តំណាងរាស្រ្តគណបក្សសង្គ្រោះជាតិសម្រេចមិនចូលប្រជុំសភាលើកដំបូង
ក្រុមអ្នកតំណាងរាស្ត្រគណបក្សសង្គ្រោះជាតិទាំងអស់ បានឯកភាពគ្នាថា នឹងមិនចូលរួមប្រជុំរដ្ឋសភាជាលើកដំបូងទេ ប្រសិនបើមិនមានការដោះស្រាយភាពមិនប្រក្រតីក្នុងការបោះឆ្នោតជាមុន។ ការសម្រេចនេះ បានធ្វើឡើងបន្ទាប់ពីមានការជួបប្រជុំអ្នកតំណាងរាស្ត្រគណបក្សប្រឆាំង កាលពីល្ងាចថ្ងៃសៅរ៍ទី១៤ខែកញ្ញានេះ នៅទីស្នាក់ការកណ្ដាលគណបក្សសង្គ្រោះជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
ក្រុមតំណាងរាស្ត្ររបស់គណបក្សសង្គ្រោះជាតិទាំងអស់ បានធ្វើការប្តេជ្ញាថា ពួកគេនឹងមិនចូលរួមប្រជុំសភាដំបូងទេ ដរាបណាយុត្តិធម៌សម្រាប់ប្រជាពលរដ្ឋម្ចាស់ឆ្នោត នៅមិនទាន់បានរកឃើញ។ ការសម្រេចចិត្តបែបនេះបានធ្វើឡើង បន្ទាប់ពីមានកិច្ចប្រជុំមួយយ៉ាងរួសរាន់នៅល្ងាចថ្ងៃសៅរ៍ទី ១៤ ខែកញ្ញានេះ រវាងសមាជិកអ្នកតំណាងរាស្ត្រទាំងអស់ ដើម្បីស្នើសុំយោបល់ប្រកបដោយប្រជាធិបតេយ្យ។
លោក កឹម សុខា អនុប្រធានគណបក្សសង្គ្រោះជាតិ បានប្រាប់វិទ្យុបារាំងអន្តរជាតិនៅល្ងាចដដែលថា ឆ្លងតាមការផ្តល់យោបល់ពីសមាជិកអ្នកតំណាងរាស្ត្រទាំងអស់ គេមានការសម្រេចថាសម្បជញ្ញៈរបស់គេ មិនអនុញ្ញាតិឲ្យគេក្បត់នូវឆន្ទៈរបស់ប្រជាពលរដ្ឋនោះទេ។ អនុប្រធានគណបក្សប្រឆាំងរូបនេះបញ្ជាក់ថា ដរាបណាមិនទាន់ឯកភាពរវាងគណបក្សទាំងពីររកឃើញនូវការពិត និងយុត្តិធម៌បានទេ ពួកគាត់មិនអាចទៅចូលរួមប្រជុំសភាបានឡើយ។
កាលពីព្រឹកថ្ងៃសៅរ៍ដដែល តាមរយៈសន្និសីទកាសែតមួយ មេដឹកនាំគណបក្សប្រឆាំងបានអះអាងរួចម្តងហើយ ថានឹងមិនទៅចូលរួមប្រជុំសភា ដោយមិនមានការដោះស្រាយគ្នាជាមុន។ កិច្ចប្រជុំស្ថាប័ននីតិបញ្ញតិដំបូង បន្ទាប់ពីការបោះឆ្នោតនេះ នឹងត្រូវកំណត់នៅថ្ងៃទី ២៣កញ្ញាខាងមុខ យោងតាមព្រះរាជសារនិងលិខិតអញ្ជើញរបស់ព្រះមហាក្សត្រ ដែលបានចែកជូនដល់អ្នកតំណាងរាស្ត្រជាប់ឆ្នោត កាលពីព្រឹកមិញ។
យោងតាមប្រភពចេញពីកិច្ចប្រជុំកាលពីល្ងាចនេះដែរ លោក សម រង្ស៊ី ប្រធានគណបក្ស សង្គ្រោះជាតិ ក៏បានសំណូមពរឲ្យអ្នកតំណាងរាស្ត្រគណបក្សសង្គ្រោះជាតិ សសេរលិខិត រៀងៗខ្លួនថ្វាយព្រះមហាក្សត្រ ដើម្បីស្នើសុំព្រះអង្គពន្យារពេលបើកកិច្ចប្រជុំរដ្ឋសភាដំបូង នៅថ្ងៃទី ២៣ កញ្ញា ដើម្បីទុកឱកាសឲ្យគណបក្សទាំងពីរបន្តរកដំណោះស្រាយជាមួយគ្នា ស្តីពីបញ្ហានៃការបោះឆ្នោតបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ