សមយុទ្ធអាមេរិក-កម្ពុជាចាប់ផ្តើមថ្ងៃនេះ
កងយោធពលខេមរភូមិន្ទ និងកងទ័ពអាមេរិកបានចាប់ផ្តើមសមយុទ្ធទ្វេភាគីនៅថ្ងៃអង្គារនេះដើម្បីបង្កើតសមត្ថភាពនៃការថែរក្សាសន្តិសុខរបស់កងទ័ពកម្ពុជាអោយកាន់តែប្រសើរឡើង។ មន្ត្រីជាន់ខ្ពស់ក្រសួងការពារជាតិបានអះអាងថា សមយុទ្ធទ្វេភាគីអាមេរិកកម្ពុជាលើកទី៣នេះ នឹងធ្វើអោយសហប្រតិបត្តិការយោធានៃប្រទេសទាំងពីរកាន់តែរឹងមាំថែមទៀត។
ចុះផ្សាយនៅថ្ងៃ៖
ស្តាប់ - ០១:២៨
សមយុទ្ធនេះ ត្រូវប្រព្រឹត្តទៅពីថ្ងៃទី១៣ ដល់ថ្ងៃទី២២មីនានៅក្នុងខេត្តកំពត និងខេត្តកំពង់ស្ពឺ។ សមយុទ្ធទ្វេភាគីកម្ពុជាអាមេរិក ដែលគេអោយឈ្មោះថា ឆ្មាំអង្គរ២០១២គឺជាការងារបន្តរបស់កម្លំាងទ័ពអាមេរិកប្រចាំតំបន់អាស៊ីប៉ាស៊ីហ្វិក ដែលត្រូវប្រតិបត្តិការក្នុងក្របខ័ណ្ឌនៃបេសកកម្មបង្កើនសមត្ថភាពថែរក្សាស្ថិរភាព និងសន្តិភាពរបស់កងទ័ពទាំងពីរ។ នេះបើយោងតាមសេចក្តីប្រកាសព័ត៌មានរបស់ស្ថានទូតអាមេរិកប្រចាំកម្ពុជា។ នេះគឺជាសមយុទ្ធទ្វេភាគីលើកទី៣ហើយរវាងអាមេរិកនិងកងយោធពលខេមរភូមិន្ទ។ អ្នកនាំពាក្យក្រសួងការពារជាតិកម្ពុជា លោកឧត្តមសេនីយឯកឈុំ សុជាតិបានថ្លែងអោយដឹងថា មានកម្លំាងយោធាអាមេរិក១០០នាក់ និងកម្លំាងយោធាខ្មែរជាង៤០០នាក់ដែលកំពុងហ្វឹកហាត់ក្នុងសមយុទ្ធនេះ។
មន្ត្រីជាន់ខ្ពស់ក្រសួងការពារជាតិអត្ថាធិប្បាយអំពីវត្តមាននៃសមយុទ្ធបែបនេះ ថាជាការរឹតចំណងសហប្រតិបត្តិការយោធាអោយកាន់តែស្អិតល្មួតរវាងប្រទេសទាំងពីរ។ សេចក្តីប្រកាសព័ត៌មានរបស់ស្ថានទូតអាមេរិកបានសរសេរថា សមយុទ្ធឆ្មាំអង្គរ២០១២ គឺជាលំហាត់សមយុទ្ធចុងក្រោយគេ ក្នុងចំណោមលំហាត់សមយុទ្ធដែលមានលក្ខណៈសិ្វតស្វាញ និងមានច្រើនវិញ្ញាសាបន្តបន្ទាប់គ្នា ហើយត្រូវបានរៀបចំឡើងដើម្បីលើកកំពស់សន្តិភាព និងសន្តិសុខក្នុងតំបន់។
គួរបញ្ជាក់ថា ដោយមានការគាំទ្រពីសហរដ្ឋអាមេរិកនេះ កម្ពុជាបានធ្វើជាម្ចាស់ផ្ទះរៀបចំសមយុទ្ធទ្វេភាគីផង និងសមយុទ្ធយោធាពហុសាសន៍ផងក្នុងពេលកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ