ហិង្សាលើរ៉ូហ៊ីងយ៉ា៖ ម៉ាឡេស៊ីលុបចោលការប្រកួតបាល់ទាត់ជាមួយភូមា
ម៉ាឡេស៊ីបានសម្រេចលុបចោលការប្រកួតបាល់ទាត់មិត្តភាពចំនួនពីរជាមួយភូមា ដោយសាររឿងធ្វើទុក្ខបុកម្នេញលើជនជាតិភាគតិចរ៉ូហ៊ីងយ៉ានៅភូមា។ គេសង្កេតឃើញថា នៅក្នុងមួយរយៈកាលចុងក្រោយនេះ ម៉ាឡេស៊ី ដែលជាប្រទេសមានប្រជាជនភាគច្រើនកាន់សាសនាអ៊ីស្លាម បានធ្វើការបរិហាររិះគន់យ៉ាងខ្លាំងៗទៅលើភូមា ជុំវិញការប្រើអំពើហិង្សាទៅលើជនជាតិរ៉ូហ៊ីងយ៉ា ដែលជាជនជាតិភាគតិចកាន់សាសនាអ៊ីស្លាម។
ចុះផ្សាយនៅថ្ងៃ៖
ក្រុមបាល់ទាត់ជម្រើសជាតិម៉ាឡេស៊ីបានប្រកាសឲ្យដឹងថា ម៉ាឡេស៊ីបានលុបចោលការប្រកួតមិត្តភាពចំនួនពីរ រវាងក្រុមយុវជនអាយុក្រោម២២ឆ្នាំម៉ាឡេស៊ី និងភូមា ដែលគេគ្រោងធ្វើ នៅថ្ងៃទី៩ និងថ្ងៃទី១២ធ្នូខាងមុខ នៅក្នុងទីក្រុងរ៉ង់ហ្គូន ប្រទេសភូមា។
នៅក្នុងការប្រកាសជាផ្លូវការនេះ ម៉ាឡេស៊ីមិនបានបញ្ជាក់លម្អិតអំពីមូលហេតុច្បាស់លាស់នោះទេ ហើយសហព័ន្ធបាល់ទាត់ម៉ាឡេស៊ីក៏មិនព្រមឆ្លើយតបនឹងសំណួររបស់អ្នកសារព័ត៌មានជុំវិញរឿងនេះដែរ។ ក៏ប៉ុន្តែ មន្រ្តីរដ្ឋាភិបាលម៉ាឡេស៊ី ទទួលបន្ទុកកិច្ចការកីឡា ដែលសុំមិនបញ្ចេញឈ្មោះ បានប្រាប់ទីភ្នាក់ងារព័ត៌មានអាអែហ្វប៉េថា ការលុបចោលការប្រកួតបាល់ទាត់នេះ គឺធ្វើឡើង “ក្នុងហេតុផលនយោបាយ”។
គេសង្កេតឃើញថា នៅក្នុងមួយរយៈកាលចុងក្រោយនេះ ម៉ាឡេស៊ីបានដំឡើងសំឡេងបរិហាររិះគន់កាន់តែខ្លាំងឡើង ទៅលើភូមា ទាក់ទងនឹងការរំលោភបំពានលើពួករ៉ូហ៊ីងយ៉ា។
កាលពីថ្ងៃសុក្រមុន រដ្ឋាភិបាលម៉ាឡេស៊ីបានកោះហៅឯកអគ្គរដ្ឋទូតភូមាប្រចាំទីក្រុងគួឡាឡាំពួរមកធ្វើការតវ៉ាជាផ្លូវការ ក្នុងពេលដែលប្រជាជនម៉ាឡេស៊ី និងរ៉ូហ៊ីងយ៉ា ប្រមាណជា ៥០០នាក់ នាំគ្នាធ្វើបាតុកម្មប្រឆាំងនៅមុខស្ថានទូតភូមា ដោយមានលើកបដាចោទភូមាថា “កំពុងប្រព្រឹត្តអំពើប្រល័យពូជសាសន៍”។
បាតុកម្មប្រឆាំងភូមានេះត្រូវគេគ្រោងធ្វើ ក្នុងទ្រង់ទ្រាយកាន់តែធំថែមទៀត នៅថ្ងៃអាទិត្យខាងមុខ ដោយក្នុងនោះ លោកណាជីប រ៉ាហ្សាក់ នាយករដ្ឋមន្រ្តីម៉ាឡេស៊ី ក៏គ្រោងនឹងចូលរួមផងដែរ។
កាលពីសប្តាហ៍មុន គណៈរដ្ឋមន្រ្តីម៉ាឡេស៊ីធ្លាប់បានចេញសេចក្តីថ្លែងការណ៍មួយរួចមកហើយ ដោយធ្វើការថ្កោលទោសជាផ្លូវការ ចំពោះការប្រើអំពើហិង្សាធ្វើទុក្ខបុកម្នេញលើជនជាតិរ៉ូហ៊ីងយ៉ា ហើយរដ្ឋមន្រ្តីមួយរូបរបស់ម៉ាឡេស៊ីថែមទាំងបានទាមទារឲ្យអាស៊ានធ្វើការសើរើមើលឡើងវិញ អំពីសមាជិកភាពរបស់ភូមា។
គេអាចនិយាយបានថានេះគឺជាការរិះគន់ធ្ងន់ៗដ៏កម្រមួយ រវាងប្រទេសសមាជិកអាស៊ាន ដែលតែងតែប្រកាន់នូវគោលការណ៍មិនជ្រៀតជ្រែកកិច្ចការផ្ទៃក្នុងប្រទេសគ្នាទៅវិញទៅមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ