័ព្ទ។
មុននេះបន្តិច នាយករដ្ឋមន្ត្រីក្រសួងដឹកជញ្ជូនម៉ាឡេស៊ី បានប្រកាសជូនដំណឹងអំពី ប្រតិបត្តិការស្វែងរកបំណែកយន្តហោះថា នាវា HMAs Success នៅមិនឆ្ងាយអំពីវត្ថុអណ្តែតទឹកទេ។ នាវានេះ ដែលបំពាក់ទៅដោយម៉ាស៊ីនស្ទូច អាចអូសទាញវត្ថុឬបំណែកធុនធំៗបាន។ យ៉ាងយូរបំផុតនៅព្រឹកថ្ងៃអង្គារគឺនឹងអាចបញ្ជាក់អត្តសញ្ញាណនៃវត្ថុអណ្តែតទឹកនោះបានហើយ។
សូមបញ្ជាក់ថា នារយៈពេលពីរបីថ្ងៃចុងក្រោយនេះ យុទ្ធនាការស្វែងរកយន្តហោះម៉ាឡេស៊ី បានមកផ្តុំគ្នានៅភាគខាងត្បូងមហាសមុទ្ទឥណ្ឌា ព្រោះរូបភាពផ្កាយរណប បានបញ្ជាក់កាន់តែច្រើនឡើងៗ ថាមានវត្ថុសង្ស័យនៅចម្ងាយប្រមាណ ២៥០០គ.ម. ពីឆ្នេរខាងត្បូងអូស្ត្រាលី។ យន្តហោះអាមេរិក អូស្រ្តាលី ជប៉ុនដែលធ្វើប្រតិបត្តិហោះឆ្វែលយកបំណែកយន្តហោះម៉ាឡេស៊ី បានប្រទះឃើញវត្ថុអណ្តែតទឹកខ្លះពណ៌បៃតង ខ្លះប្រផេះ ខ្លះមានទម្រង់ចតុកោណពណ៌លឿងទុំ។ ហើយនៅព្រឹកថ្ងៃចន្ទនេះទៀត យន្តហោះចិនបានមើលឃើញ ក្នុងតំបន់ស្រាវជ្រាវតែមួយ វត្ថុជាទម្រង់ការ៉េ និងមួយទៀតមានពណ៌ស ធំខ្លាំង ព្រមទាំងបំបែកផ្សេងៗទៀត រប៉ាត់រប៉ាយគ្នាក្នុងរង្វង់អង្កត់ផ្ចិត ជាច្រើនគីឡូម៉ែត្រ។ ចំណែកសហរដ្ឋអាមេរិកវិញ បានរួសរាន់បញ្ជូន ប្រដាប់តាមរកប្រអប់ខ្មៅយន្តហោះ ដែលទំនើបបំផុត អាចចាប់សញ្ញាបានចម្ងាយប្រមាណ៦ពាន់ម៉ែត្រ។ ប្រអប់ខ្មៅ ថតរាល់សំឡេងនិងសកម្មភាពក្នុងយន្តហោះ ដែលអាចពន្យល់អំពីមូលហេតុនៃគ្រោះថ្នាក់ដ៏ចម្លែកបំផុតមិនធ្លាប់មាន ក្នុងប្រវត្តិអាកាសចរណ៍ស៊ីវិលទាន់សម័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ